كىتاپ وقۋدى كەڭىنەن دارىپتەۋدى كوزدەگەن كەزدەسۋدى كوللەدج باسشىسى مىرزابەك كۇجىموۆ جۇرگىزدى.
كەزدەسۋ بارىسىندا قويشىعارا سالعارا ۇلى بالا كۇنىنەن كىتاپتى كوپ وقىپ, سونىڭ ارقاسىندا جازۋ ونەرىنە بەيىم بولعانىن ايتتى. كەيىنگى جازعان كىتاپتارىنداعى بۇرىن ايتىلماعان تاريحي جاڭالىقتار تۋرالى باياندادى.
– مەن ءجۋرناليسپىن, – دەپ باستادى ءسوزىن قالامگەر. – تاريحشى بولامىن دەپ ەشقاشان ويلاعان ەمەسپىن. بىراق كەيىن حالقىمىزدىڭ تاريحى تۋرالى ءبىراز دۇنيەنى وقىپ, وعان كوپ قيانات جاسالعانىن كوردىم. شىنىندا, تاريحىمىز وتارلاۋشى ەلدەردىڭ ىعىندا جازىلدى. سونىڭ سالدارىنان كوپ بۇرمالانعان, – دەدى ول.
سونىمەن قاتار قويشىعارا سالعارا ۇلى جاستارعا جازۋشى, عالىم اقسەلەۋ سەيدىمبەكپەن دوستىعى جايىندا دا اڭگىمەلەدى.
«مەنى اقسەلەۋمەن تاعدىردىڭ ءوزى تابىستىردى. ەكەۋمىز قازىرگى «Egemen Qazaqstan» گازەتىندە بىرگە ىستەدىك. ءبىر ۇيدە تۇردىق. سىرلاس دوس بولدىق. بىردە اقسەلەۋ: «قويشەكە, ەكەۋمىز الماتىعا جازۋشى بولامىز دەپ كەلدىك. جۇرت قاتارلى ەكى-ءۇش جيناعىمىز جارىق كوردى. ادەبيەت – ءتورت قۇبىلاسى تۇگەل ەلگە ەستەتيكالىق تاربيە بەرۋگە تاپتىرمايتىن قۇرال. ال ءبىز سەكىلدى بودان بولعان ەلدىڭ ۇرپاعىن تاربيەلەۋگە تانىمدىق دۇنيە قاجەت. ەكەۋمىز دە كوركەم شىعارما جازىپ ءجۇرمىز. بىراق ءبىزدىڭ جازعانىمىز جاۋھار ەمەس ەكەنىن بىلەمىز. ال ورتاقول جازۋشىعا قازاق كەندە ەمەس. سوندىقتان حالىققا پايدامىزدى تيگىزەتىن جۇمىس ىستەيىك», دەدى. بۇل وي مەنى دە قاجاپ جۇرەتىن. ونىڭ ايتقانىمەن بىردەن كەلىستىم. ءسويتىپ, اقسەلەۋ «كۇڭگىر-كۇڭگىر كۇمبەزدەردى» جازدى. مەن «التىن تامىردى» جازدىم. ەكەۋمىزدى دە وسى ەڭبەكتەرىمىز ەلگە تانىتتى», دەدى ول.
