انت

اسكەري انت قابىلداۋ – وتانىڭا, حالقىڭا ادال بولۋ, ەل باسىنا كۇن تۋسا, ونى اقتىق دەمىڭ قالعانشا قورعاۋ, قاجەت بولسا, جان قيۋ دەگەن ءسوز. وسىلايشا, انت قابىلداعان سارباز – ءبىزدىڭ ۇلان-عايىر جەرىمىزدى بىلەكتىڭ كۇشىمەن, اق نايزانىڭ ۇشىمەن قورعاعان جاۋجۇرەك اتا-بابالارىمىزدىڭ ەرلىك جولىن جالعاستىرۋشى, ەلدىڭ قورعانى, سەنىم ارقالاعان ازاماتقا اينالماقشى.  وتكەن سەنبى كۇنى ەلوردا تورىندەگى وتان-انا الاڭىندا قازاقستان رەسپۋبليكاسى ۇلتتىق ۇلان جاۋىنگەرلەرىنىڭ سالتاناتتى اسكەري انت قابىلداۋ ءراسىمى ءوتتى.  ءبىزدىڭ حالقىمىز – ەجەلدەن وتان ءۇشىن توككەن تەردىڭ باعاسىن باعامداي بىلگەن حالىق. ونىڭ ىشىندە قاستەرلى وتان – انانى قورعاۋ ەڭ اسقاق پارىز, ابىرويلى مىندەت ەكەنىن جاس ساربازدار جاقسى بىلەدى. وتان ءۇشىن وتقا تۇسەر ازاماتتارىمىزدىڭ ومىرىندەگى بۇل جاۋاپتى قادام جاساۋ شاراسىنا پارلامەنت دەپۋتاتتارى, ۇلتتىق ۇلان باس قولباسشىلىعىنىڭ باسشى قۇرامى مەن ءىىم ارداگەرلەر كەڭەسىنىڭ توراعاسى, وتستاۆكاداعى ميليتسيا گەنەرال-مايورى ومىرزاق بولسامبەكوۆ باستاعان ءبىر توپ ارداگەر, ءدىني ۇيىمدار, سونداي-اق, انت قابىلداۋشىلاردىڭ اتا-انا, تۋعان-تۋىستارى قاتىستى. ايتا كەتەيىك, بۇل جولعى انت قابىلداۋ ءراسىمى ءوزىنىڭ اۋقىم­دىلىعىمەن ەرەكشەلەنىپ وتىر. ويتكەنى, اتالعان شارادا ەلور­داداعى 5573 اسكەري ءبولىمىنىڭ 800-دەن استام جاۋىنگەرى وتانعا ادال قىزمەت ەتۋ جونىندە سەرت بەردى. جاۋىنگەرلەر قاتارىن ەلىمىزدىڭ تۇپكىر-تۇپكىرىنەن اسكەرگە الىنعان جاس ساربازدار قۇرادى. وسى كوكتەمدە ۇلتتىق ۇلان اسكەري بولىمدەرىندە قىزمەت اتقارۋعا شاقىرتىلعان ولار ءبىر اي بويى اسكەري ءومىردىڭ تىنىس-تىرشىلىگىنە توسەلىپ, جاۋىنگەرلىك دايىندىقتان وتكەن بولاتىن. سونداي ىجداعاتتى دايىن­دىقتىڭ جەمىسىن الاڭعا جينالعان كوپشىلىكتىڭ جاۋىنگەرلەرگە دەگەن ەرەكشە ىقىلاسىنان اڭعارۋعا بولاتىن ەدى. جاۋىنگەرلىك تۋ سالتاناتتى تۇردە ساقاداي ساپ تۇزەگەن ساربازداردىڭ ناق ورتاسىنا اكەلىنگەن سوڭ شارانىڭ شىمىلدىعى دا ءتۇرىلىپ, جاۋىنگەرلەر انت قابىلداۋعا كىرىستى. مۇندايدا جۇزدەرى باقىتتان بال-بۇل جانعان ءاربىر جاننىڭ ەرەكشە تولقىنىستا تۇرعاندىعىن ءتۇسىنۋ قيىن ەمەس, ارينە. ساربازدارعا ارناعان ءوزىنىڭ قۇتتىقتاۋ سوزىندە ۇلتتىق ۇلان­نىڭ باس قولباسشىسى گەنەرال-لەيتەنانت رۋسلان جاقسىلىقوۆ: – ۇلتتىق ۇلان جاۋىنگەرلەرى, بۇگىن سەندەر اسكەري انت قابىلداي وتىرىپ, تۋعان ەلىڭ – قازاقستان رەسپۋبليكاسىنا, قاستەرلى حالقى­مىزعا جانە ونىڭ زاڭدى سايلان­عان پرەزيدەنتىنە اقتىق دەمىڭ قالعانشا ادال قىزمەت ەتۋگە سەرت بەردىڭدەر. بۇل سەندەردىڭ ءومىر­لەرىڭدە ەرەكشە ەستە قالار ءسات, ءارى ەر ەنشىسى – ەل قورعاۋعا باسقان قادامدارىڭ, – دەدى. جاس ساربازدارعا ءو.بولسام­بەكوۆ پەن اقمولا گارنيزونىنىڭ اسكەري پروكۋرورى ادىلەت پول­كوۆ­نيگى د.ءجۇمادىلوۆ, اتا-انالار ­اتىنان روزا جادانوۆا ىزگى تىلەك­تە­رىن ءبىلدىردى. ءيا, وتان الدىنداعى بورىش­تارىن وتەۋ باقىتى ەلوردادا بۇيىرعان جاس ساربازدار ءۇشىن ەندىگى مىندەت – اسقارالى استانانىڭ  تىنىشتىعىن كىرپىك قاقپاي كۇزەتۋ, ازا­ماتتاردىڭ قۇقىقتارىنىڭ قورعالۋىن قامتاماسىز ەتۋ, قىل­مىسقا قارسى كۇرەس جۇرگىزۋ. راۋشان تاۋىرحانقىزى, جۋرناليست.