ايگىلى كومپوزيتور قۇرمەتىنە

استانا قالاسىندا ۇستىمىزدەگى جىلدىڭ 29 ناۋرىزى مەن 1 ءساۋىرى ارالىعىندا نۇرعيسا تىلەنديەۆ اتىنداعى «ءوز ەلىم» اتتى IV مۋزىكالىق فەستيۆال وتەدى. ايگىلى كۇيشى, داۋلەسكەر دومبىراشى, كومپوزيتور, ديريجەر,  قازاق كسر جانە كسرو حالىق ءارتىسى, حالىق قاھارمانى نۇرعيسا تىلەنديەۆ – قازاقتىڭ ۇلتتىق ونەرى مەن مادەنيەتىنە وشپەس ءىز قالدىرعان قايراتكەر. بيىلعى جىلى 1 ساۋىردە ايگىلى كومپوزيتوردىڭ تۋعانىنا 90 جىل تولادى. وسىعان بايلانىستى ەگەمەن ەلىمىزدىڭ مادەني ومىرىندە ەلەۋلى وقيعالار وتكىزىلمەك. وسى كەشەندى شارالاردىڭ بەت­اشارى رەتىندە ەلوردادا 29 ناۋرىز – 1 ءساۋىر ارالىعىندا نۇرعيسا تىلەنديەۆ اتىنداعى «ءوز ەلىم» اتتى ءداستۇرلى فەستيۆال وتەدى. وعان قازاقستاننىڭ بارلىق وڭىرلەرىنەن جانە رەسەيدەن كاسىبي ورىنداۋشىلار, دومبىراشىلار جانە ديريجەرلەر قاتىسادى. 16-35 جاس ارالىعىنداعى تالانتتى ونەر ساڭلاقتارى قاتىساتىن بايقاۋ كلاسسيكالىق ۆوكال (ەرلەر مەن ايەلدەر), دومبىرا جانە ديريجەرلەر سايىسى دەپ بولىنەتىن 3 اتالىم بويىنشا ەكى اينالىمدا, «شابىت» جانە كونگرەسس-حولل سارايلارىندا وتكىزىلەدى. فەستيۆالعا قاتىسۋشىلار استانا قالا­سى اكىمىنىڭ كۋبوگىن ساراپقا سالادى.  سونىمەن بىرگە, جارىس جەڭىمپازىنا گران-پري جانە ەكىنشى, ءۇشىنشى ورىنداردى العان جۇلدەگەرلەرگە «فەستيۆال لاۋرەاتى» اتاقتارى بەرىلەدى. ايتۋلى مۋزىكا مەرەكەسى 1 ءساۋىر كۇنى كونگرەسس-حولل سارايىندا وتەتىن گالا-كونتسەرتكە ۇلاسادى. وعان بيبىگۇل تولەگەنوۆا, التىنبەك قورازباەۆ, نۇرعالي ءنۇسىپجانوۆ جانە باسقا ونەر ساڭلاقتارى قاتىسادى. «ەگەمەن-اقپارات».