قوستاناي. 29 ماۋسىم. قوستاناي اۋدانىنىڭ ورتالىعى زاتوبول كەنتىندە 10 جاسار ۇل بالانى يت تالاپ ءولتىردى. بۇل تۋرالى egemen.kz ءتىلشىسى حابارلادى.
كەشكە بالالارمەن ءۇيدىڭ ماڭايىندا ويناپ جۇرگەن بالا جوعالىپ كەتكەن, ونى اتا-اناسى, تۋىستارى بۇكىل كەنتتى شارلاپ ىزدەگەن. ال ونىڭ ءمايىتىن ءبىر-ەكى كۇننەن سوڭ ءۇيدىڭ ارتىندا عانا 100 مەترگە جەتپەيتىن جەردەن تاۋىپ العان.
سەرگەيدىڭ اناسى ليۋبوۆ اناتولەۆنا: «ءبىز ونىڭ ءجۇزىن كورە المادىق, تابىتقا سالىپ اكەلگەن كۇيى جەرلەۋگە الىپ كەتتى» دەدى. سەرگەيدىڭ وتباسىنا ونىڭ ءمايىتىن تاۋىپ العان پوليتسەيلەر بالانى يت تالاپ ولتىرگەنى تۋرالى عانا ايتقان. ونىڭ بۇگە-شىگەسىن تۋرالى ۇندەمەگەن. ونىڭ قالاي بولعانىن بالانىڭ اتا-اناسى, تۋىستارى ونسىز دا باعامداعان. تۇرعىن ۇيلەردىڭ ماڭايىنان ەلەنا تۋكپكالو دەگەن ايەل «ازيا-ۆەك» جاۋاپكەرشىلىگى شەكتەۋلى سەرىكتەستىگىنەن جەر جالعا العان. وندا ۇستاعان يتتەر بايلانباي, بوس جىبەرىلگەن. ويىن بالاسىنىڭ ول جەرگە قالاي بارىپ قالعانى بەلگىسىز. بالانىڭ ءمايىتىن تاۋىپ العاننان كەيىن, يتتەر اتىپ تاستالعان.
سەرگەيدىڭ اناسى ليۋبوۆ اناتولەۆنا: «مەنىڭ ۇلىم مۇگەدەك, ورتالىق نەرۆ جۇيەسى زاقىمدانعان. ول قورىققان كەزدە كوگەرىپ كەتەتىن, دىبىسى شىقپاي قالاتىن. ول يت تالاعان كەزدە ايقايلاپ, حابار بەرە الماعان. ايتپەسە جان بالاسى ەستىر ەدى عوي» دەيدى. قازىر ول سوتقا دەيىن انىقتاۋ جۇمىستارى ءجۇرىپ جاتىر.
ءنازيرا جارىمبەتوۆا.
دەرەك, سۋرەت: kstnews.kz
