تاياۋدا اقتاۋ قالاسىنداعى كولىك قوزعالىسى وتە كوپ سانالاتىن جولداردىڭ ءبىرى – «اقتاۋ» ويىن-ساۋىق جانە امبەباپ ساۋدا ورتالىعى الدىندا كۇتپەگەن وقيعا بولدى. سول جەردى كەسىپ ءوتىپ, سولعا بۇرىلعان كولىكتىڭ جولاۋشىلار جاق ارتقى ەسىگى شالقاسىنان اشىلىپ كەتتى دە, ىشىنەن كىشكەنە بالا جەرگە ءدۇرس ەتىپ قۇلادى. ونىڭ جولدىڭ قاق ورتاسىنا قاراي دومالاي جونەلگەنى كورسەتىلگەن بەينەبايان ءاپ-ساتتە سايتتاردى «جارىپ» جىبەردى. لەزدە كولىكتى توقتاتقان جۇرگىزۋشى ەر ادام مەن بۇعان دەيىن بالانىڭ جانىندا وتىرعان ايەل جۇگىرىپ ءتۇسىپ, جول ورتاسىنا قاراي جانۇشىرا ۇمتىلدى دا قىز بالانى كوتەرىپ كولىكتەرىنە قايتا سالىپ الىپ, زاۋلاي جونەلەدى.
وسىدان سوڭ-اق ولاردىڭ سوڭىندا كەلە جاتقان كولىكتىڭ بەينەتىركەۋىشىنە جازىلىپ قالعان وقيعا تۋرالى انىق-قانىعىن ءبىلىپ, تەكسەرۋ جۇرگىزۋدى قۇقىق قورعاۋ ورىندارى ءوز مويىندارىنا العان بولاتىن. كەشە جۇرتشىلىقتىڭ جاعاسىن ۇستاتىپ قانا قويماي, كىشكەنە قىز بالانىڭ جاعدايى قالاي ەكەن دەگەن سۇراق مازالاعان تۇرعىندار وقيعانىڭ ودان ارعى ءمان-جايىنا قانىقتى. ماڭعىستاۋ وبلىستىق ىشكى ىستەر دەپارتامەنتى ءباسپاسوز قىزمەتىنىڭ حابارلاۋىنشا, كولىكتى باسقارىپ وتىرعان اكەسى مەن جانىنداعى اناسى ەكى جاسار قىزدى دەرەۋ اۋرۋحاناعا جەتكىزگەن. دارىگەرلەر قىزدىڭ بەتى جىرىلعانمەن, ايتارلىقتاي اۋىر جاراقات الماعاندىعىن, ياعني دەنى ساپ-ساۋ ەكەندىگىن ايتقان. ال «جولاۋشىلار تاسىمالداۋ ەرەجەلەرىن ساقتاماۋ» بابى بويىنشا اكىمشىلىك جاۋاپقا تارتىلعان قىزدىڭ اكەسىنە – كولىكتىڭ جۇرگىزۋشىسىنە ايىپپۇل سالىنعان.
«قىرىق جىل قىرعىن بولسا دا, اجالدى ولەدى» دەگەن وسى ەكەن. ايتپەسە, انشەيىندە كولىكتەر ءبىر-بىرىنە ءيىن تىرەسە سىعىلىسىپ, ۇنەمى ابىر-سابىر بولىپ جاتاتىن جول ءۇستى سول ساتتە كولىكتەن بوس جاتتى! سوڭىندا كەلە جاتقان ماشينالار دا توقتاپ ۇلگەرگەن نەمەسە ونى قىزىل باعدارشام «تەجەي» تۇرعان. اقتاۋلىق قىز بالا ءبىر اجالدان وسىلاي امان قالدى, بىراق بۇل جولاۋشىلار, اسىرەسە, بالا تاسىمالداۋ كەزىندەگى جۇرگىزۋشىلەردىڭ جاۋاپكەرشىلىگى مەن مۇقياتتىلىعىن قاتاڭ ساقتاۋعا ساباق بولسا جاقسى...
ماڭعىستاۋ وبلىسى.
