بانك حالىق سەنىمىندە

سارسەنبى كۇنى استانادا “تۇرعىن ءۇي قۇرىلىس جيناق بانكى” اق ەلوردالىق فيليالىنىڭ ديرەكتورى مۇرات ءشارىپوۆ جۋرناليستەرمەن ءباسپاسوز بريفينگىن وتكىزدى. اتالمىش كەزدەسۋ بانكتىڭ قۇرىلعانىنا جەتى جىل تولۋىنا ارنالدى. – بانكتىڭ نەگىزگى مىندەتى – ەلىمىزدە تۇرعىن ءۇي قۇرىلىس جيناق جۇيەسىن دامىتۋ جانە وتانىمىزدىڭ بارلىق وڭىرلەرىندە جۇرتشىلىقتىڭ نەعۇرلىم اۋقىمدى بولىگىنىڭ تۇرعىن ءۇي قۇرىلىس جيناق جۇيەسىنە تەڭ دارەجەدە قول جەتىمدىلىگىن قامتاماسىز ەتۋ, سونىمەن قاتار جەكە قاراجاتتارى مەن بانكتىڭ تۇرعىن ءۇي زاەمدارىنىڭ ەسەبىنەن تۇرعىن جاعدايلارىن جاقسارتۋ ءۇشىن ساپالى بانكتىك قىزمەت كورسەتۋ بولىپ تابىلادى. نارىققا قاتىسقان جەتى جىل ىشىندە بانك جاقسى ناتيجەلەرگە قول جەتكىزدى. 2003 جىلعى كورسەتكىشتەرمەن سالىستىرعاندا, 7 جىل ىشىندە جاسالعان شارتتار سانى 2010 جىلعى 1 شىلدەگە دەيىنگى ەسەپ بويىنشا 302 ملرد. تەڭگەگە دەيىن كوبەيدى. وسى ۋاقىتقا دەيىن بانكتىڭ باسپانا جاعدايىن جاقسارتۋعا باعىتتالعان بارلىعى 21 مىڭ تۇرعىن ءۇي قۇرىلىس جيناق جۇيەسىنىڭ قاتىسۋشىسىنا 66 ملرد. تەڭگەنى قۇرايتىن الدىن الا, ارالىق جانە تۇرعىن ءۇي زاەمدارىن بەرگەنىن ايتا كەتۋ كەرەك. ەلىمىزدەگى تۇرعىن ءۇي قۇرىلىس جيناق جۇيەسى ءونىمىنىڭ تانىمالدىعىن ارتتىرۋدىڭ نەعۇرلىم جوعارى قارقىنى بانك اكتيۆتەرىنىڭ جىل سايىن ورتا ەسەپپەن 97 پايىزعا ءوسۋ جاعدايىندا 7 جىل ىشىندە 77,5 ملرد. تەڭگەگە دەيىن كوتەرىلدى. كرەديتتىك قارجى ۇستىمىزدەگى جىلى 50 ملرد. تەڭگەدەن اسىپ ءتۇسىپ, 2010 جىلدىڭ 1 شىلدەسىندە 55 ملرد. تەڭگەنى قۇرادى. بۇل دەپوزيتتىك بازانىڭ 32,1 ملرد.تەڭگەگە دەيىن وسۋىنە اسەر ەتتى. سونىمەن بىرگە, نەگىزىنەن العاندا, بانكتىڭ جالعىز اكتسيونەرى تولىقتىرعان قاراجاتتاردان تۇراتىن بانكتىڭ مەنشىكتى كاپيتالى 2010 جىلعى 1 شىلدەدەگى ەسەپ بويىنشا 18,7 ملرد. تەڭگەنى قۇرادى. جۇرتشىلىق اراسىندا تۇرعىن ءۇي قۇرىلىس جيناق جۇيەسىنىڭ تالاپتارى بويىنشا تۇسىنىكتەمە بەرۋ جۇمىستارى – تاۋەلسىز ماركەتينگتىك ساۋالنامالاردىڭ ناتيجەلەرى بويىنشا بۇگىندە ءبىزدى حالىقتىڭ 64 پايىزى بىلەدى, 184 مىڭنان استام ادامنىڭ بانك كليەنتتەرى بولىپ تابىلۋى دا حالىقتىڭ سەنىمىنىڭ كورىنىسى, – دەپ اتاپ ءوتتى باق وكىلدەرىنە بەرگەن سۇحباتىندا مۇرات تۇرسىن ۇلى. سونداي-اق, ول بۇگىنگى تاڭدا بانكتىڭ نەگىزگى تالاپتارى تىكەلەي تۇرعىن ءۇي قۇرىلىس جيناق جۇيەسى ارقىلى زاەم بەرۋ تەتىكتەرىن كوزدەيتىن ەلىمىزدەگى تۇرعىن ءۇي قۇرىلى­سى­نىڭ 2008-2010 جىلدارعا ارنالعان مەم­لەكەتتىك باعدارلاماسىن جۇزەگە اسىرۋدىڭ نەگىزگى وپەراتورى بولىپ تابىلاتىندىعىن دا نازاردان تىس قالدىرمادى. ءابدىراحمان قىدىربەك.