جارىستى گرەك-ريم كۇرەسى شەبەرلەرى باستادى. وكىنىشكە قاراي, ءبىرىنشى كۇنى بوزكىلەمدە بەلدەسكەن نۇرزات قابدارقىموۆ (55 كگ), سايفوللا قۇرمان (63 كگ), قاھارمان قيسىمەتوۆ (77 كگ) كورەرمەن قاتارىن تولىقتىردى.
35 جاستاعى نۇرسۇلتان تۇرسىنوۆ (87 كگ) تۇساۋكەسەر كەزدەسۋىندە وڭتۇستىك كورەيانىڭ وعىلانى سەۋنگحۆان ءليدى ەش قينالماي جىققانىمەن, جارتىلاي فينالدا 20 جاستاعى جەرگىلىكتى جاس دارىن اسان جانىشەۆتان ويسىراي جەڭىلدى. قانداسىمىز قولا مەدال باسەكەسىندە تۇرىكمەنستاندىق داۆلەتمۇرات بايراموۆتى ۇتىپ, جەڭىس تۇعىرىنا كوتەرىلدى.
كەلەسى كۇنى تاعى بەس سالماق دارەجەسىنىڭ جۇلدەلەرى ساراپقا سالىندى. سولاردىڭ اراسىنان فينالعا تەك الماتبەك امانبەك (72 كگ) شىقتى. قىتايلىق دونجۋ لي مەن قىرعىز امانتۇر يسمايىلوۆتى جولىنان ىعىستىرعان قانداسىمىز شەشۋشى باسەكەدە جاستار اراسىنداعى الەم چەمپيوناتىنىڭ ءفيناليسى, ازيا چەمپيونى, يراندىق موحامماد دجاۆاد رەزايمەن كۇش سىناستى. سىن ساعاتتا بورانبەك قوڭىراتوۆتىڭ شاكىرتى ءوزىن جاقسى قىرىنان تانىتتى. قارسىلاسى العا ۇمتىلعان ساتتە قارىمتا شابۋىلعا جۇگىنگەن ول ونى جىعىپ الدى دا, استىندا تىرپ ەتكىزبەي ۇستادى. الماتبەك – ازيا چەمپيونى!
جارتىلاي فينالدا جەڭىلىس تاپقان يبراگيم ماگومادوۆ (82 كگ) پەن يسلام ەۆلوەۆ (97 كگ) قولا مەدال ءۇشىن كۇرەستى. يبراگيم اسا شيەلەنىستى باسەكەدە قىتايلىق رۋي ءليۋدى ەكى ۇپاي ايىرماشىلىعىمەن ۇتسا, يسلام وڭتۇستىككورەيالىق مينحۋ ءليدى 1 مينۋت 27 سەكۋندتا تاس-تالقانىن شىعاردى. ەربول كاماليەۆ (60 كگ) يراندىق ءالي ابدوللاح احمادي ۆافادان ۇتىلىپ, بەسىنشى ورىندى قاناعات تۇتتى.
ال قىزدار اراسىندا سىنعا تۇسكەن ءجاميلا باقبەرگەنوۆا (72 كگ) مەن زەينەپ بايانوۆا (53 كگ) العاشقى اينالىمنان اسا المادى. سونداي-اق شۇعىلا ومىربەك (55 كگ), نيلۋفار رايموۆا (57 كگ), ۆيكتوريا حۋساينوۆا (59 كگ), ايجان ءسۇيدۋوۆا (65 كگ) تۇساۋكەسەر كەزدەسۋلەرىندە جەڭىلىستىڭ كەرمەك ءدامىن تاتتى. مارال تاڭىربەرگەنوۆا (50 كگ) مەن ەلەنا شالىگينا (68 كگ) دا شۋ دەگەننەن ءسۇرىندى.
بىشكەكتە ونەر كورسەتكەن 10 بۇرىمدىمىزدىڭ ەكەۋى عانا جارتىلاي فينالعا دەيىن جەتتى. 76 كگ سالماقتاعى گۇلمارال ەركەباەۆا وڭتۇستىك كورەيانىڭ وكىلى ەۋنجۋ حۆاندى قاپى قالدىرىپ, قولا مەدال ەنشىلەدى. 62 كگ سالماق دارەجەسىندە باق سىناعان تىنىس دۇبەك ءۇشىنشى ورىنعا تالاستا موڭعوليالىق تسەرەنشيمەد سەكحەنىڭ وسال تۇسىن تابا المادى. ءسويتىپ, قىرعىزستان ساپارىنان ايەلدەر قۇراماسى جالعىز جۇلدەمەن ورالدى.
ازيا چەمپيوناتىن ەركىن كۇرەس شەبەرلەرى قورىتىندىلادى. ءادي سەرىك ۇلى (65 كگ), سانجار دوسجانوۆ (70 كگ), مەرەي بازارباەۆ (57 كگ), داۋلەت ەرگەش (79 كگ) جانە بەكزات ۇركىمباي (97 كگ), اسىل ايتاقىن (61 كگ), ەرنۇر نۇرعازى (74 كگ) جۇلدەگەرلەر قاتارىنان كورىنە المادى. جاستارى 30-دىڭ بەل ورتاسىنا تاياعان ساقا سپورتشىلار بولات ساقاەۆ (86 كگ) پەن ازامات داۋلەتبەكوۆ (92 كگ) جارتىلاي فينالعا دەيىن ەركىن جەتتى. وسى مەجەگە بولات مۋكۋل داحيادان ء(ۇندىستان) 6:12 ەسەبىمەن, ازامات موحاممادموبين ازيميدەن (يران) 0:6 ەسەبىمەن ۇتىلدى. ءۇشىنشى ورىن باسەكەسىندە قىدىر سايپۋددينوۆ (باحرەين) ب.ساقاەۆقا سان سوقتىرسا, ا.داۋلەتبەكوۆ تاكاشي يشاگۋرونى (جاپونيا) ەش كۇمانسىز ۇتتى.
بىلتىر 18 جاسقا تولعان شاعىندا وزىنەن ءبىر-ەكى جاس ۇلكەن بالۋانداردى تەگىستەي ۇتىپ, الەم چەمپيونى (U20) اتانعان ەدىگە قاسىمبەك (125 كگ) ەرەسەكتەر دۋىنا بيىل عانا قاتىسا باستادى. ەدىگە تۇساۋكەسەر كەزدەسۋىندە نامبارداگۆا باتباياردان (موڭعوليا) باسىم ءتۇستى. كەلەسى كەزەڭدە توكيو وليمپياداسىنىڭ قولا, پاريج وليمپياداسىنىڭ كۇمىس جۇلدەگەرى, الەمنىڭ ءۇش دۇركىن چەمپيونى, ازيا ويىندارىنىڭ جەڭىمپازى, قۇرلىق چەمپيونى ءامىر حوسسەين زارەمەن (يران) كۇش سىناستى. ەدىگە ازۋلى قارسىلاسپەن باتىل كۇرەسىپ, مىنەزدى بالۋان ەكەنىن بايقاتتى. بۇل باسەكەدە زارەنىڭ مەرەيى ۇستەم بولعانىمەن, قازاقتىڭ ءور مىنەزدى ۇلىنىڭ ونەرى كوپشىلىكتىڭ كوڭىلىنەن شىقتى. قولا مەدال جولىنداعى بەلدەسۋدە بۋحەەەردۋن بۋحەەەردۋندى (قىتاي) ۇتتى. ءسويتىپ, ەلىمىزدىڭ ەركىن كۇرەس شەبەرلەرى سارى قۇرلىقتىڭ باستى دوداسىن ەكى قولامەن قورىتىندالادى.
