ءسۇنيات مىرزەكەن ۇلى – سەمەي قالاسىنىڭ تۋماسى. الماتى مەملەكەتتىك مەديتسينا ينستيتۋتىن جالپى مەديتسينا ماماندىعى بويىنشا تامامداعان. دوكتورلىق ديسسەرتاتسياسىن ءساتتى قورعاپ, عىلىمدا دا جەتىستىككە قول جەتكىزدى. ۋرولوگيا عىلىمي ورتالىعىنىڭ رەكونسترۋكتيۆتى-پلاستيكالىق ۋرولوگيا بولىمشەسىن 35 جىلدان بەرى ابىرويمەن باسقارىپ كەلەدى. بارار جەر, باسار تاۋى قالماي, جالعىز ءۇمىتىن ارقالاپ كەلگەن تالاي ناۋقاستى اياققا تۇرعىزدى, ساۋىعۋىنا سەبەپشى بولدى. ورتالىق ەلىمىزدەگى جەتەكشى ۇيىمداردىڭ ءبىرى سانالادى. جىل سايىن 4 مىڭنان استام ناۋقاسقا جوعارى تەحنولوگيالىق-مەديتسينالىق كومەك كورسەتەدى. پاتسيەنتتەردىڭ شامامەن جارتىسىنا جۋىعى الماتى قالاسىنىڭ تۇرعىنى بولسا, وزگە وبلىستاردان كەلەتىندەردىڭ ۇلەسى دە سول شامادا.
ءسۇنيات مىرزەكەن ۇلى وسى ورتالىقتا ءجۇرىپ, 10 مىڭنان اسا وپەراتسيا جاسادى. ورتالىقتىڭ مىقتاپ قالىپتاسۋىنا, دامىپ, وركەندەۋىنە ۇلەس قوستى. وتاندىق ۋرولوگيادا لاپاروسكوپيا, ەندوبەينەحيرۋرگيا سىندى جاڭا ءتاسىلدى ەنگىزۋگە باستاماشى بولدى. ەسەسىنە, وپەراتسيانىڭ وسى ءتۇرى ءداستۇرلى, اشىق, جاراقاتقا بايلانىستى وپەراتسيالاردى, ەڭ كۇردەلى سانالاتىن رەكونسترۋكتيۆتى, پلاستيكالىق وپەراتسيالاردى الماستىردى. بۇل دەگەنىڭىز – ۋرولوگيادا بۇرىن كۇردەلى سانالعان بىرنەشە وپەراتسيانى ەندى تىلىك جاساماي ەمدەۋگە بولادى دەگەن ءسوز. ول گيدرونەفروز, وپەراتسيادان كەيىنگى ستريكتۋرالار, ياتروگەندى, وپەراتسيا كەزىندەگى ءزار شىعارۋ جولدارىنىڭ جاراقاتتارى سىندى باسقا دا كۇردەلى پاتولوگيالارعا ارنالعان بىرنەشە كۇردەلى رەكونسترۋكتيۆتى حيرۋرگيالىق ادىستەردى ازىرلەپ, كلينيكالىق تاجىريبەگە ەنگىزدى.
پروفەسسور س.قۇسىمجانوۆ ءوزىنىڭ جىلدار بويى جيعان تاجىريبەسىن جاستارعا ۇيرەتۋدى كاسىبي مىندەتى ءارى اعالىق ىزەتى سانايدى. سودان بولار, ءبىر وپەراتسيادان ەكىنشىسىنە كىرىپ, تۇتاس ءبولىمنىڭ جۇمىسىنا جاۋاپتى بولسا دا, جوعارى بىلىكتى ۋرولوگتەردى دايارلاۋعا ۇلەس قوسىپ كەلەدى. ول – ەۋروپالىق ۋرولوگتەر قاۋىمداستىعىنىڭ, حالىقارالىق ۋرولوگتەر قوعامىنىڭ, رەسەي ۋرولوگيا عىلىمي قوعامىنىڭ مۇشەسى. ەسىمى كلينيكالىق پاندەر جونىندەگى مەديتسينا ساراپشىلارىنىڭ حالىقارالىق تىزىلىمىنە ەنگەن. س.قۇسىمجانوۆ ازىرلەگەن حيرۋرگيالىق ارالاسۋلار مەن لاپاروسكوپيالىق ەمشارالار ەلىمىزدىڭ 27 پاتەنتىمەن, 4 حالىقارالىق پاتەنتپەن راستالعان.
ماماندىعىنا ادال دارىگەردىڭ مەديتسيناداعى وسىنداي باستامالارىنا, قاجىرلى ەڭبەگىنە ساي العان اتاق, ماراپاتى دا جەتەدى. دەگەنمەن, س.قۇسىمجانوۆتىڭ ءوزى ەڭ ۇلكەن ماراپات حالىقتىڭ باتاسى, العىسى, ىقىلاسى ەكەنىن ۇنەمى ايتىپ وتىرادى. ەلگە سىيلى دارىگەر وتاندىق مەديتسينانىڭ كوكجيەگىن كەڭەيتۋدەن ءالى كۇنگە قول ۇزگەن جوق. وسىنىڭ بارلىعىن سارالاپ, قورىتا كەلىپ, ءسۇنيات قۇسىمجانوۆتى «قازاقستاننىڭ ەڭبەك سىڭىرگەن قايراتكەرى» قۇرمەتتى اتاعىنا ابدەن لايىق دەپ سانايمىز.
مۇراتبەك مۇحامبەكوۆ,
ەكونوميكا عىلىمدارىنىڭ دوكتورى, پروفەسسور
