استانا. 29 ماۋسىم. ازەربايجان استاناسى – باكۋ قالاسىندا ءى جازعى ەۋروپا ويىندارى اياقتالدى. كەشە 16 كۇنگە سوزىلعان ءدۇبىرلى دودانىڭ جابىلۋ سالتاناتى ءوتتى. بۇل تۋرالى 1news.az حابارلادى.
سالتاناتتى شارا باكۋدەگى وليمپيالىق ستاديوندا ۇيىمداستىرىلدى. وعان 60 مىڭنان استام حالىق جينالدى. سونداي-اق, اتالعان راسىمگە ازەربايجان پرەزيدەنتى يلحام اليەۆ جانە بىرقاتار مەيماندار قاتىستى.
ەۋروپا تاريحىندا قۇرلىق ويىندارى العاش رەت وتكىزىلىپ وتىر. باكۋدەگى الاماندا 50 مەملەكەتتەن كەلگەن 5 730 سپورتشى 253 مەدالدار جيىنتىعىن ساراپقا سالدى. سونداي-اق, ولاردىڭ سپورتتىڭ 20 تۇرىنەن سىنعا تۇسكەنىن ايتا كەتەيىك. ونىڭ ىشىندە 16 سپورت ءتۇرى وليمپيادا باعدارلاماسىنا ەنگىزىلگەن.
بايراقتى باسەكەنىڭ جالپى ەسەبىندە رەسەي سپورتشىلارى توپ جاردى. سولتۇستىك كورشىمىزدىڭ قورجىنىندا 79 التىن, 40 كۇمىس جانە 45 قولا مەدال بار. ال ەكىنشى ورىنعا ازەربايجان سپورتشىلارى تابان تىرەدى. ولار ءوز ەلىندە وتكەن جارىستا 21 التىن, 15 كۇمىس جانە 20 قولا مەدال ەنشىلەدى. ۇزدىك ۇشتىكتى ۇلىبريتانيا تۇيىندەدى (18-10-19).
ءى جازعى ەۋروپا ويىندارىنىڭ مەدالدار جيىنتىعى بويىنشا بەيرەسمي ەسەبىنىڭ ۇزدىك وندىعى
ەلامان قوڭىر.
دەرەك: 1news.kz.
سۋرەت: baku2015.com.
