ەلباسى عىلىمي-كلينيكالىق ورتالىقتا بولدى

استانا. 27 ناۋرىز. مەملەكەت باسشىسى جامبىل وبلىسىنا ساپارى بارىسىندا كارديوحيرۋرگيا جانە ترانسپلانتولوگيا عىلىمي-كلينيكالىق ورتالىعىندا بولدى. بۇل تۋرالى akorda.kz حابارلادى. ەلباسى مەكەمەنىڭ جۇمىسىمەن تانىسىپ, قىزمەتكەرلەرىمەن اڭگىمەلەستى. ورتالىقتىڭ جاڭا عيماراتى وسى مەكەمەنىڭ ءوز قاراجاتىنا بەس جىل ىشىندە تۇرعىزىلدى. عىلىمي-كلينيكالىق ورتالىقتىڭ 7 بولىمشەسى, وتا جاسايتىن بولمەلەرى, زاماناۋي قۇرىلعىلارمەن جابدىقتالعان جان ساقتاۋ ءبولىمى جانە جايلى پالاتالارى بار. مۇندا جۇرەككە جاسالاتىن وتانىڭ بارلىق ءتۇرىن قامتيتىن كەڭ اۋقىمدى قىزمەت كورسەتىلەدى. بۇل مەكەمە سونداي-اق, ەلدەگى كوپتەگەن مەديتسينالىق وقۋ ورىندارى ءۇشىن كارديوحيرۋرگيا, كارديوانەستەزيولوگيا جانە جان ساقتاۋ سالالارى بويىنشا ماماندار دايارلاۋعا ارنالعان كلينيكالىق بازا قىزمەتىن اتقارادى. جامبىل وبلىسىنىڭ تۇرعىندارى ءۇشىن 2013 جىلدان بەرى تەگىن مەديتسينالىق كومەك كورسەتىلەدى. وزگە وڭىرلەردىڭ تۇرعىندارى تەگىن كومەكتى گوسپيتالداۋ بيۋروسىنىڭ پورتالى ارقىلى الۋىنا بولادى. بۇگىندە كونسۋلتاتيۆتىك-ەمدىك كومەك الۋ ءۇشىن ازاماتتار ەلدىڭ باسقا وڭىرلەرىنەن, سونداي-اق, وزبەكستان مەن قىرعىزستاننان كەلىپ, وسى ورتالىق قىزمەتىنە جۇگىنۋدە. ەلامان قوڭىر. دەرەك: akorda.kz. سۋرەت: ztgzt.kz.