«اق جول» دەموكراتيالىق پارتياسىنىڭ ورتالىق كەڭسەسىندە وتكەن جيىنعا سايلانعان 170 دەلەگاتتىڭ 165-ءى قاتىستى. ونىڭ ىشىندە 50-ءى وفلاين, ال 115-ءى ونلاين فورماتتا قوسىلدى. جيىن بارىسىندا پارتيا جارعىسىنا وزگەرىستەر ەنگىزۋ, «اق جولدىڭ» ساياسي باعدارلاماسىن جاڭارتۋ جانە بىرقاتار ۇيىمداستىرۋشىلىق ماسەلە قارالدى.
سەزد ءبىراۋىزدان بەرىك دۇيسەمبينوۆ توراعالىق ەتەتىن ماندات كوميسسياسىنىڭ قۇرامىن بەكىتتى. كوميسسيا قۇرامىنا پارتيانىڭ ورتالىق اپپاراتىنىڭ باسشىسى اسىلحان قوجاحمەتوۆ پەن پارتيانىڭ زاڭ قىزمەتىنىڭ جەتەكشىسى رۋستام جۇماعاليەۆ ەندى.
«اق جول» دەموكراتيالىق پارتياسىنىڭ توراعاسى ازات پەرۋاشەۆ جاڭارتىلعان كونستيتۋتسيانىڭ تالاپتارىنا سايكەس پارتيانىڭ ىشكى نورمالارى مەن تەرمينولوگياسىن ۇيلەستىرۋگە باعىتتالعان جارعىعا تۇزەتۋلەر پاكەتى دايىندالعانىن حابارلادى.
تالقىلاۋ بارىسىندا پارتيا قۇرىلتايدا دا, حالىقپەن تىكەلەي جۇمىس ىستەيتىن جەرگىلىكتى ءماسليحاتتاردا دا وكىلەتتىلىگىن كۇشەيتۋ باعىتىندا جۇمىسىن جالعاستىراتىنى اتالىپ ءوتتى. ال پارتيا توراعاسىنىڭ ورىنباسارى, پارلامەنت ءماجىلىسىنىڭ ۆيتسە-سپيكەرى دانيا ەسپاەۆا ساياسي ۇيىم باعدارلاماسىنداعى وڭىرلىك كاسىپكەرلىكتى قولداۋ شارالارىن كۇشەيتۋدى ۇسىندى.
– وڭىرلەردە كاسىپكەرلىكتى قورعاۋ ماسەلەسىنە قاتىستى ءجيى كەزدەسەتىن تۇيتكىل بار. ولاردىڭ كەيبىرىن زاڭنامالىق دەڭگەيدە شەشۋگە بولادى, الايدا كوپتەگەن جاعدايدا ماسەلە زاڭدا ەمەس, ونىڭ ءار ايماقتا ءارتۇرلى قولدانىلۋىندا. بۇل كاسىپكەرلىك بەلسەندىلىك پەن ينۆەستيتسيالىق احۋالعا كەرى اسەرىن تيگىزىپ جاتىر. ەكىنشىدەن, ايەل كاسىپكەرلەردى قولداۋ باعىتىن كۇشەيتكەن ءجون. ەلدە قىز-كەلىنشەكتەرگە, اسىرەسە اۋىلدىق جەرلەردە بيزنەس باستاۋ الدەقايدا قيىن. ولاردى قولداۋدىڭ ءتيىمدى تەتىكتەرىن قالىپتاستىرۋ قاجەت. ۇشىنشىدەن, الەۋمەتتىك كاسىپكەرلەرگە دە ەرەكشە نازار اۋدارۋ كەرەك. بۇعان قاتىستى زاڭ قابىلدانعانىمەن, ونى ىسكە اسىرۋعا ارنالعان ناقتى باعدارلامالىق ىنتالاندىرۋ جەتكىلىكسىز, – دەي كەلە ول اقجولدىقتاردى الداعى ەكى اپتا ىشىندە وڭىرلەردەگى بيزنەس ءۇشىن ەڭ وزەكتى ماسەلەلەر جونىنەن ناقتى ۇسىنىستار دايىنداۋعا شاقىردى.
سەزدىڭ نەگىزگى ماسەلەسى «اق جول» دەموكراتيالىق پارتياسىنىڭ توراعاسى ازات پەرۋاشەۆتىڭ وكىلەتتىگىن توقتاتۋ تۋرالى مالىمدەمەسى بولدى. دەلەگاتتار الدىندا سويلەگەن سوزىندە ول قوعامدا بولىپ جاتقان ۇدەرىستەردىڭ قارقىنى جوعارى, مۇنداي جاعدايدا ۇزاق ۋاقىت ءبىر ادامنىڭ باسشىلىقتا وتىرۋى بەلگىلى ءبىر دارەجەدە تەجەگىش فاكتورعا اينالۋى مۇمكىن ەكەنىن جەتكىزدى. ساياساتكەردىڭ ايتۋىنشا, كەز كەلگەن «مونوپوليانىڭ» الدىن الۋدىڭ ءتيىمدى جولى – باسشىلىقتىڭ كەزەڭ-كەزەڭىمەن اۋىسىپ وتىرۋى. وسىلايشا, ءوزىنىڭ ورنىنا دانيا ەسپاەۆانىڭ كانديداتۋراسىن ۇسىندى.
– دانيا ەسپاەۆا پارلامەنتكە كەلگەنگە دەيىن بانك جۇيەسىندە قىزمەت اتقاردى. سالادا 34 جىل جۇمىس ىستەسە, سونىڭ 17 جىلىندا باسشىلىق لاۋازىمدا وتىرعان. ەكى رەت اقتوبە وبلىستىق ءماسليحاتىنىڭ دەپۋتاتى بولدى. ول العاش رەت 2016 جىلى «اق جول» پارتياسىنان ماجىلىسكە ءوتتى, قارجى جانە بيۋدجەت كوميتەتىندە جۇمىس ىستەدى, ال 2023 جىلدىڭ ناۋرىزىندا ءماجىلىس توراعاسىنىڭ ورىنباسارى قىزمەتىنە تاعايىندالدى. وسى ارالىقتا پارلامەنتتىك وپپوزيتسيا تۋرالى, زاڭسىز شىعارىلعان اكتيۆتەردى قايتارۋ تۋرالى, جەكە تۇلعالاردىڭ بانكروتتىعى تۋرالى زاڭداردى قوسا العاندا, بىرقاتار ماڭىزدى زاڭنامالىق باستامانىڭ اۆتورى ءارى تەڭ اۆتورى بولدى, سونداي-اق كونستيتۋتسيالىق كوميسسيا جۇمىسىنا قاتىستى. ايتا كەتەيىن, ول – 2019 جىلعى پرەزيدەنتتىك سايلاۋعا ۇسىنىلعان تۇڭعىش ايەل كانديدات. دانيا ماديقىزىنىڭ تاجىريبەسى, كاسىبي ءبىلىمى مەن باتىل شەشىم قابىلداي الۋ قابىلەتى پارتياعا جاڭا سەرپىن بەرەدى, – دەدى ا.پەرۋاشەۆ.
بالاما كانديدات رەتىندە قاراعاندى وبلىسىنىڭ دەلەگاتتارى «اق جول» دەموكراتيالىق پارتياسىنىڭ قاراعاندى وبلىستىق فيليالىنىڭ جەتەكشىسى, قازاقستان قىزمەت كورسەتۋ سالاسى كاسىپكەرلەرى قاۋىمداستىعىنىڭ توراعاسى ەرمەك ءابدىلدين كانديداتۋراسىن ۇسىندى. داۋىس بەرۋ راسىمىنە 165 دەلەگات قاتىستى. د.ەسپاەۆانىڭ كانديداتۋراسىن 152 دەلەگات قولدادى, ە.ابدىلدينگە 8 دەلەگات داۋىس بەردى, ال 5 دەلەگات قالىس قالدى. وسىلايشا, كەزەكتەن تىس سەزدىڭ شەشىمىمەن د.ەسپاەۆا «اق جول» دەموكراتيالىق پارتياسىنىڭ توراعاسى بولىپ سايلاندى.
– ون بەس جىل وسى پارتيادامىن. ىشكى جۇمىسىن, قاعيداتتارىن جانە ۇستانىمدارىن بىلەمىن. كوماندامەن تىڭعىلىقتى جۇمىس ىستەپ, بيىلعى سايلاۋعا دايىندالامىز. ازىرگە جوبامىزدى رەتتەپ الۋ كەرەك. باستى نازاردى وڭىرلەرگە بۇرۋ كەرەك, – دەدى د.ەسپاەۆا.
