ەلباسى نۇرسۇلتان نازارباەۆ «نۇر وتان» بيلەۋشى پارتيا رەتىندە ارقاشاندا حالىقتىڭ مۇڭ-مۇقتاجىن ءبىلىپ, جاقىندىعىن كورسەتۋى كەرەك دەپ ۇدايى ايتىپ كەلەدى. سوندىقتان ەل پرەزيدەنتىنىڭ وتكەن جىلعى جولداۋىندا ايرىقشا ايتىلعان تاپسىرماسى بويىنشا مۇمكىندىكتەرى شەكتەۋلى جاندارعا قولداۋ كورسەتۋ ءۇشىن تاقىرىپتىق قابىلداۋ ۇيىمداستىرىلعان بولاتىن.
«نۇر وتان» پارتياسىنىڭ 16 جىلدىعى قارساڭىندا قوعامدىق قابىلداۋلاردىڭ جۇمىسىن كۇشەيتۋ ماسەلەلەرىنە ارنالعان سەلەكتورلىق وتىرىستا پارتيا توراعاسىنىڭ ءبىرىنشى ورىنباسارى باۋىرجان بايبەك وسىلاي دەدى جانە «نۇر وتان» پارتياسىنىڭ توراعاسى ن.ءا.نازارباەۆتىڭ تاپسىرماسىنا سايكەس پارتيانىڭ ەل تۇرعىندارىنىڭ تۇيتكىلدەرىن شەشۋ باعىتىندا جۇيەلى جۇمىس جۇرگىزىپ كەلە جاتقانىن اتاپ ءوتتى. «241 قوعامدىق قابىلداۋ قىزمەتىنىڭ ارقاسىندا بۇكىل ەل اۋماعىندا حالىقپەن ءوزارا بايلانىس جەلىسى جولعا قويىلىپ, بۇل, تىپتەن, اۋىلعا دەيىنگى ارالىقتاعى ماسەلەلەردى شۇعىل شەشۋگە مۇمكىندىك بەرۋدە», — دەپ ايرىقشا اتادى ول.
سونىمەن قاتار, ب.بايبەك 2014 جىلى مەملەكەتتىك ورگانداردىڭ ءبىرىنشى باسشىلارى مەن دەپۋتاتتاردىڭ جەكە قابىلداۋلارىنىڭ كولەمى الدىڭعى جىلمەن سالىستىرعاندا 7 ەسە كوبەيگەنىن, ءسويتىپ, 26 مىڭعا جۋىقتاعانىن اتاپ كورسەتتى. رەسپۋبليكالىق قابىلداۋداعى ءاربىر 4-ءشى قابىلداۋ مينيسترلەر مەن اگەنتتىك توراعالارىنىڭ قاتىسۋىمەن ۇيىمداستىرىلعان. بارلىق دەڭگەيدەگى اكىمدەر 3 مىڭعا جۋىق قابىلداۋ وتكىزگەن. «جالپىلاي العاندا, بىلتىرعى جىلى ازاماتتاردىڭ 85 مىڭ ءوتىنىمى قارالدى», – دەدى ب.بايبەك. ونىڭ ايتۋىنشا, وتىنىشتەردىڭ تالداما بارىسى قابىلداۋ بارىسىندا كوتەرىلگەن ماسەلەلەردىڭ دەنى الەۋمەتتىك سيپاتتا ەكەنىن كورسەتكەن. ياعني, ادامدار تۇرعىن ءۇي مەن جەر تەلىمىن ءبولۋ, جۇمىسقا ورنالاستىرۋ مەن جالاقىنىڭ تولەنبەۋى, يپوتەكالىق پروبلەمالار مەن شاعىن بيزنەستىڭ ماسەلەلەرى, سونداي-اق, قۇقىق قورعاۋ ورگاندارىنىڭ جۇمىسىنا ارىز-شاعىمدى كوپ ايتاتىنى بەلگىلى بولىپ وتىر. سونىمەن بىرگە, قابىلداۋعا كوپ جاعدايدا جاسى كەلگەندەر, زەينەتكەرلەر, ارداگەرلەر كەلەتىندىگى كولدەنەڭ تارتىلدى. وسى ورايدا ۇلكەندەرگە اسا ىقىلاسپەن كومەك كورسەتىلۋى كەرەك ەكەندىگىن جەتكىزگەن پارتيا توراعاسىنىڭ ءبىرىنشى ورىنباسارى ەڭ جاقسى جوبانىڭ ءبىرى «ارداگەرلەردى ارداقتايىق» ەكەندىگىن نازارعا سالدى.
«ءبىر اي بۇرىن ۇلكەن جينالىس وتكىزگەن بولاتىنبىز. وتكەن جىلى 6000 ارداگەر مەن تىڭ ەڭبەككەرلەرى ەسەپتە بولعان بولسا, قازىرگى ۋاقىتتا ولاردىڭ سانى 5000 شاماسىندا عانا قالدى. ياعني, ءبىز كۇن سايىن ءبىر مايدانگەرىمىزدى جوعالتۋدامىز. سول سەبەپتى, ءبىز ولارعا, ولاردىڭ تۋعان-تۋىستارىنا جوعارى دەڭگەيدە قولداۋ كورسەتۋگە مىندەتتىمىز», – دەپ اتاپ كورسەتتى ب.بايبەك. بۇل تۇرعىدا ول رەسەيدە ارداگەرلەرگە ارنالعان كوپتەگەن سايتتاردىڭ بار ەكەندىگىن ايتا وتىرىپ, بىزدە «قاھارمان.كز» دەپ اتالاتىن جاڭا سايتتىڭ اشىلىپ جاتقانىن, جاۋىنگەرلەرىمىز جونىندە تولىقتاي اقپاراتتى اتالعان سايتتان الۋعا بولاتىنىن جەتكىزدى.
وتىرىس بارىسىندا «ەلەكتروندى پارتيا» جوباسىنىڭ ىسكە اسىرىلۋىنىڭ ناتيجەسىندە ورتالىق جانە جەرگىلىكتى جەرلەردەگى ورگانداردىڭ ءبىرىنشى باسشىلارىنا حالىقتىڭ قولجەتىمدىلىگى ارتىپ كەلە جاتقانى دا اتاپ كورسەتىلدى. جەكە قابىلداۋلار بەينەكونفەرەنتسيالىق بايلانىس ارقىلى ۇيىمداستىرىلىپ, قابىلداۋلارعا تەلەفون نەمەسە ە-پارتيا ارقىلى جازىلۋعا بولاتىندىعى جونىندە مالىمەت بەرىلدى. «اتالعان فۋنكتسيانىڭ ارقاسىندا قاشىقتاعى اۋىلداردىڭ تۇرعىندارى ورتالىق مەملەكەتتىك ورگاندار باسشىلارى مەن پارلامەنت دەپۋتاتتارىنان ءوز سۇراقتارىنا تۇششىمدى جاۋاپتار الا الادى. 50 پوشتا بولىمشەسىندە ەلەكتروندىق قوعامدىق قابىلداۋ پۋنكتتەرى اشىلعان», – دەدى پارتيا توراعاسىنىڭ ءبىرىنشى ورىنباسارى.
بۇدان بولەك, پارتيانىڭ دامۋى جانە تۇرعىندارمەن جۇمىس تيىمدىلىگىن ارتتىرۋ ءۇشىن ىشكى باقىلاۋ مەن ازاماتتار وتىنىمدەرىنە دەر كەزىندە نازار اۋدارتۋ تالابى كۇشەيتىلگەندىگى ايتىلعان باسقوسۋدا ۇستىمىزدەگى جىلى ازاماتتاردى ەڭ كوكەيكەستى ماسەلەلەرى بويىنشا قابىلداۋ توقساندىق نەگىزدە جۇرگىزىلەتىندىگى جاريا ەتىلدى.
ەلميرا ماتىباەۆا,
«ەگەمەن قازاقستان».
