ەكونوميكالىق ىنتىماقتاستىق   ۇيىمى – قازاقستاندا

كەشە اقوردادا قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆا ەكونوميكالىق ىنتىماقتاستىق جانە دامۋ ۇيىمىنىڭ (ەىدۇ) باسەكەلەستىككە بەيىمدەلۋ جونىندەگى ەۋرازيالىق باعدارلاماسىنىڭ باسشىسى انتونيو سوممامەن جانە وسى ۇيىمنىڭ ءبىر توپ ساراپشىلارىمەن كەزدەستى. مەملەكەتتىك حاتشى 2015 جىل­عى 22 قاڭتاردا داۆوس قالاسىندا 2015-2016 جىلدارعا ارنالعان ەىدۇ-قازاقستان اراسىنداعى جەكە ىنتىماقتاستىق تۋرالى باعدار­لاماعا قول قويىلعانى ەكىجاقتى قارىم-قاتىناستاردىڭ جوعارى دەڭگەيگە جەتكەندىگىنىڭ بەلگىسى ەكەنىن اتاپ ءوتتى. «ءبىز – ەىدۇ-مەن ءدال وسىنداي جەكە باعدارلاماعا جەتكەن العاشقى مەملەكەتپىز جانە مۇنى قازاقستان رەسپۋبليكاسىنىڭ ەىدۇ مۇشەلەرى قاتارىنا ەنۋىنىڭ العاشقى قادامى دەپ ەسەپتەيمىز», دەدى گ.ابدىقالىقوۆا. سونىمەن بىرگە, مەملەكەتتىك حاتشى قازاقستاننىڭ ەىدۇ-مەن ءوزارا بەلسەندى قاتىناس قۇرۋى كەلەشەكتە وسى ۇيىم مۇشەلەرىنىڭ دەڭگەيى مەن قالىپتارىنا جەتۋى سترا­تەگيالىق ماقسات ەكەنىن ايتتى. قازاقستان ەىدۇ-نىڭ قۇرا­مىن­داعى مەملەكەتتەردىڭ ءتاجىري­بەسىن, جاڭا ادىستەرى مەن يننوۆاتسيا­لارىن, نوۋ-حاۋلارىن تولىق پاي­دالانۋعا, ەىدۇ-نىڭ ساراپشىلىق الەۋەتىن ەلىمىزدەگى ەكونوميكالىق ساياساتتىڭ دامۋىن ساراپتاۋعا پايدالانعىسى كەلەتىنىن اتاپ ءوتتى. وڭىردەگى ۇيىممەن تىعىز ىن­تىماقتاسقان العاشقى مەملەكەت رەتىندە قازاقستان ەىدۇ-نىڭ ەۋروپالىق وداققا مۇشە ەلدەرىمەن قاتار, ەۋرازيالىق باسەكەلەستىككە بەيىمدەلۋ باعدارلاماسىنىڭ ورتالىق ازيا باستاماسىنىڭ تەڭ توراعاسى بولدى. كەزدەسۋ بارىسىندا ءبىلىم بەرۋ, دەنساۋلىق ساقتاۋ, جۇمىسپەن قامتۋ جانە الەۋمەتتىك ينتەگراتسيا سالالارىنداعى ماڭىزدى ماسەلەلەر تالقىلاندى. سونداي-اق, گەندەرلىك تەڭدىكتى كۇشەيتۋ مەن ەكونوميكا سالاسىنداعى قىزمەتكە ايەلدەردىڭ تولىق قاتىسۋىنىڭ ارقاسىندا قازاقستاننىڭ باسەكەلەستىك قابىلەتىن كوتەرۋدى كوزدەگەن ەىدۇ-نىڭ باستاماسى جەكە ماسەلە رەتىندە اتاپ ءوتىلدى. مەملەكەتتىك حاتشى ەىدۇ-نىڭ بۇل باستاماسىن قولداپ, باعدارلامانىڭ ورىندالۋى ەلىمىزدەگى ايەلدەر كاسىپكەرلىگىنىڭ دامۋىنا, ەلباسى نۇرسۇلتان نازارباەۆتىڭ «نۇرلى جول» جاڭا ەكونوميكالىق ساياساتى اياسىنداعى جوسپارلانعان اۋقىمدى ينفراقۇرىلىمدىق جوبالارعا ايەلدەردىڭ بەلسەندى قاتىسۋىنا وڭ اسەر ەتەتىنىن ايتتى. تاراپتار ءبىلىم بەرۋ, جۇمىسپەن قامتۋ, كاسىپكەرلىك سالالارىندا گەندەرلىك تەڭدىكتى نىعايتۋ جولىنداعى كەدەرگىلەردى زەرتتەۋ جانە جويۋ, وسى ماسەلەلەر جونىندەگى ۇلتتىق ستاتيستيكانى حالىقارالىق ستاندارتتارعا كەلتىرۋ بارىسىنداعى ءوزارا بىرلەسكەن ءىس-قيمىلدىڭ جاي-كۇيى مەن كەلەشەگىن كەڭ تۇردە تالقىلادى. كەزدەسۋگە ۇلتتىق ەكونوميكا ۆيتسە-ءمينيسترى م.ابىلقاسىموۆا, ءبىلىم جانە عىلىم ۆيتسە-ءمينيسترى ت.بالىقباەۆ, دەنساۋلىق ساقتاۋ جانە الەۋمەتتىك دامۋ ۆيتسە-ءمينيسترى ا.تسوي قاتىستى. جاقسىباي سامرات, «ەگەمەن قازاقستان».