ورتالىق كوممۋنيكاتسيالار قىزمەتىندە «قازاقستان تەمىر جولى» ۇك» اق ۆيتسە-پرەزيدەنتى رومان سكليار مەن كومپانيانىڭ كولىكتىك لوگيستيكاسىن دامىتۋ ورتالىعى فيليالى ديرەكتورىنىڭ ورىنباسارى ابدۋر-راشيد ساكەنوۆ ءباسپاسوز ءماسليحاتىن وتكىزدى. وندا «قازاقستاننىڭ ترانزيتتىك الەۋەتىن ارتتىرۋ, ۇلتتىق كولىكتىك-لوگيستيكالىق ينفراقۇرىلىمدى ءتيىمدى دامىتۋ» تاقىرىبىندا اڭگىمە قوزعالدى.
«نۇرلى جول» مەملەكەتتىك باعدارلاماسى اياسىندا ۇلتتىق كولىكتىك-لوگيستيكالىق ينفراقۇرىلىمدى دامىتۋ – قازاقستان اۋماعىنداعى ترانزيتتىك جۇك اعىنىن تارتۋعا قولايلى جاعداي جاساۋعا مىندەتتەيدى. «بۇل تاپسىرمانى ورىنداۋ ماقساتىندا وتكەن جىلى بىرقاتار جوبالار ىسكە قوسىلىپ, پايدالانۋعا بەرىلدى. اتاپ ايتقاندا, 13 ستانسا مەن 32 جول ايرىعىنان تۇراتىن جەزقازعان-بەينەۋ تەمىرجول جەلىسى سالىندى. جول پايدالانۋعا بەرىلگەن ۋاقىتتان باستاپ 3 ملن. توننا جۇك دىتتەگەن جەرىنە وسى جاڭا جەلى ارقىلى جەتكىزىلدى. 900-دەن استام جۇك پويىزى وتكىزىلدى. قازاقستان, تۇرىكمەنستان, يران ارقىلى وتەتىن وزەن-بەرەكەت-گورگان جاڭا تەمىرجول جەلىسى تابىستى جۇمىس ىستەپ جاتىر. ۇستىمىزدەگى جىلى بولاشاق-سەرحەتياكا شەكارالىق بەكەتى ارقىلى 1 ملن. توننادان استام جۇك تاسىمالداندى», دەدى ول.
ونىڭ سوزىنە قاراعاندا, قۇرعاق پورت, لوگيستيكالىق جانە يندۋستريالىق ايماق, سونىمەن قاتار «قورعاس-شىعىس قاقپاسى» اەا ينفراقۇرىلىمى نىساندارىنىڭ قۇرىلىسى بەلگىلەنگەن كەستە بويىنشا جۇرگىزىلىپ جاتىر ەكەن. بۇگىنگى تاڭدا اتالمىش جوبانى جۇزەگە اسىرۋعا 75 قاتىسۋشى تىركەلىپتى. ارنايى ەكونوميكالىق ايماق نىساندارىن جۇزەگە اسىرۋعا الەمدەگى ءىرى كومپانيالاردى تارتۋ شارالارى جالعاسىن تاۋىپ جاتىر. ال, ەلىمىزدىڭ ەكسپورتتىق الەۋەتىن دامىتۋدا باتىس ءوڭىردىڭ كولىكتىك جۇيەسىن جەتىلدىرۋگە زور كوڭىل بولىنۋدە. جىلىنا 3 ميلليون توننا جۇك وڭدەۋ قۋاتى بار ءۇش جاڭا جۇك تەرمينالىن اشۋ ارقىلى اقتاۋ تەڭىز پورتىنىڭ الەۋەتىن ارتتىرىپ, كاسپي بويىنداعى جۇك تاسىمالىنىڭ 25 پايىزىن قامتۋعا بولادى. قۇرىق تەڭىز پورتىنان جىلىنا 4 ملن. توننا جۇك وڭدەيتىن پاروم كەشەنىنىڭ قۇرىلىسى باستالىپتى. بيىلعى جىلى بورجاقتى-ەرساي جاڭا تەمىرجول جەلىسىن پايدالانۋعا بەرۋ ارقىلى جاعالاۋداعى يندۋستريالىق جوبالاردىڭ ينفراقۇرىلىمدىق نەگىزى جاسالادى ەكەن. ەلدىڭ ترانزيتتىك الەۋەتىن ارتتىرۋ, تاسىمالداۋ ۇدەرىسىنىڭ تيىمدىلىگىن كوتەرۋ, الماتى-شۋ تەمىرجول تەلىمىنىڭ تاسىمالداۋ ۋاقىتىن قىسقارتۋ ماقساتىندا ەكىنشى تەمىرجول جەلىسىنىڭ قۇرىلىسى دا باستالىپ كەتىپتى. وسىنى ايتقان ابدۋر-راشيد ساكەنوۆ, تاياۋ بولاشاقتا استانا اۋەجايىندا ۇشۋ-قونۋ الاڭىن قايتا جاراقتاندىرۋ مەن جاڭا تەرمينال قۇرىلىسىن جۇزەگە اسىرۋ جوسپارلانىپ وتىرعانىن جەتكىزدى. ءباسپاسوز ءماسليحاتى سپيكەرلەرىنىڭ سوزىنە يلانساق, بۇل قولعا الىنعان كولىكتىك ينفراقۇرىلىمدى دامىتۋ شارالارى ەلىمىزدىڭ ترانزيتتىك الەۋەتىن دامىتۋعا قولايلى جاعداي تۋعىزىپ, ەكونوميكالىق ءوسىمدى قامتاماسىز ەتەدى.
نۇرباي ەلمۇراتوۆ, «ەگەمەن قازاقستان».
