«بارىس» ەكىنشى ويىندا «اۆانگاردتان» ەسە قايتاردى

استانا. 1 ناۋرىز. «بارىس» قۇرلىقتىق حوككەي ليگاسىنىڭ پلەي-وفف كەزەڭىندە ومبىلىق «اۆانگاردتى» 2:0 ەسەبىمەن جەڭىپ, قوس كوماندا اراسىنداعى جالپى ەسەپتى 1:1-جەتكىزدى. بۇل تۋرالى egemen.kz حابارلادى. العاشقى كەزدەسۋدەگى جەڭىلىستەن ساباق شىعارا بىلگەن استانالىقتار بۇل جولى جۇيەلى ويىن ورنەگىن كورسەتتى. ەسەسىنە, ايدىن يەلەرىنىڭ جۇيكەسى سىر بەرىپ, تارتىستىڭ نەبارى ءۇشىنشى مينۋتىندا ءبىر ويىنشىلارى كىشى ايىپپەن جازالاندى. ءتىپتى «اۆانگارد» ساپىنداعى نەمىس حوككەيشىسى فەليكس شيۋتتس يمەك تاياعىمەن قارسىلاسىن ۇرعانى ءۇشىن 4-مينۋتتا ويىن سوڭىنا دەيىن ايدىننان قۋىلدى. ناتيجەسىندە, ويىنشى باسىمدىعىن ۇتىمدى پايدالانعان قوناقتار ەسەپ اشتى. العاشقى شايبانىڭ اۆتورى دميتري ۋپپەر. ۇزىلىسكە دەيىن ءبىزدىڭ كوماندا ەكىنشى شايبانى سوعىپ, ەسەپتى ەسەلەدى. 15-مينۋتتا تالعات جايلاۋوۆ ۇيىمداستىرعان شابۋىلعا ناتيجەلى نۇكتە قويعان فەدور پوليششۋك بولاتىن. ويىننىڭ قالعان ەكى كەزەڭىندە ەسەپ وزگەرمەي, «بارىس» ماڭىزدى جەڭىسكە قول جەتكىزدى. استانالىقتاردىڭ قاقپاشىسى يان لاتسو 60 مينۋتتىڭ ىشىندە 37 سوققىنى قايتارىپ, قاقپاسىن گولدان امان ساقتاپ قالدى. ءوز كەزەگىندە, «بارىس» حوككەيشىلەرى قارسىلاستارىنىڭ قاقپاسىنا بارلىعى 16 سوققى جاساعانىن ايتا كەتەيىك. ەندى ەلوردالىق كوماندا ومبىلىقتاردى 3-4 ناۋرىزدا ءوز ايدىنىندا قابىلدايدى. «استاناداعى ەكى كەزدەسۋدە قانداي ناتيجە تىركەلسە دە قوس كوماندا اراسىنداعى تارتىستىڭ بەسىنشى ويىنى وتەتىن بولدى. سەبەبى, پلەي-وفف كەزەڭىنىڭ كەلەسى ساتىسىنا ءتورت رەت جەڭىسكە جەتكەن كوماندا شىعاتىنى بەلگىلى. سوندىقتان بۇل كەزەڭدە قارسىلاستار كەم دەگەندە ءتورت, ەڭ كوبى جەتى ويىن وتكىزۋگە ءماجبۇر. ەلامان قوڭىر. دەرەك: egemen.kz. سۋرەت: hawk.ru