ەۋروپالىق تاجىريبە ەنگىزىلمەك

الماتى قالاسىنىڭ ەمحانالارىندا مەديتسينالىق كومەك كورسەتۋدىڭ جاڭا ءتۇرى قولدانىلماقشى الماتى قالاسىندا اعىمداعى جىلدان باستاپ پاتروناجدى قىزمەتتى قايتا قۇرۋ مەن العاشقى مەديتسينالىق-سانيتارلىق كومەك كورسەتۋ قىزمەتىن جەتىلدىرۋ جونىندەگى العاشقى جوبانى جۇزەگە اسىرۋ جولعا قويىلماق. ول 2015-2017 جىلدارعا جوسپارلانعان. بۇل جوبا دەنساۋلىق ساقتاۋ جانە الەۋ­مەت­تىك دامۋ مينيسترلىگى مەن قر دەنساۋلىق ساقتاۋ سالاسىنا ديپلومنان كەيىنگى تاجىريبەلى مامانداردى دايىنداۋداعى ۇيلەستىرۋشى – قازاق مەديتسينالىق ۇزدىكسىز ءبىلىم بەرۋ ۋنيۆەرسيتەتىنىڭ (قازمۇببۋ) باس­تاماسى. سونداي-اق, الماتى قالاسى دەنساۋلىق ساقتاۋ باسقار­ماسى بۇل جوباعا بەلسەندى قاتى­سۋشىلاردىڭ بىرەگەيى بولىپ تا­بىلادى. جوبانىڭ ماقساتى – تىركەلگەن تۇرعىندارعا ۇزدىك ەۋروپالىق تاجىريبە ترانسفەرى جولىمەن العاشقى مەديتسينالىق-ساني­تارلىق كومەك كورسەتۋ قىزمەتىن جەتىلدىرۋ جانە پاتروناجدى (ۇيىنە بارىپ) جاردەم بەرۋ جۇيەسىن ءتيىمدى ۇيىمداستىرۋ. بۇگىندە قازمۇببۋ-ءى الماتى قالاسى دەنساۋلىق ساقتاۋ باس­قارماسىمەن بىرىگە وتىرىپ, №17 جانە №5 قالالىق ەمحانالاردا بۇل جوبا جۇمىستارىن باستاپ جىبەردى. ىنتىماقتاستىق اياسىندا ەڭ الدىمەن ەمحانالاردىڭ كادرلىق رەسۋرستارىنا ساراپتاما جاسالادى. سونىمەن قاتار, تىركەلگەن تۇرعىندارعا العاشقى مەديتسينالىق-سانيتارلىق كومەك كور­سەتۋ جانە پاتروناجدى جاردەم بەرۋدىڭ جاعدايى, قولدانىستاعى رەگلامەنتتەۋشى قۇجاتتاردىڭ ەۋروپالىق ستاندارتقا سايكەستىگى زەرتتەلەدى. بۇل جۇمىسقا يۋنيسەف جانە JAMK ۋنيۆەرسيتەتىنەن (فينليانديا), داندي ۋنيۆە­ر­سيتەتىنەن ( ۇلىبريتانيا), پاتروناجدى مەدبيكەلەر ينستيتۋتىنان ( ۇلىبريتانيا) شاقىرىلعان شەتەل كەڭەسشىلەرى كوپ كومەك كورسەتۋدە. الماتى قالاسى دەنساۋ­لىق ساقتاۋ باسقارماسىنىڭ, قا­زاق مەديتسينالىق ۇزدىكسىز ءبىلىم بەرۋ ۋنيۆەرسيتەتىنىڭ جانە شەت­ەلدىڭ بەدەلدى مەديتسينالىق ۋني­ۆەرسيتەتتەرىنىڭ جەتەكشى ماماندارىنان قۇرالعان ساراپشىلار توبى ءۇش جىل ۋاقىت ىشىندە الىپ شاھاردىڭ ەمحانالارىندا جۇمىس جاسايدى. مۇندا باستى كوڭىل جالپى پراك­تيكالىق دارىگەرلەر, مەدبيكەلەر جۇمىسىنا, سونىمەن قاتار, پات­روناجدى قىزمەتتى قايتا قۇرۋ­عا بولىنەدى. ەۋروپا ەلدەرىنىڭ ءتا­جىريبەسى تۇرعىندارعا ءتيىمدى مەدي­تسي­نالىق كومەك كورسەتۋدە نەگىزگى جۇمىستى اتقاراتىن جالپى پراكتيكا دارىگەرلەرى مەن ورتا مەديتسينا قىزمەتكەرلەرىنىڭ بىلىكتىلىگىن ارتتىرۋدى باستى نازاردا ۇستاۋدى كورسەتەدى. تەراپەۆتىك مەديتسينا – ول سىرقاتتىڭ دياگنوستيكاسى مەن دۇرىس ەمدەلۋى عانا ەمەس, سونداي-اق, ناۋقاسقا پروفيلاكتيكا ولشەمدەرىن ۇيرەتۋ, ولارعا سالاماتتى ءومىر سالتىن ۇستانۋعا قاتىستى ءتيىستى اقپاراتتاردى بەرۋ بولىپ تابىلادى. مۇنداي العاشقى جوبا شەڭ­بەرىندە قالالىق ەمحانالاردىڭ مەديتسينا قىزمەتكەرلەرىنىڭ ۇزدىكسىز كاسىبي دامۋىنا ارنايى وقۋ باعدارلامالارى جانە دارىگەرلەر مەن مەدبيكەلەرگە جاڭا قىزمەتتىك نۇسقاۋلىق جاسالادى, باقىلاۋ مەن مونيتورينگ ءۇشىن ولاردىڭ جۇمىستارىنىڭ ساپا ينديكاتورى انىقتالادى. سونىمەن بىرگە, جوبا اياسىندا جالپى پراكتيكالىق دارىگەرلەر مەن مەدبيكەلەر جۇمىس ورىندارىندا جانە ءىرى شەتەلدىك ورتالىقتار بازاسىندا دا بىلىمدەرىن جەتىلدىرە الادى. قورىتىندىسىندا ءبىلىمىن جەتىلدىرگەن جالپى پراك­تيكالىق دارىگەرلەر زاماناۋي تالاپتارعا ساي باسەكەگە قابىلەتتى, ءارى سۇرانىسقا يە مامان بولىپ شىعادى. ال جەتىلدىرىلگەن ال­عاش­قى مەديتسينالىق-سانيتارلىق كومەك مودەلى ەلىمىزدىڭ باسقا دا امبۋلاتورلىق-ەمحانالىق مەكە­مەلەرىندە دە پايدالانىلادى. ياعني, جاقىن ۋاقىتتاردا ەلى­مىزدەگى قالا­لىق ەمحانالار مەن اۋداندىق امبۋلاتوريالاردا ۇزدىك ەۋروپالىق تاجىريبەگە ساي مەديتسينالىق قىزمەت كورسەتىلەتىن بولادى. گۇلزەينەپ سادىرقىزى, «ەگەمەن قازاقستان».