اسا اۋىلىنىڭ تۇرعىنى دارحان نۇرماحانوۆ وبلىس اكىمى ەربول قاراشوكەەۆتىڭ قولىنان جاڭا پاتەردىڭ كىلتىن الىپ تۇر.
الدىمەن جامبىل اۋدانىنىڭ ورتالىعى اسا اۋىلىنداعى 120 پاتەرلى تۇرعىن ۇيدە اسىراۋشىسىنان ايىرىلعان ازاماتتار, ءى جانە ءىى توپتاعى مۇگەدەكتىگى بار جاندار جانە وزگە دە الەۋمەتتىك ساناتتاعى وتباسىلار باسپانا كىلتىنە يە بولدى. جۇزدەرىنەن شاتتىق لەبى سەزىلگەن جاڭا قونىس يەلەرىنە قاجەتتى تۇرمىستىق تەحنيكالار دا تارتۋ ەتىلدى.
ءىس-شارادا العاش بولىپ ءسوز العان جامبىل وبلىسىنىڭ اكىمى ەربول قاراشوكەەۆ مەملەكەت باسشىسى قاسىم-جومارت توقاەۆتىڭ ازاماتتاردى تۇرعىن ۇيمەن قامتاماسىز ەتۋ جونىندەگى تاپسىرماسى وڭىردە جۇيەلى تۇردە جۇزەگە اسىرىلىپ جاتقانىن اتاپ ءوتتى. سونداي-اق وتباسى بانك ارقىلى باسپانالى بولعان وتباسىلار سانى جىل سايىن ارتىپ كەلە جاتقانىن جەتكىزدى.
ءلاززات يبراگيموۆا كوپبالالى انا ءجاميلا جايىلعانوۆاعا پاتەر كىلتىن تاپسىردى.
– بۇگىن تۇرعىن ءۇي كەزەگىندە تۇرعان كوپتەگەن وتباسى جالدامالى پاتەر كىلتىن الىپ وتىر. بۇل – بارشاڭىز ءۇشىن ۇلكەن قۋانىش. وسى ءىس-شارا ءۇشىن ارنايى استانادان كەلدىم. شاڭىراقتارىڭىزدان شاتتىق كەتپەسىن, بالالارىڭىزدىڭ قىزىعىن كورىڭىزدەر. ۇكىلەپ وسىرگەن ۇل-قىزدارىڭىز ەل سەنىمىن اقتاپ, ابىرويلى ازامات بولىپ ءوسسىن. تەك جاقسىلىقتا جۇزدەسەيىك, – دەدى ءلاززات يبراگيموۆا جاڭا قونىس يەلەرىن قۇتتىقتاپ.
اسا اۋىلىنداعى جاڭا تۇرعىن ۇيدەن پاتەر العانداردىڭ اراسىندا مۇمكىندىگى شەكتەۋلى ازاماتتار دا بار. سولاردىڭ ءبىرى – دارحان نۇرماحانوۆ. ول تۇرعىن ءۇي كەزەگىنە ءۇش جىل بۇرىن تىركەلگەن. بۇگىندە كوپتەن كۇتكەن باسپاناسىنا قول جەتكىزىپ وتىر.
– مەن 2023 جىلى دەنساۋلىعىما بايلانىستى تۇرعىن ءۇي كەزەگىنە تۇرعان بولاتىنمىن. ەكىنشى توپتاعى مۇگەدەكتىگى بار ازامات رەتىندە اۋىر جۇمىس ىستەۋگە مۇمكىندىگىم جوق. ءۇش جىل بۇرىن كەزەككە تۇرعان كەزدە باسپانالى بولاتىنىما اسا سەنە قويماعان ەدىم. ءبىر اي بۇرىن حابارلاما كەلىپ, قاجەتتى قۇجاتتاردى راسىمدەۋگە كىرىستىم. بۇگىن, مىنە, وتباسى بانك ارقىلى ءۇش بولمەلى پاتەردىڭ كىلتىن الىپ وتىرمىز.
جاڭا پاتەر كىلتىن العان باقىتتى جاندار - گالينا ميحايلوۆسكايا, كوشەرباي يزەنتاەۆ, تاتيانا سوبولەۆا, اسەل اقانوۆا.
قازىرگى قۋانىشىمدى سوزبەن جەتكىزۋ قيىن. قۇمتيىن اۋىلىنان اۋدان ورتالىعىنا قونىس اۋدارىپ جاتىرمىز. ەڭ باستىسى, جالدامالى پاتەردىڭ تولەماقىسى قولجەتىمدى. ونىڭ ۇستىنە, بولاشاقتا بۇل باسپانانى ساتىپ الۋ مۇمكىندىگى قاراستىرىلعان. الداعى ۋاقىتتا وسى مۇمكىندىكتى پايدالانىپ, ءۇيدى ءوز اتىما راسىمدەۋگە كۇش سالامىن.
وسىنداي مۇمكىندىك جاساپ وتىرعان مەملەكەتكە, جەرگىلىكتى بيلىك وكىلدەرىنە جانە بانك باسشىلىعىنا العىسىم شەكسىز. بىردەن باسپانا ساتىپ الۋعا جاعدايى كەلمەيتىن ءوزىمىز سەكىلدى كوپبالالى جانە الەۋمەتتىك وسال وتباسىلار ءۇشىن بۇل وتە ماڭىزدى قولداۋ دەپ ەسەپتەيمىن, – دەيدى دارحان نۇرماحانوۆ.
رەسمي مالىمەتكە سۇيەنسەك, اسا اۋىلىنداعى «بايتەرەك» تۇرعىن الابىندا بوي كوتەرگەن تۇرعىن ءۇيدىڭ قۇرىلىسىن «تاراز قۇرىلىس ديزاين» جشس جۇرگىزگەن. بەس قاباتتى ۇيدە 10 ءبىر بولمەلى, 62 ەكى بولمەلى جانە 48 ءۇش بولمەلى پاتەر بار. تۇرعىنداردىڭ جايلى ءومىر ءسۇرۋى ءۇشىن بارلىق قاجەتتى جاعداي جاسالعان.
جاڭا پاتەرگە قونىستانعان تۇرعىنداردىڭ قۋانىشىندا شەك جوق. سولاردىڭ ءبىرى – ءجاميلا جايىلعانوۆا.
– بۇگىن وتباسىمىز ءۇشىن ۇمىتىلماس كۇن بولىپ وتىر. كوپتەن كۇتكەن ارمانىمىز ورىندالدى. سەگىز بالامىزدىڭ نەسىبەسى شىعار, ءۇش بولمەلى پاتەر بۇيىردى. وسىنداي مۇمكىندىك بەرگەن وبلىس جانە اۋدان باسشىلىعىنا, وتباسى بانك ۇجىمىنا شىنايى العىسىمدى بىلدىرەمىن, – دەيدى ول.
گۇلسارا راحيموۆا مەن ءلاززات يبراگيموۆانىڭ اسەرلى قۇشاقتاسۋ ءساتى.
بۇل كۇنى تاراز قالاسىنداعى ۇلى دالا شاعىن اۋدانىنىڭ قىز جىبەك كوشەسىندە ورنالاسقان جاڭا تۇرعىن ءۇي دە پايدالانۋعا بەرىلدى. مۇندا الەۋمەتتىك وسال ساناتتاعى ازاماتتارعا, اتاپ ايتقاندا, تولىق ەمەس جانە كوپبالالى وتباسىلارعا, ەرەكشە قاجەتتىلىگى بار بالا تاربيەلەپ وتىرعان وتباسىلارعا, سونداي-اق ءى جانە ءىى توپتاعى مۇگەدەكتىگى بار ازاماتتارعا پاتەرلەر تاپسىرىلدى.
جاڭا قونىس يەلەرىنە جامبىل وبلىسىنىڭ اكىمى ەربول قاراشوكەەۆ پەن وتباسى بانك باسقارما توراعاسى ءلاززات يبراگيموۆا پاتەر كىلتتەرىن سالتاناتتى تۇردە تاپسىردى.
وتباسى بانك باسقارما توراعاسى ءلاززات يبراگيموۆانىڭ ايتۋىنشا, حالىقتىڭ الەۋمەتتىك وسال توپتارىن تۇرعىن ۇيمەن قامتاماسىز ەتۋ جۇمىستارى كەزەڭ-كەزەڭىمەن جالعاسادى.
– بۇگىن تاراز قالاسىنداعى ۇلى دالا شاعىن اۋدانىنىڭ قىز جىبەك كوشەسىندە ورنالاسقان 169 جالدامالى پاتەردىڭ كىلتى تاپسىرىلدى. مۇندا ون جىلدان استام ۋاقىت بويى تۇرعىن ءۇي كەزەگىندە تۇرعان ازاماتتار باسپانالى بولدى. ولاردىڭ قاتارىندا كوپبالالى وتباسىلار, ەرەكشە قاجەتتىلىگى بار بالالاردى تاربيەلەپ وتىرعان اتا-انالار, ءى جانە ءىى توپتاعى مۇگەدەكتىگى بار ازاماتتار مەن تولىق ەمەس وتباسىلار بار.
جاڭا تۇرعىن ۇيدەن باسپانالى بولعانداردىڭ شامامەن 70 پايىزى وسى ساناتتارعا جاتادى. تۇرعىن ءۇي كەزەگىندە تۇرعان جانە تۇگەندەۋ راسىمىنەن ۋاقتىلى وتكەن ازاماتتاردىڭ بارلىعى ارنايى پورتال ارقىلى ءوتىنىم بەرىپ, قاجەتتى قۇجاتتارىن راسىمدەدى. بۇگىندە ولار جالداۋ شارتتارىنا قول قويىپ, جاڭا پاتەرلەرىنىڭ كىلتتەرىن الدى.
قازىرگى تاڭدا جامبىل وبلىسىندا تۇرعىن ءۇي كەزەگىندە شامامەن 60 مىڭ ادام تۇر. بۇگىندە 2016–2017 جىلدارى كەزەككە تۇرعان ازاماتتاردى باسپانامەن قامتاماسىز ەتۋ جۇمىستارى جۇرگىزىلىپ كەلەدى. بۇل ماسەلە كەزەڭ-كەزەڭىمەن شەشىمىن تاباتىن بولادى.
2026 جىلى ەلىمىز بويىنشا جالعا بەرىلەتىن جانە نەسيەلىك تۇرعىن ۇيلەر سانى رەكوردتىق دەڭگەيگە جەتتى. قازىرگى ۋاقىتقا دەيىن شامامەن 12 مىڭ پاتەر پايدالانۋعا بەرىلىپ, ولاردى ءبولۋ جانە تاپسىرۋ جۇمىستارى جۇرگىزىلىپ كەلەدى. جىل سوڭىنا دەيىن تاعى 8 مىڭعا جۋىق پاتەردى پايدالانۋعا بەرۋ جوسپارلانعان. جالپى العاندا, بيىلعى كورسەتكىش كەيىنگى جىلدارداعى ەڭ جوعارى ناتيجەلەردىڭ ءبىرى بولىپ وتىر, – دەدى ءلاززات يبراگيموۆا.
جامبىل وبلىسى
