جۇرتشىلىققا ارنالعان دارىستەر

قوستاناي وبلىستىق ارحيۆ جانە قۇجاتتاما باسقارماسىنىڭ ۇجىمى «دوستىق ۇيىندە» جۇرتشىلىققا ءدارىس وقۋعا باستاما كوتەردى. بيىل ەلىمىز ءۇشىن مەرەكەلى جىل. قازاقستان حالقى اسسامبلەياسىنا 20 جىل, كونستيتۋتسيامىزعا 20 جىل تولۋىن, ۇلى جەڭىستىڭ – 70, قازاق حاندىعىنىڭ 550 جىلدىعىن اتاپ وتكەلى وتىر. بۇل توي بولعانىمەن,  قازاقستاندىقتارعا وي سالۋى ءتيىس. وسى مەرەكەلەردىڭ ءمان-ماڭىزى تۋرالى جۇرتشىلىققا كوبىرەك اقپارات بەرۋ ءۇشىن وبلىستىق  ارحيۆ جانە قۇجاتتاما باسقارماسىنىڭ ۇجىمى جىل اياعىنا دەيىن  وسى تاقىرىپتارعا ارنالعان كوپشىلىك دارىستەر وقۋعا باستاما كوتەردى. ونىڭ العاشقىسىن قوستاناي وبلىسىنىڭ مەملەكەتتىك ءارحيۆى باسقارماسىنىڭ باسشىسى, قازاقستان حالقى اسسامبلەياسى عىلىمي-ساراپتاما كەڭەسىنىڭ مۇشەسى, تاريح عىلىمدارىنىڭ كانديداتى ۆالەري ۆيشنيچەنكو «قازاقستان حالقى اسسامبلەياسى: تاريحتىڭ 20 جىلى» اتتى  تاقىرىپقا ارنادى. ءدارىستى جۇزدەن اسا ادام  تىڭدادى. – قاراپايىم ادامدارعا وسى ايتۋلى مەرەكەلەر جونىندە تانىمدىق اقپاراتتار ازدىق ەتۋى مۇمكىن. قازاقستان حالقى اسسامبلەياسى, ەلىمىزدىڭ  كونستيتۋتسيا, ۇلى وتان سوعىسىنداعى ەرلىك پەن قيىن ۋاقىت تۋرالى, قازاق حاندىعى, ەلىمىزدىڭ مەملەكەتتىگى جونىندە قانشاما قىزىقتى اڭگىمەلەر ايتۋعا, دەرەكتەر كەلتىرۋگە بولادى. مىسالى, مەن بۇگىنگى ءدارىسىمدى وقىعاندا كوپتەگەن ارحيۆ ماتەريالدارىن پايدالاندىم. تىڭداۋشىلار  سۇراقتار قويدى, پىكىرلەرىن ايتتى, قىسقاسى, ولار كوپ نارسە ءبىلىپ, كوڭىلدەنىپ قايتتى, – دەدى ۆالەري گەورگيەۆيچ. – مۇنداي دارىستەردىڭ  اركىم ءۇشىن پايداسى مول. مىسالى, دارىستەن تىڭداعان كوپتەگەن مالىمەتتى قايدان وقىپ تاباسىڭ؟ ءبىلىمدى كىسىلەردى  تىڭداۋدىڭ ءوزى ءبىر عانيبەت.  قازاقستانعا سوعىس كەزىندە, ودان بۇرىن جەر اۋدارىلعان ۇلتتاردىڭ كورگەن قيىنشىلىقتارى, ادامدار تاعدىرلارى تۋرالى اڭگىمەنى تولقىماي تىڭداي المايسىڭ, – دەيدى دارىسكە كەلگەن ەرگوشۆوي حولمەتوۆ. الداعى ۋاقىتتا مەرەكەلىك جىلدىڭ تاقىرىپتارى بويىنشا قوستانايلىق عالىمدار, تاريحشىلار,  جازۋشىلار جۇرتشىلىق الدىندا ءدارىس وقيتىن بولادى. قىزىقتى دارىسكە تىڭداۋشى ءاردايىم كەلەدى. ءنازيرا جارىمبەتوۆا, «ەگەمەن قازاقستان». قوستاناي.