فۋتبول. امەريكا كۋبوگى. برازيليا جارتىلاي فينالعا شىعا المادى

استانا. 28 ماۋسىم. فۋتبولدان چيليدە ءوتىپ جاتقان امەريكا كۋبوگى تۋرنيرىندە جارتىلاي فينالعا شىققان كوماندالار بەلگىلى بولدى. وڭتۇستىك امەريكا قۇرلىعىنىڭ چەمپيونى اتاعىن چيلي, پەرۋ, ارگەنتينا جانە پاراگۆاي قۇرامالارى ساراپقا سالادى. بۇل تۋرالى egemen.kz حابارلادى. وتكەن تۇندە شيرەك فينالدىڭ سوڭعى ويىنى وينالدى. الەمنىڭ بەس دۇركىن چەمپيوندارى برازيليا قۇراماسى پاراگۆايمەن سىنعا ءتۇستى. كەزدەسۋدىڭ 15-مينۋتىندا پەنتاكامپەوندار ەسەپ اشقان بولاتىن. مەرگەندىگىمەن كوزگە تۇسكەن – روبينو. پاراگۆاي قۇراماسى تەك 72-مينۋتتا عانا تارازى باسىن تەڭەستىرۋگە مۇمكىندىك تاپتى. ناتيجەسىندە ويىننىڭ نەگىزگى ۋاقىتى 1:1 ەسەبىمەن تەڭ اياقتالدى. سونداي-اق, قارسىلاستار قوسىمشا ەكى تايمدا دا تەڭ ويىن ورنەگىن كورسەتىپ, جەڭىمپاز ماتچتان كەيىنگى پەنالتي ارقىلى انىقتالدى. بۇل سىندا پاراگۆايدىڭ مەرەيى ۇستەم بولىپ, 4:3 ەسەبىمەن باسىم ءتۇستى. ايتا كەتەيىك, برازيليانىڭ شابۋىلشىسى نەيمار بۇل ويىندا كومانداسىنا كومەكتەسە المادى. سەبەبى, ول توپتىق كەزەڭدەگى كولۋمبياعا قارسى ويىندا ورەسكەل ءتارتىپ بۇزعانى ءۇشىن الاڭنان قۋىلدى. كەيىن فۋتبولشىنىڭ ءتارتىبى فيفا مىنبەرىندە تالقىلانىپ, نەيمار ۇلتتىق قۇراما ساپىنداعى 4 ويىننان الاستاتىلدى. شيرەك فينالداعى وزگە ويىندارعا كەلەر بولساق, چيلي ۋرۋگۆايدى 1:0 ەسەبىمەن جەڭدى. سونداي-اق, پەرۋ بوليۆيادان 3:1 ەسەبىمەن باسىم ءتۇستى. ال ارگەنتينا-كولۋمبيا ماتچى نەگىزگى ۋاقىتتا تەڭ اياقتالدى (0:0). ويىن سوڭىنداعى پەنالتيدە مەسسي باستاعان ارگەنتينالىقتار دالدىك تانىتىپ, 5:4 ەسەبىمەن جەڭىسكە جەتتى. قۇرلىق چەمپيوناتى 4 شىلدەدە اياقتالادى. ەلامان قوڭىر. دەرەك: egemen.kz. سۋرەت: eurosport.ru.