سۋرەت: ortcom.kz
ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا مادەنيەت جانە اقپارات مينيسترلىگى جاستار جانە وتباسى ىستەرى كوميتەتى توراعاسىنىڭ مىندەتىن اتقارۋشى. ءبىرجان ءالىمجانوۆ «دارىن» سىيلىعىنا ۇمىتكەرلەردى ۇسىنۋ مەن ىرىكتەۋ تالاپتارى تۋرالى ەگجەي-تەگجەي ايتىپ بەردى.
«ۇمىتكەرلەر تالانتتى, بەلسەندى, شىعارماشىل, حالىقارالىق جانە رەسپۋبليكالىق كونكۋرستاردىڭ, فەستيۆالدەر مەن ءتۇرلى شارالاردىڭ لاۋرەاتتارى, رەسپۋبليكالىق جانە حالىقارالىق دەڭگەيلەردەگى سپورتتىق جارىستاردىڭ جۇلدەگەرلەرى مەن جەڭىمپازدارى, سونداي-اق ءتۇرلى سالالاردا قوعامدى دامىتۋعا ۇلەس قوسىپ جۇرگەن 35 جاسقا دەيىنگى ازاماتتار بولۋى كەرەك», دەدى سپيكەر.
ونىڭ ايتۋىنشا, «دارىن» سىيلىعىنىڭ لاۋرەاتتارى ارنايى قۇرىلعان كوميسسيا شەشىمىمەن انىقتالادى. ولاردى ىرىكتەۋ ەكى كەزەڭدە جۇرگىزىلمەك. كوميسسيا ۋاكىلەتتى ورگانداردىڭ, ورتالىق مەملەكەتتىك ورگانداردىڭ وكىلدەرىنەن, عالىمداردان, شىعارماشىل قىزمەتكەرلەردەن, مەملەكەت جانە قوعام قايراتكەرلەرىنەن, بەلگىلى سپورت شەبەرلەرى, پرەزيدەنت جانىنداعى جاستار ساياساتى جونىندەگى كەڭەس مۇشەلەرى قاتارىنان جاساقتالادى.
«دارىن» سىيلىعى عىلىم, شىعارماشىلىق جانە قوعامدىق قىزمەت سالالارىندا جەمىستى ەڭبەگىمەن كوزگە تۇسكەن, سونداي-اق سپورتتا جوعارى ناتيجەلەر كورسەتكەن دارىندى جاستاردى مەملەكەتتىك قولداۋ ماقساتىندا تاعايىندالادى. ءتۇرلى سالادا قاتارىنىڭ الدى بولىپ جۇرگەن جاستارىمىز از ەمەس. ولاردى تانىپ, تەك قولداۋ كورسەتۋ قاجەت», دەدى ب.ءالىمجانوۆ.
ۇزدىك شىققان جاستارعا «دارىن» مەملەكەتتىك جاستار سىيلىعىنىڭ لاۋرەاتى اتاعى مەن توسبەلگى تابىس ەتىلەدى. وتىنىمدەردى قابىلداۋ 17 قىركۇيەككە دەيىن جۇرگىزىلەدى. تولىق اقپاراتتى مادەنيەت جانە اقپارات مينيسترلىگىنىڭ رەسمي سايتىنان (mki.gov.kz) الۋعا بولادى.
ايتا كەتسەك, ءار جىلدارى «دارىن» مەملەكەتتىك جاستار سىيلىعىنا ءانشى ديماش قۇدايبەرگەن, سپورتشى داستان ساتپاەۆ سەكىلدى ەلىمىزدىڭ اتىن الەمگە تانىتىپ جۇرگەن ايرىقشا دارىن يەلەرى يە بولعان. بيىل ولاردىڭ قاتارى جاڭا ەسىمدەرمەن تولىقپاق.
