قورقىنىشتان ءۇمىت باسىم بولعانى ءجون

ساۋدا-ساتتىق ماسەلەسى – ەكونوميكانىڭ كۇرەتامىرى. ساۋدا-ساتتىق جاپاتارماعاي جۇرگىزىلەتىن جابايى الىس-بەرىس ەمەس, حالىقارالىق نورمالارعا نەگىزدەلگەن, ارنايى تالاپتار مەن ەرەجەلەرى بار اۋقىمدى قۇبىلىس. بۇل تۇرعىدا الدىمەن اۋىزعا الىپ, تىلگە تيەك ەتەرىمىز  1995 جىلى قۇرىلعان حالىقارالىق ساۋدا ەرەجەلەرىن ليبەراليزم  پرينتسيپتەرىنە قاراي رەتتەيتىن حالىقارالىق ەكونوميكالىق ۇيىم – دۇنيە­جۇزىلىك ساۋدا ۇيىمى.  نەگىزگى ماقساتى حالىقارالىق ساۋدانى دامىتۋ بولىپ تابىلاتىن بۇل ۇيىمعا بۇگىندە الەمنىڭ الدىڭعى قاتارلى بىرنەشە ەلدەرى مۇشە. ءبىزدىڭ ەلىمىز مەملەكەت باس­شىسىنىڭ باستاماسىمەن بۇل ۇيىمعا كىرۋ جۇمىسىن 1996 جى­لى باستاعان بولاتىن. بۇل ۇيىمعا مۇشە بولۋدا قازاقستان الەمدىك ساۋدا ۇيىمىنىڭ تالاپتارى مەن نورمالارىنا سايكەس تاۋار ءوندىرۋ مەن قىزمەت كورسەتۋدىڭ ىشكى جاعدايلارىنا وزگەرتۋلەر ەنگىزۋ ارقىلى ەكونوميكانىڭ  تۇراقتى دامۋىنا جاعداي جاساۋ, قازاقستاندىق تاۋارلاردىڭ  الەمدىك ساۋدا كەڭىستىگىنە كىرۋ مۇمكىنشىلىگىن الۋىن ماقسات ەتتى.  سونداي-اق, ەلىمىزدەگى  شاعىن جانە ورتا بيزنەستىڭ نارىقتىق اياسى كەڭەيىپ, ەۋروپاعا, شىعىس ازياعا تاۋاردى ەركىن وتكىزىپ, ونى ساتۋعا مۇمكىندىك اشىلادى. قازاقستان الەمدىك ساۋدانىڭ ەليتاسىنا كىرەدى. ەلىمىزگە سىرتقى كاپيتالداردىڭ كوپتەپ كەلۋى قامتاماسىز ەتىلەدى, شەتەل ينۆەستيتسيالارىنىڭ كولەمى ارتادى. قازاقستاندىق تاۋارلار مەن ونىمدەر دسۇ-عا مۇشە ەلدەردىڭ نارىعىنا قول جەتكىزە الادى. تۇتىنۋشىلاردىڭ باعا­سى جاعىنان ارزان, توزىمدىلىك جاعىنان ساپالى تاۋار­لارعا قول جەتكىزۋ مۇمكىندىگى اشىلادى, ال وتاندىق ءونىم وندىرۋشىلەرگە باسەكەلەستىك اسەرى مول بولادى. بىراق, دامۋدى, ال­دىڭعى قاتارلى 30 ەلدىڭ قاتا­رىنا قوسىلۋدى ماقسات ەتكەن ەلىمىزگە ىرگەلى ۇيىمدارعا مۇشە بولۋدان قورقۋدىڭ ەمەس, باتىل ەنۋدىڭ بەرەرى مول. ويتكەنى, بۇل, ياعني دۇنيەجۇزىلىك ساۋدا ۇيىمىنا مۇشە بولۋ – ۋاقىت تالابى. بۇعان دەيىن كورشىمىز قىرعىزستان كيىمدەرىنىڭ قىتاي, تۇرىك تاۋارلارىمەن بىرگە قازاقستان نارىعىنا دەندەي ەنىپ, حالىقتىڭ تۇتىنۋى تاۋارىنا اينالعاندىعىن كورىپ تاڭعالاتىن بولساق, ءبىزدىڭ ەلىمىزگە دە ساپالى ءوز ونىمدەرىمەن وزگە ەلدەردىڭ نازارىن اۋدارىپ, حالىقتىڭ سۇرانىسىن وتەيتىن كەزەڭ كەلدى. بۇل ءبىزدىڭ ەلدىڭ كاسىپكەرلەرىنە ۇلكەن جاۋاپكەرشىلىك جۇكتەيدى. گۇلسارا جولداسباەۆا, ش.ەسەنوۆ اتىنداعى كاسپي مەملەكەتتىك تەحنولوگيالار جانە ينجينيرينگ ۋنيۆەرسيتە­تى­نىڭ پرورەكتورى, ەكونوميكا عىلىمدارىنىڭ كانديداتى. اقتاۋ.