ۆلاديسلاۆ كوسارەۆ,
پارلامەنت ءماجىلىسىندەگى «حالىقتىق كوممۋنيستەر» دەپۋتاتتىق فراكتسياسىنىڭ جەتەكشىسى:
– كوممۋنيستىك پارتيا اتالعان شەشىمدى تولىقتاي قولدايدى. ەلدەگى باستى سايلاۋ ناۋقانىنا الدىن الا دايىندىق جاساۋ اعىمداعى الەۋمەتتىك-ەكونوميكالىق ساياساتتىڭ كوكەيكەستى ماسەلەلەرىن شەشۋگە دەن قويۋعا مۇمكىندىك بەرەدى.
بۇعان قوسارىم, قازاقستان حالقى اسسامبلەياسى كەڭەسىنىڭ باستاماسى كوكەيكەستىلىگىمەن جانە دەر كەزىندە كوتەرىلۋىمەن ەرەكشەلەنەدى. بۇل ورايدا, قازاقستان پرەزيدەنتى نۇرسۇلتان نازارباەۆ قابىلداعان ۇستىمىزدەگى جىلدىڭ 26 ساۋىرىندە كەزەكتەن تىس پرەزيدەنتتىك سايلاۋ وتكىزۋ تۋرالى شەشىمنىڭ دە ماڭىزدىلىعىن اتاپ كورسەتكەن ءجون.
ازات پەرۋاشەۆ,
پارلامەنت ءماجىلىسىنىڭ دەپۋتاتى, قازاقستاننىڭ «اق جول» دەموكراتيالىق پارتياسىنىڭ توراعاسى:
– الەمدىك قارجى-ەكونوميكالىق تۇراقسىزدىق جاعدايىندا بىزگە جۇدىرىقتاي جۇمىلىپ, بارلىق كۇش-ءجىگەرىمىزدى الەمدىك داعدارىستىڭ ەل ەكونوميكاسىنا تەرىس ىقپالىن ەڭسەرۋ جولىندا جۇمساعانىمىز ماڭىزدى.
قالىپتاسقان جاعدايدا قازاقستانعا سالماقتى جانە, ءبىرىنشى كەزەكتە, ۇلتتىق مۇددەگە باعدارلانعان ساياسات جۇرگىزۋ اسا قاجەت. وسى سەبەپتەرگە بايلانىستى ءبىزدىڭ پارتيا ەلباسى نۇرسۇلتان نازارباەۆتىڭ الداعى 26 ساۋىردە كەزەكتەن تىس پرەزيدەنتتىك سايلاۋ وتكىزۋ تۋرالى شەشىمىن تولىقتاي قولدايدى.
عاني قاسىموۆ,
قازاقستان پاتريوتتارى پارتياسىنىڭ توراعاسى:
– «قازاقستان پاتريوتتارىنىڭ پارتياسى» مەملەكەت باسشىسى نۇرسۇلتان نازارباەۆتىڭ 2015 جىلى كەزەكتەن تىس پرەزيدەنتتىك سايلاۋ وتكىزۋ تۋرالى شەشىمىنە قولداۋ بىلدىرەدى. اتالعان ماسەلەنىڭ وزەكتىلىگى قالىپتاسقان كۇردەلى حالىقارالىق جاعدايعا بايلانىستى الدەنەشە ەسە ارتا تۇسەدى. قازىرگى كەزدە الەمنىڭ تۇكپىر-تۇكپىرىندە تۋربۋلەنتتى, ياعني تەربەلىستى جاعدايلار ۋشىعا ءتۇسىپ وتىر. وسى سەبەپتى ءبىز ءوز وتانىمىزدىڭ قاۋىپسىزدىگىن قامتاماسىز ەتۋگە كۇش سالۋىمىز كەرەك. تاعى دا قايتالاپ ايتايىن, بۇگىنگىدەي حالىقارالىق كۇردەلى كەزەڭدە مۇنىڭ ماڭىزى وتە زور.
سەرىك سۇلتانعالي,
«بىرلىك» ساياسي پارتياسىنىڭ توراعاسى:
– قازاقستان رەسپۋبليكاسىنىڭ ازاماتى, «بىرلىك» ساياسي پارتياسىنىڭ جەتەكشىسى رەتىندە مەن مەملەكەت باسشىسى نۇرسۇلتان نازارباەۆتىڭ كەزەكتەن تىس پرەزيدەنتتىك سايلاۋ وتكىزۋ تۋرالى شەشىمىن تولىقتاي قولدايمىن. قازاقستاننىڭ كوپۇلتتى حالقىنىڭ تىنىشتىعى مەن بىرلىگى – ءبىز ساقتاۋعا ءتيىستى ءنومىرى ءبىرىنشى ماسەلە.
ەكىنشى ماسەلە, قارجى-ەكونوميكالىق داعدارىسقا بايلانىستى. مۇندايدى الدىن الا بولجاعان مەملەكەت باسشىسىنىڭ وكىمىمەن ۇلتتىق قور قۇرىلسا, بۇگىندە ول قالىپتاسقان جاعدايدان كوپ قينالماي شىعۋعا مۇمكىندىك بەرەتىن قاۋىپسىزدىك «جاستىقشاسى» بولىپ تابىلادى. قىسقاسى, بارلىعى دا تىنىشتىق پەن بەيبىتشىلىك ءۇشىن جاسالىپ جاتقان شارۋالار.
ەرلان سىدىقوۆ,
ل.ن.گۋميلەۆ اتىنداعى ەۇۋ رەكتورى:
سىرتقى سىن-قاتەرلەرگە توتەپ بەرۋ ءۇشىن بارلىق مەملەكەتتىك ورگاندار, عىلىمي ۇيىمدار جانە بارشا حالىق قابىلدانعان جوسپارلار مەن باعدارلامالاردى جۇزەگە اسىرۋ جولىندا توپتاسىپ, كۇش بىرىكتىرۋى كەرەك. ءبىز عىلىمي ورتا وكىلدەرى مەن ستۋدەنتتەر قاۋىمى قابىلدانعان شەشىمدى تولىق قولدايتىنىمىزدى جاريا ەتەمىز.
ياعني, ەلباسىنىڭ كەزەكتەن تىس پرەزيدەنتتىك سايلاۋ وتكىزۋ جونىندەگى شەشىمىن ەلىمىزدىڭ عىلىمي ورتا وكىلدەرى تولىقتاي قولدايدى دەگەن ءسوز. ەل پرەزيدەنتىنىڭ شەشىمى حالىقتىڭ مۇددەسىنەن تۋىنداپ وتىر. سوندىقتان ونى جۇزەگە اسىرۋ تۇراقتى دامۋ ۇستىندەگى ەكونوميكاسى كۇشتى مەملەكەتتىڭ ماڭىزدى قادامى بولادى دەپ سەنەمىز.
ەندريۋ كاچينس,
اقش-تىڭ ستراتەگيالىق جانە حالىقارالىق زەرتتەۋلەر ورتالىعىنىڭ ديرەكتورى:
– مەن قازاقستان پرەزيدەنتىنىڭ كەزەكتەن تىس پرەزيدەنتتىك سايلاۋدى بيىل وتكىزۋ تۋرالى شەشىمىن دۇرىس دەپ ەسەپتەيمىن. ويتكەنى, وزدەرىڭىز قاراڭىزدار, ەل توڭىرەگىندە جانە تۇتاستاي ەۋرازيا وڭىرىندە ميعا قونبايتىن وقيعالار ورىن الىپ جاتىر. رەسەي مەن ۋكرايناداعى جاعداي, سونداي-اق, مۇنايعا الەمدىك باعانىڭ تومەندەۋى ەكونوميكاعا تەرىس ىقپال ەتۋدە.
وسى تۇرعىدان كەلگەندە, قازاقستان تۇراقتىلىقتى, ءوسۋ مەن دامۋدى قامتاماسىز ەتە ءبىلدى. سوندىقتان كەزەكتەن تىس پرەزيدەنتتىك سايلاۋ وتكىزۋ مەرزىمىن تاعايىنداۋ – وتە دۇرىس شەشىم.
الەسساندرو لۋنديني,
يتاليا جوعارى گەوساياسي زەرتتەۋلەر ينستيتۋتىنىڭ عىلىمي قىزمەتكەرى:
– ءىس جۇزىندە قازىرگى كەزدە ەلدىڭ ساياسي جانە ەكونوميكالىق تۇراقتىلىعىن كەپىلدەندىرۋ قاجەتتىگى بايقالادى. بۇل كەزەڭ, گەوساياسات تۇرعىسىنان كەلگەندە, وتە كۇردەلى جانە قازاقستان ءۇشىن وزگە ەلدەردە بولىپ جاتقانداي ءتۇرلى اۋىرتپالىقتارعا سەبەپ بولۋى ىقتيمال.
سوندىقتان كەزەكتەن تىس پرەزيدەنتتىك سايلاۋدى بيىل وتكىزۋ تۋرالى شەشىم ەلگە ول مۇقتاج بولىپ وتىرعان تۇراقتىلىق كەپىلدىگىن بەرە الادى عوي دەپ ويلايمىن. وسىعان سايكەس, قازاقستان قالىپتاسقان كۇردەلى كەزەڭدى ەڭسەرەتىنى كۇمانسىز. بۇعان قوسا, قابىلدانعان بارلىق باعدارلامالار تابىستى اياقتالادى دەۋگە تولىق نەگىز بار.
