«استانا» سىرت الاڭدا «اۆتودوردى» جەڭدى

استانا. 1 ناۋرىز. ۆتب ليگاسى اياسىندا «استانا» باسكەتبول كومانداسى سىرت الاڭدا ساراتوۆتىڭ «اۆتودورىن» 94:83 ەسەبىمەن جەڭدى. بۇل تۋرالى egemen.kz حابارلادى. ويىننىڭ العاشقى مينۋتىندا «استانانىڭ» كوشباسشى ويىنشىسى دجەرري دجونسون ساۋساعىن جاراقاتتاپ الدى. ناتيجەسىندە, باس جاتتىقتىرۋشى رامۋناس بۋتاۋتاس ويىن ورنەگىنە تاكتيكالىق وزگەرىس ەنگىزۋگە ءماجبۇر بولدى. «اۆتودوردىڭ» سەنىم ارتقان ويىنشىسى كورتني فورتسوندى شاكىرتتەرى اناتولي كولەسنيكوۆ پەن پاۆەل يلينگە تاپسىرىپ, الاڭ يەلەرىنىڭ باستى ۇيلەستىرۋشىسىن تۇساپ قويدى. ليتۆالىق ماماننىڭ بۇل ارەكەتى ءوز جەمىسىن بەرىپ, «استانا» العاشقى ەكى كەزەڭدە جەڭىسكە جەتتى. ۇلكەن ۇزىلىستەن كەيىن شيراق قيمىلداعان ساراتوۆتىقتار ەسەپ ايىرماسىن ايتارلىقتاي قىسقارتىپ, سوڭعى ەكى كەزەڭدى ءوز پايدالارىنا اياقتادى. دەگەنمەن, «اۆتودور» ويىنشىلارى جەڭىلىستەن قاشىپ قۇتىلا المادى. وسى جەڭىسىنەن كەيىن «استانا» ليگانىڭ پلەي-وفف كەزەڭىنە شىعۋ ءۇمىتىن ساقتاپ قالدى. ەۆروچەللەندج تۋرنيرىندە توپتان شىعا الماعان قازاقستاندىق كوماندا بۇگىندە ءبىر عانا حالىقارالىق سايىستا باق سىناۋدا. سوندىقتان, بۋتاۋتاس باپكەر ۆتب ليگاسىندا جاقسى ناتيجە كورسەتۋ ءۇشىن بار كۇش-جىگەرىن سالارى انىق. «استانا» ازىرگە تۋرنير كەستەسىنىڭ 10-ساتىسىندا كەلەدى. ال پلەي-وفف كەزەڭىنە ۇزدىك 8 كوماندا شىعاتىنى بەلگىلى. «اۆتودور» بىزدەن جەڭىلگەنىنە قاراماستان, 7-ورىنعا تابان تىرەپ تۇر. وسى تارتىستا ەڭ كوپ ۇپاي جيعان «استانا» كومانداسىنىڭ ويىنشىسى دجەرري دجونسون. ول 40 مينۋتتىڭ ىشىندە 22 ۇپاي جيىپ, 8 مارتە ارىپتەستەرىنە ناتيجەلى پاس شىعاردى. ال «اۆتودور» ساپىنان ەڭ كوپ ۇپاي كيريلل فەسەنكونىڭ ەنشىسىنە جازىلدى. فەسەنكو ويىن بارىسىندا 21 ۇپايدى ءوز اتىنا جازعان ەكەن. «استانا» ليگاداعى كەلەسى ويىنىن 4 ناۋرىز كۇنى ءوز الاڭىندا سامارانىڭ «كراسنىە كرىليا» كومانداسىنا قارسى وتكىزەدى. قوس كوماندا اراسىنداعى كەزدەسۋ «سارىارقا» رەسپۋبليكالىق ۆەلوترەگىندە وتەتىنى بەلگىلى. ايتا كەتەيىك, «استانا» بۇگىنگە دەيىە وتە سۇرەڭسىز ويناپ كەلدى. سونىڭ ناتيجەسىندە, كوماندانىڭ باسشىلارى باس جاتتىقتىرۋشىنى الماستارىپ, رامۋناس بۋتاۋتاس مامانعا سەنىم ارتتى. ازىرگە ليتۆالىق ماماننىڭ ناتيجەسى جامان ەمەس. اسىرەسە, سوڭعى ءۇش ويىندا قاتارىنان ءۇش جەڭىسكە جەتكەن باسكەتبولشىلارىمىز جەرگىلىكتى جانكۇيەرلەردىڭ العىسىنا بولەندى. وسى ويىننىڭ الدىندا ليگا اياسىندا ەستونيالىق «كالەۆتەن» باسىم تۇسكەن بولاتىن. سونداي-اق, ەۆروچەللەندج تۋرنيرىندەگى بيىلعى ماۋسىم ءۇشىن سوڭعى ويىندا بەلگيالىق «وكاپي اللستاردى» تىزە بۇكتىردى. ەلامان قوڭىر. دەرەك: egemen.kz. سۋرەت: bcastana.kz.