نەپال مەملەكەتى ءزىلزالادان قۇربان بولعانداردى ەسكە الدى

استانا. 27 ماۋسىم. نەپالدا 8 مىڭنان استام ادامنىڭ ءومىرىن جالماعان جويقىن ءزىلزالانىڭ باسىلعانىنا 2 اي بولدى. جەر سىلكىنىسىنەن قۇربان بولعانداردى ەسكە الۋ شاراسىنا جينالعاندار كوككە اۋە شارلارىن ۇشىردى. بۇل تۋرالى 24.kz حابارلادى. ءزىلزالادان زارداپ شەكەندەردى ەسكە الۋ شاراسىنا مىڭداعان تۇرعىن كوشەگە شىعىپ, اۋە شارلارىن ۇشىردى. نەپال تۇرعىنى شيلۋ ادحيكەري: «ءار قازا تاپقان مارقۇمعا ارناپ اۋە شارىن سامعاتتىق. ءبىز بۇل شارانى قۇربانداردىڭ رۋحىن ەسكە الۋ ءۇشىن وتكىزىپ وتىرمىز. وسى شارلاردى ۇشىرۋ ارقىلى 8,5 مىڭ مارقۇمنىڭ جانى جاي تابادى دەپ ويلايمىز», – دەدى. ەستەرىڭىزدە بولسا, نەپالدا 25 ءساۋىر مەن 12 مامىر ارالىعىندا بولعان جەر سىلكىنىستەرىنەن 8832 ادام كوز جۇمىپ, 22 مىڭنان استامى جاراقات العان بولاتىن. ال ون مىڭداي وتباسى ءۇي-كۇيسىز قالدى. ايتا كەتەيىك, بۇگىندە جەرگىلىكتى بيلىك وكىلدەرى 4,5 ميلليارد دوللار كولەمىندە ساداقا جينادى. ەندى وسى اقشانى تاراتىپ بەرۋ نەمەسە ماقساتتى جۇمساۋ ۇلكەن پروبلەماعا اينالۋدا. سەبەبى نەپالدا جەمقورلىق ۋشىعىپ, شەتەلدىكتەردەن جينالعان قاراجاتتى قارا باسىنىڭ قامى ءۇشىن پايدالانۋ كوبەيگەن. سوعان قاراماستان جەرگىلىكتى بيلىك قارجىنى جاڭا قۇرىلعان مەملەكەتتىك ورگان مەن ۇيلەستىرۋ ورتالىقتارى ارقىلى تەڭ ءبولىپ ۇلەستىرۋگە ۋادە بەرىپ وتىر. تالعات رايىمبەك. دەرەك, سۋرەت: 24.kz.