ماسكەۋدە جولبارىس ەتى مەن ادام قولدارىن ساتۋشىلار ۇستالدى

استانا. 15 مامىر. ماسكەۋدە امۋر جولبارىسىنىڭ ەتى مەن ادام قولدارىن ساتقان ەكى ۆەتنام ازاماتى قولعا ءتۇستى. بۇل تۋرالى vesti.ru حابارلادى. جولبارىستىڭ قىزىل كىتاپقا ەنگىزىلگەنىنە قاراماستان, ساۋداگەرلەر ونى اشىق جارنامالاعان. ءتىپتى جەرگىلىكتى گازەتتەردىڭ بىرىنە ساۋدالارى تۋرالى حابارلاندىرۋ دا بەرگەن. ءتىنتۋ كەزىندە ماسكەۋ پوليتسەيلەرى بۇدان باسقا دا كۇتپەگەن جايتتارعا تاپ بولدى. پوليتسەيلەر جارناما ارقىلى تۇتىنۋشى رەتىندە حابارلاسىپ, ساۋداگەرلەردى كەزدەسۋگە شاقىرادى. ولار جولبارىستىڭ باسىن ساتىپ الۋ جونىندە سويلەسكەن. قازىرگى تاڭدا اتالعان اڭنىڭ سانى الەم بويىنشا 1 مىڭعا دا جەتپەيتىنىن ايتا كەتەيىك. جولبارىستىڭ تىسىنەن شەبەرلەر قىمبات اشەكەي بۇيىمدار مەن كىشكەنتاي مۇسىندەر جاسايدى. سونداي-اق, ۇستەل ساعاتتارىن اسەمدەپ, كومكەرۋ ءۇشىن دە قولدانىلادى. سول سەبەپتى, تەك ءتىسىنىڭ باعاسى شامامەن 10 مىڭ اقش دوللارىن قۇرايدى. ۇستالعان ۆەتنامدىقتار ماسكەۋدىڭ ليۋبلينو اۋدانىنداعى پاتەرلەردىڭ بىرىندە تۇرعان. سول جەرگە تۇندە ولگەن جولبارىستاردى الىپ كەلىپ, ەتتەرىن بولشەكتەگەن. پاتەردەگى ەكى مۇزداتقىش جولبارىس ەتىمەن تولتىرىلعانى بەلگىلى بولدى. مۇنداي ەتتىڭ كيلوسى جابايى ساۋدادا 2 مىڭ دوللاردان قىمباتقا باعالانادى. بىراق بۇل ساۋداگەرلەردىڭ ەتتى قايدا جىبەرىپ وتىرعاندارى ازىرگە بەلگىسىز. وسى رەتتە ماسكەۋدەگى كەيبىر مەيرامحانالاردا جولبارىس ەتىنەن ەكزوتيكالىق اس دايىندالاتىنىن ايتا كەتكەن ءجون. ءتارتىپ ساقشىلارىنىڭ ءبىرى بۇل قىلمىس جونىندە: «جارنامادا اق جولبارىستىڭ سۋرەتى بولدى. ال مۇزداتقىشتا جاتقانى جيرەن ءتۇستى. سوندىقتان بارلىعىن ەرىتىپ, ناقتىلاۋ كەرەك», – دەيدى. بۇگىندە پوليتسەيلەر قۇرىپ بارا جاتقان اڭنىڭ ماسكەۋگە قايدان اكەلىنگەنىن انىقتاۋدا. سونىمەن قاتار, ءتارتىپ ساقشىلارى پاتەردى ءتىنتۋ بارىسىندا تاعى ءبىر دوربانى تاپقان. العاشىندا جولبارىستىڭ تاباندارى دەپ قابىلداعان ولار, اشقان كەزدە جانتۇرشىگەرلىك كورىنىسكە كۋا بولدى. سەبەبى, دوربانىڭ ىشىندە ادامنىڭ قولدارى جاتقان ەدى. قازىر وسى دەرەكتەر بويىنشا قىلمىستىق ءىس قوزعالىپ, تەرگەۋ جۇمىستارى قولعا الىندى. ەلامان قوڭىر. دەرەك, سۋرەت: vesti.ru.