«استانا» سۋپەركۋبوك ءۇشىن ويىندا «قايراتتى» جەڭدى

استانا. 1 ناۋرىز. «استانا» فۋتبول كومانداسى ەلىمىزدىڭ سۋپەركۋبوگى ءۇشىن وتكەن تارتىستا الماتىلىق «قايراتتان» باسىم ءتۇستى. ويىن سوڭىنداعى پەنالتي ارقىلى 3:2 ەسەبىمەن جەڭىسكە جەتكەن ەلوردالىقتار وسىلايشا جاڭا ماۋسىمداعى العاشقى جۇلدەلەرىنە قول جەتكىزدى. بۇل تۋرالى egemen.kz حابارلادى. ويىنعا ەلباسى نۇرسۇلتان نازارباەۆ ارنايى كەلىپ, فۋتبولدى قالىڭ جانكۇيەرمەن بىرگە تاماشالادى. «استانا ارەنادا» وتكەن كەزدەسۋ الماتىلىقتاردىڭ وتكىر شابۋىلىمەن باستالدى. نەبارى 5-مينۋتتا نەناد ەريچ قورعاعان قاقپاعا وقشا اتىلعان جەرار گوۋدى «استانانىڭ» قورعاۋشىلارى دەر كەزىندە توقتاتتى. ارتىنشا باۋىرجان يسلامحان قاۋىپتى ايىپ سوققىسىن ورىنداپ, قارسىلاستارىنىڭ جۇيكەسىنە تاعى ءبىر مارتە شي جۇگىرتتى. دەگەنمەن, ۋاقىت وتە كەلە الاڭعا بوي ۇيرەتكەن استانالىقتار ويىن ورنەگىن وزگەرتىپ, قاتارىنان بىرنەشە شابۋىل ۇيىمداستىردى. قوس تاراپ تا قانشا شابۋىلداعانىمەن نەگىزگى 90 مينۋتتا ەسەپ اشىلمادى. سونداي-اق, جانكۇيەرلەر 15 مينۋتتان تۇراتىن قوسىمشا ەكى كەزەڭدە دە گول كورە المادى. ناتيجەسىندە, جەڭىمپاز ويىن سوڭىنداعى پەنالتي ارقىلى انىقتالىپ, «استانانىڭ» مەرەيى ۇستەم بولدى. بۇل سىندا قاقپاشىلاردىڭ شەبەرلىكتەرىنە وڭ باعا بەرگەن ءجون. سەبەبى, «استانانىڭ» قاقپاشىسى نەناد ەريچ ءۇش بىردەي پەنالتيدى قايتارسا, قارسى كومانداداعى ارىپتەسى ۆلاديمير پلوتنيكوۆ ءبىر مارتە شەبەرلىگىمەن كوزگە ءتۇستى. ايتا كەتەر جايت, ويىنعا شۆەتسيالىق قازى يوناس ەريكسسون تورەلىك ەتتى. برازيليادا وتكەن سوڭعى الەم چەمپيوناتىندا قازىلىق جاساعان مامان استاناداعى ويىندا وتە جوعارى دەڭگەيدە قىزمەت كورسەتتى. ونى 120 مينۋتتان تۇرعان تەكە-تىرەستە نەبارى ەكى سارى قاعازدىڭ تىركەلگەنىنەن بايقاۋعا بولادى. ەكەۋى دە استانالىق فۋتبولشىلاردىڭ ەنشىسىنە جازىلدى. ناقتى ايتساق, مارين انيچيچ (87-مينۋت) پەن ۇلان قونىسباەۆ (111-مينۋت) ەسكەرتۋ الدى. سايىس سوڭىندا جەڭىمپاز كوماندانىڭ كاپيتانى تاڭات نوسەرباەۆقا ەلباسى سۋپەركۋبوكتى تابىس ەتتى. دەگەنمەن, تاڭات ويىنعا قاتىسپاعانىن ايتا كەتەيىك. ونىڭ ورنىنا كوماندانى الاڭعا ابزال بەيسەبەكوۆ باستاپ شىقتى. وسىلايشا قازاق فۋتبولىنىڭ كەزەكتى ماۋسىمى شىمىلدىق ءتۇردى. ەندى 7 ناۋرىز كۇنى فۋتبولدان قازاقستان پرەمەر-ليگاسىنىڭ العاشقى تۋرى وتەدى. قازاقستان سۋپەركۋبوگى 1995 جىلدان بەرى ويناتىلىپ كەلەدى. ءبىر عانا ويىننان تۇراتىن سايىستىڭ العاشقى جەڭىمپازدارى سەمەيلىك «ەلىم-اي» كومانداسى. ماۋسىماشار ويىن سانالاتىن تارتىسقا ەل چەمپيونى مەن قازاقستان كۋبوگىنىڭ يەگەرى قاتىساتىنى بەلگىلى. وتكەن ماۋسىمدا «استانا» پرەمەر-ليگادا توپ جارسا, «قايرات» كۋبوك جولىنداعى جارىستا جەڭىمپاز اتاندى. سۋپەركۋبوك سايىسىندا ەڭ كوپ جەڭىسكە جەتكەن «اقتوبە» كومانداسى (2008, 2010, 2014 جج.). ال «استانا» وسىمەن ەكىنشى رەت جەڭىس تويىن تويلاۋدا. وسىعان دەيىن ەلوردالىق كوماندا 2011 جىلعى ماۋسىمدى جەڭىسپەن باستاعان بولاتىن. ەلامان قوڭىر. دەرەك: egemen.kz. سۋرەت: kff.kz.