اۋرۋحانا ديرەكتورى ءمۇسلىم سولتانوۆتىڭ ايتۋىنشا, وبلىس اكىمدىگى مەن دەنساۋلىق ساقتاۋ باسقارماسى قولداۋىنىڭ ارقاسىندا ەمدەۋ مەكەمەسىندەگى مەديتسينالىق جابدىقتار جاڭارىپ جاتىر. سوماتيكالىق جانە حيرۋرگيالىق بولىمدە توسەك-ورىن 100 پايىز
جاڭارعان.
«بۇل قولداۋدىڭ نەگىزگى ماقساتى – مەديتسينالىق كومەكتىڭ ساپاسى مەن قاۋىپسىزدىگىن ارتتىرۋ. بيىل اۋرۋحاناعا ارنايى مەديتسينالىق, جۇمساق جانە قاتتى توسەك جابدىقتارى ساتىپ الىندى. بۇل كىشكەنتاي ەمدەلۋشىلەرىمىزدىڭ ەم الۋ جاعدايىن جاقسارتۋعا مۇمكىندىك بەرەدى», دەيدى مەكەمە باسشىسى.
ماسەلەن, تراۆماتولوگيا بولىمشەسىنە كۇيىك شالعان ناۋقاستاردى ەمدەۋگە ارنالعان ارنايى توسەككە قاجەتتى كەراميكالىق ميكروسفەرالار مەن سۇزگى-جايمالار ساتىپ الىنعان. بۇل جابدىقتار كۇيىك شالعان بالالاردى ەمدەۋ ساپاسىن جاقسارتادى. دەنەسىنىڭ كوپ بولىگىن كۇيىك شالعان بالالار ارنايى كۇيىككە قارسى توسەكتە ەم قابىلدايدى. مۇنداي جابدىق ەمدەۋ ۇدەرىسىنىڭ تيىمدىلىگىن ارتتىرىپ, اسقىنۋلاردىڭ الدىن الۋعا كومەكتەسەدى. اۋىر كۇيىك العان بالالار كوپ كەزدەسپەگەنىمەن, ءتۇرلى كۇيىك جاراقاتىمەن جەتكىنشەكتەر ءجيى ءتۇسىپ تۇرادى. سوندىقتان ارنايى جابدىقتاردىڭ ۇزدىكسىز جۇمىس ىستەۋى ماڭىزدى.
بۇعان قوسا ينفەكتسيالىق ستاتسيونارداعى بارلىق ەسكى ماتراستار زاماناۋي ۇلگىگە اۋىستىرىلعان. جاڭا ماتراستاردى كامەرالىق وڭدەۋدەن وتكىزبەي-اق ارنايى حيميالىق تاسىلمەن زارارسىزداندىرۋعا بولادى. بۇل سانيتارلىق تالاپتاردى ساقتاۋدى جەڭىلدەتەدى. سوماتيكالىق جانە حيرۋرگيالىق كورپۋستار ءۇشىن ەرەسەكتەر مەن بالالارعا ارنالعان ءتۇرلى موديفيكاتسياداعى 260-قا جۋىق توسەك ساتىپ الىنعان. سانيتارلىق-گيگيەنالىق تالاپتاردى ساقتاۋ ماقساتىندا جاڭا كىر جۋاتىن, كەپتىرەتىن ماشينالار دا الىنعان.
اۋرۋحانا باسشىسىنىڭ ايتۋىنشا, ماتەريالدىق-تەحنيكالىق بازانى جاڭارتۋ جۇمىسى كەزەڭ-كەزەڭىمەن جالعاسادى. كەلەسى جىلى تۋمبالار, ۇستەلدەر, ورىندىقتار سياقتى جيھاز جابدىقتارىن جاڭارتۋ جوسپارلانىپ وتىر.
وبلىس ورتالىعىنىڭ تۇرعىنى اسەمگۇل جۇماشەۆا بىرنەشە كۇننەن بەرى ەكى جاسار ۇلىمەن اۋرۋحانادا ەم قابىلداپ جاتىر ەكەن. ايتۋىنشا, اۋرۋحاناداعى ناۋقاستارعا جاسالعان جاعداي كوڭىلىنەن شىققان.
«بالام ۋلانىپ قالىپ, قاتتى ۋايىمدادىم. دارىگەرلەر دەر كەزىندە كومەك كورسەتىپ, بارلىق قاجەتتى ەم-شارالاردى جۇرگىزدى. مەديتسينالىق قىزمەتكەرلەر وتە سىپايى, ءاردايىم جاعدايىمىزدى سۇراپ, كومەكتەسىپ وتىرادى. پالاتاداعى جاعداي دا جاقسى, بولمەلەر تازا ءارى جارىق. بۇعان دەيىن بالالارمەن اۋرۋحانادا جاتىپ كورمەگەن ەدىم, سوندىقتان العاشىندا الاڭدادىم. بىراق مۇندا ءبارى جاقسى ۇيىمداستىرىلعان», دەيدى انا.
قازىردە وبلىستىق بالالار اۋرۋحاناسىنىڭ سوماتيكالىق جانە حيرۋرگيالىق بولىمشەلەرىندە 162 بالا, ينفەكتسيالىق ستاتسيوناردا 133 بالا ەم قابىلداپ جاتىر.
پاۆلودار وبلىسى
