بۇل كۇندەرى الماتى مەتروسىنىڭ قۇرىلىسى 90 پايىزعا اياقتالىپ, ەندى ونى تەحنيكالىق تۇرعىدان قامتاماسىز ەتۋ باستالدى. سارسەنبىنىڭ ساتىندە وڭتۇستىك استاناعا مەترونىڭ العاشقى ەلەكتر پويىزدارى جەتكىزىلىپ, قوس رەلسكە ءتۇستى.
جيىرما جىلدان استام ۋاقىتتان بەرى تىنىمسىز قازىلىپ-سالىنىپ كەلە جاتقان مەتروپوليتەن كەلەر جىلى, تاۋەلسىزدىگىمىزدىڭ 20 جىلدىعى قارساڭىندا قالالىقتاردىڭ يگىلىگىنە بەرىلۋى ءتيىس. الماتى مەتروسىن جىلجىمالى قۇراممەن قامتاماسىز ەتۋدى وڭتۇستىكورەيالىق ء“Hyundaى” كورپوراتسياسى قولعا الىپ وتىر.
الماتىلىقتار ءۇشىن ايتارلىقتاي وقيعا بولىپ تابىلاتىن وسىناۋ سالتاناتتى وقيعاعا قالا اكىمى احمەتجان ەسىموۆ, ء“Hyundaى” كورپوراتسياسىنىڭ پرەزيدەنتى كيم ´نگ نام, مەترو قۇرىلىسىنىڭ جۇمىسىن ۇزدىكسىز باسقارىپ كەلە جاتقان “مەتروپوليتەن” قمم ديرەكتورى مۇرات ۇكشەباەۆ, “الماتىمەتروقۇرىلىس” اق باس ديرەكتورى يسابەك اقاتوۆ پەن باق وكىلدەرى قاتىستى.
ديزاينى ەلىمىزدىڭ كوك بايراعىمەن ۇندەس جاسالىنعان ۆاگوندار – وتاندىق تەحنيكالىق تالاپتارعا عانا ەمەس, الەمدەگى زاماناۋي مەترو پويىزدارىنا قويىلاتىن تالاپتارعا سايكەس كەلەدى. مۇندا جولاۋشىلار ءۇشىن جايلىلىق, قاۋىپسىزدىك ماسەلەلەرى تۇگەل ەسكەرىلگەن. جولاۋشىلار ۆاگونداردان ۆاگوندارعا ەمىن-ەركىن وتە الادى. ەڭ باستىسى, جىلجىمالى قۇرامداردىڭ تەجەگىشى ەسكى ادىسپەن ەمەس, ديسك ارقىلى جۇمىس ىستەيدى. جوعارى جىلدامدىقپەن جۇرەتىن پويىزدى ديسك ارقىلى تەجەۋ ونىڭ دوڭگەلەكتەرىن تەز ەسكىرتپەيدى ءارى شۋدى ازايتىپ, جوندەۋگە كەتەتىن شىعىنداردى دا ايتارلىقتاي ۇنەمدەيدى ەكەن. ياعني, بۇرىن كولودكالىق تەجەگىشتەرگە ءتان فريكتسيالىق شاڭ جاڭا پويىزداردا جوق. بۇل دا ەكولوگيالىق تۇرعىدان وتە ءتيىمدى ەكەنى ايتىلۋدا.
سالتاناتتى وقيعا بارىسىندا ءسوز العان قالا اكىمى احمەتجان ەسىموۆ:
– ەلباسىنىڭ جولداۋىنا سايكەس, ءبىز قازاقستانداعى تۇڭعىش مەترونىڭ – الماتى مەتروسىن قولدانىسقا ەنگىزۋ جۇمىستارىن كەزەڭ-كەزەڭىمەن اتقارىپ وتىرمىز. بۇگىنگى وقيعانى وسى تاپسىرمانى ورىنداۋ بارىسىنداعى باستى كەزەڭدەردىڭ بىرىنە جاتقىزۋعا بولادى. ەكى اي بۇرىن ەلباسى وسى جەردە بولىپ, جۇمىس بارىسىمەن تانىسقان. مەترو قۇرىلىسى بەكىتىلگەن كەستەگە سايكەس جۇرگىزىلىپ جاتىر. كەلەسى جىلى ەل تاۋەلسىزدىگىنىڭ 20 جىلدىعى قارساڭىندا الماتى مەتروسى پايدالانۋعا بەرىلەدى دەگەن سەنىمدەمىز. ال ءبۇگىن ءبىز قالا تۇرعىندارى مەن قوناقتارىنا قىزمەت كورسەتەتىن مەترونىڭ العاشقى ءتورت قۇرامىن تانىستىرىپ وتىرمىز. ءتورت ۆاگوننان تۇراتىن 4 قۇرام, بۇل – 16 ۆاگون. تاعى ءۇش قۇرام – 12 ۆاگون تامىز-قىركۇيەك ايلارىندا جەتكىزىلەدى, – دەدى.
قالا اكىمى تاپسىرىسپەن جاسالعان ۆاگوندار وڭتۇستىك استاناعا دەر كەزىندە جەتكىزىلگەنىن, اتالمىش كورپوراتسيا مەترو ۆاگوندارىن جاساۋدا الەمدەگى جەتەكشى كومپانيالاردىڭ قاتارىنا ەنەتىندىگىن اتاپ ءوتتى. الماتى اكىمى وڭتۇستىكورەيالىق كومپانياعا تاڭداۋ تەگىن تۇسپەگەندىگىن, ونىڭ تاجىريبەسى مەن ۆاگونداردىڭ جايلىلىعى, ساپاسى زەرتتەلگەندىگىن ايتادى.
– بۇگىندە الەمدەگى ءىرى قالالاردىڭ ءبارى ەكولوگيالىق تۇرعىدان تازا كولىك ءتۇرلەرىنە كوشۋدە. سوندىقتان دا تاڭداۋ كوبىنە تەمىر جولدارمەن جۇرەتىن ەلەكتر پويىزدارىنا تۇسەدى. قاۋىپسىز تەحنولوگيالار مەن قاۋىپسىز ماتەريالداردان جاسالىنعان ۆاگوندار الماتىنىڭ ەكولوگيالىق احۋالىن جاقسارتۋعا سەپتەسەدى دەپ سەنەمىز. كەلەشەكتە بۇل قالادا مەترو جەلىلەرى كەڭەيە بەرەدى دەپ ويلايمىز. سوندىقتان ءبىزدىڭ كومپانيا وسىناۋ جوباعا ءۇلكەن ءمان بەرىپ وتىر, – دەدى ء“Hyundaى Rotem” كومپانياسىنىڭ وكىلى لي ´ سونگ مىرزا.
ساعاتىنا 80 شاقىرىمدىق جىلدامدىقپەن جۇرەتىن جىلجىمالى قۇرام ءبىر مەزەتتە 940 جولاۋشى تاسىمالدايدى. قاۋىپسىزدىك تۇرعىسىنان العاندا ۆاگونداردان ۆاگوندارعا ءوتۋ وڭاي جانە پويىزدار كونديتسيونەرلەرمەن جابدىقتالعان, ارناۋلى بەينەباقىلاۋ جۇيەسى ورناتىلعان.
مەملەكەتىمىز ءۇشىن ستراتەگيالىق ماڭىزدى نىسان بولىپ تابىلاتىن الماتى مەتروپوليتەنىنىڭ 4 ستانساسى تولىق اباتتاندىرىلعان, قالعان ءۇش ستانسادا ارلەندىرۋ جۇمىستارى جالعاسۋدا. قازىر جەر استى جولدارىندا رەلس سالۋ جۇمىستارى قىزۋ قارقىن العان.
كۇن سايىن ءوسىپ كەلە جاتقان مەگاپوليستەگى العاشقى كەزەڭنىڭ 7 بەكەتىمەن الماتىنىڭ كولىك كەپتەلىسى, جولاۋشى تاسىمالى ماسەلەسىن شەشۋ مۇمكىن ەمەس. سوندىقتان مەترو قۇرىلىسىن ءارى قاراي دامىتۋ ماقساتىندا قازىر اباي داڭعىلىنان باستاپ قالقامان-3 شاعىن اۋدانىنا دەيىن جانە “رايىمبەك باتىر” ستانساسىنان باستاپ “الماتى-1” ۆوكزالىنا دەيىن جەر استى جولىن سالۋ قاراستىرىلۋدا.
سونداي-اق كەلەشەكتە مەترونىڭ ەكىنشى كەزەگىن “دۋمان” شاعىن اۋدانىنان باستاپ ورتالىق ساياباققا دەيىن سالۋ جوسپارلانۋدا.
ايناش ەسالي, الماتى. سۋرەتتەردى تۇسىرگەن سامات قۇسايىنوۆ.
