سۋرەت: aqshamnews.kz
كوڭىل قۇلازىپ, جان جابىرقاپ تۇر. كەشە عانا قاتار جۇرگەن, ارامىزدا جۇرە بەرەتىندەي كورىنگەن قوس تۇلعانىڭ بىرىنەن كەيىن ءبىرى اتتانۋى ءومىردىڭ وتكىنشى ەكەنىن سەزىندىردى. ەكەۋىن توعىستىرعان ورتاق قاسيەت – حالىققا دەگەن شەكسىز سۇيىسپەنشىلىك پەن ونەرگە دەگەن ادالدىق. اس-اعا تەاتردان شەتتەپ كەتكەندە ارامىزعا قوسىپ, قارا شاڭىراققا قايتا ورالۋىنا سەبەپشى بولعان دا ەسمۇحان اعا ەدى. اس-اعادان ۇزاق ۋاقىتقا اجىراعىسى كەلمەگەندەي, ماۋسىم ايىندا تولار 85 جاس مەرەيتويىنا دا قارايلاماي, زامانداسىنىڭ سوڭىنان كەتە باردى.
ەس-اعا – سانالى عۇمىرىن ساحناعا ارناعان, تەاتر ونەرىن تىرشىلىك كوزىنە اينالدىرىپ, ۇلت رۋحىمەن ۇشتاستىرعان تۇلعا. اعانىڭ ەڭبەك جولىنا كوز جۇگىرتسەك, قايراتكەرلىك بولمىسى ايقىن كورىنەدى. ۇزاق جىلدار بويى سەمەي تەاترىن باسقارىپ, ءوسىپ-وركەندەۋىنە ولشەۋسىز ۇلەس قوستى. جيىرما جىل بويى تاباندى ەڭبەك ەتىپ, تەاتردى جاڭا دەڭگەيگە كوتەردى, كورەرمەننىڭ ىقىلاسىنا بولەنگەن رۋحاني ورداعا اينالدىردى. بۇل – ۇيىمداستىرۋشىلىق قابىلەتتىڭ مىقتىلىعى, ونەرگە دەگەن شىنايى جاناشىرلىقتىڭ بەلگىسى. ال 2001–2013 جىلدار ارالىعىندا قازاق ونەرىنىڭ قارا شاڭىراعىن باسقارۋى – ونىڭ كاسىبي بىلىكتىلىگىنىڭ وسكەنىنىڭ, بەدەلىنىڭ بيىكتەگىنىنىڭ دالەلى.
ەسمۇحان وباەۆ – ون ءۇش جىل بويى مۇحتار اۋەزوۆ اتىنداعى اكادەميالىق تەاتردىڭ ۇجىمىنا جەتەكشىلىك ەتىپ, ۇلتتىق تەاتر ونەرىنىڭ دامۋىنا ءوز قولتاڭباسىن قالدىرا العان جان. بۇل كەزەڭدە دە ول شىعارماشىلىق ىزدەنىسىن توقتاتپاي, ساحنا مادەنيەتىنىڭ بيىكتەۋىنە ىقپال ەتتى. ەس-اعا تەك باسشى ەمەس, ول – ۇستاز, ول – تاربيەشى, ونەردىڭ جاناشىرى ەدى. ونىڭ تاربيەسىن كورگەن جاس اكتەرلەر مەن رەجيسسەرلەر بۇگىنگى تاڭدا قازاق ساحناسىنىڭ ماقتانىشىنا اينالدى. وزدەرى دە «وباەۆتىڭ شاكىرتتەرىمىز» دەگەندى ماقتانىپ ايتادى.
ەس-اعا سابيدەي سەنگىش, بالاداي اڭعال, اڭقاۋلىعى دا بار, وزىنە عانا جاراساتىن ەرەكشە مىنەزدىڭ يەسى-ءتىن. قاراپايىم ەدى, سونىسىمەن ۇلى ەدى. كۇنى كەشە عانا ورتامىزدا جۇرگەن جايدارى ادام تۋرالى «ەدى...» دەپ وتكەن شاقتا جازۋ قانداي اۋىر! ول اس-اعانى جالعىزسىراتقىسى كەلمەدى مە ەكەن؟
جاڭا قويىلىمداردى كورۋگە تەاتر زالىنىڭ ورتاسىمەن اسىقپاي, اياڭداپ كەپ كورەرمەن اراسىنداعى ءوز ورىندارىنا جايعاساتىن, قاۋقىلداسا كورىسىپ, ادەمى ازىلدەرىمەن قاعىسا جونەلىپ, كەڭكىلدەي كۇلەتىن ەسمۇحان اعانىڭ بەينەسى ەشقاشان كوز الدىمىزدان كەتپەس! قوش, اسىل اعا!
بەكجان تۇرىس,
اكتەر
