بيۋدجەت قارجىسى قاتاڭ باقىلاۋدا

نەمەسە اقىلى جولداردا جەڭىل كولىكتەر تەگىن ءجۇرۋى ابدەن مۇمكىن استانادا «نۇرلى جول» باعدارلاماسىن ىسكە اسىرۋ ماقساتىندا قارالعان بيۋدجەت قاراجاتىن ءتيىمدى جۇمساۋ جانە وعان باقىلاۋ ورناتۋ بويىنشا ماجىلىستەگى «نۇر وتان» پارتياسى فراكتسياسى جانىنداعى كوميسسيانىڭ وتىرىسى ءوتتى. جيىنعا ءماجىلىس دەپۋتاتتارى, بىرقاتار مينيسترلىكتەردىڭ, ۇلتتىق كومپانيالاردىڭ لاۋازىمدى تۇلعالارى جانە «سامۇرىق-قازىنا» ءال-اۋقات قورى مەن «بايتەرەك» حولدينگىنىڭ وكىلدەرى قاتىستى. جيىندى اشقان ءماجىلىس دەپۋتاتى, «نۇر وتان» پارتيا­سى فراكتسياسى جەتەكشىسىنىڭ ورىن­باسارى نۇرتاي سابيليانوۆ «يندۋستريالىق, ەنەرگەتيكالىق ينفراقۇرىلىمداردىڭ دامۋى, شاعىن جانە ورتا بيزنەستى قولداۋ», سونداي-اق, «كولىك-لوگيستيكالىق ينفراقۇرىلىم» تاقىرىپتارى بويىنشا كەڭىنەن اڭگىمە وربىتە كەلىپ, وسى باعىتتاردا ەلىمىز بو­يىنشا جۇزەگە اسىرىلىپ جاتقان ءىرى جوبالارعا توقتالدى. سونداي-اق, ول بيۋدجەت قار­جىسىن ءتيىمدى جۇمساۋ جانە ونى باقىلاۋ جونىندەگى «نۇر وتان» پارتياسى فراكتسياسى جانىنداعى كوميسسيانىڭ كاسىپ­كەرلىك سۋبەكتىلەرىمەن ءوڭىر­لەردە جۇرگىزگەن جۇمىسىنىڭ ناتيجەسىندە انىقتالعان كەيبىر تۇيتكىلدەرگە توقتالدى. ونىڭ ايتۋىنشا, نەسيە سوماسىنىڭ مالىمدەلگەن كولەمى 50 پايىزعا قىسقارۋى, م ۇلىكتىك كەپىلدىكتىڭ تومەن باعالانۋى, بانكتەردىڭ كاسىپكەرلەر ءوتىنىش­تەرىن قاراۋ مەرزىمىنىڭ ۇزاقتىعى وزەكتى ماسەلە بولىپ تۇر. سون­داي-اق, بانكتەر تالاپ ەتەتىن قۇجات پاكەتتەرىنىڭ كوپتىگى دە كاسىپكەرلەردىڭ قولىن بايلاۋدا. بۇعان قوسا, نۇرتاي سابيليانوۆ مەملەكەت باسشىسى نۇرسۇلتان نازارباەۆتىڭ تاپسىرماسىمەن بانكتەردىڭ پروبلەمالىق نەسيەلەر قورىنىڭ جارعىلىق كاپيتالىن ۇلعايتۋعا قاراستىرىلعان 250 ملرد. تەڭگە ۇكىمەتتىڭ رەزەرۆىن كوبەيتۋگە بولىنگەنىن جەتكىزە كەلىپ, «كوميسسيا ۇلتتىق بانكتەن پروبلەمالىق نەسيەلەر جونىندە اقپارات سۇراعانىندا, ولار بۇل اقپاراتتار بانك قۇپياسى قاتارىنا جاتاتىندىعىن ايتادى. وسىعان بايلانىستى ەكىنشى دەڭگەيلى بانكتەر تۋرالى زاڭعا وزگەرىستەر ەنگىزۋدى جوسپارلاۋدامىز. ءبىز مۇنى باستاما ەتىپ كوتەرەمىز», – دەدى. ەلباسى باستاماسىمەن ەلى­مىز­دە جۇزەگە اسىرىلىپ جاتقان جوبالاردىڭ جۇمىسى مەن ولاردى قارجىلاندىرۋدىڭ تەتىكتەرى جانە بيۋدجەتتەن بولىنگەن قا­راجاتتاردىڭ جاراتىلۋ بارىسى جان-جاقتى باياندالعان بۇل وتىرىس بارىسىندا ءماجىلىس دەپۋتاتى مۇحتار تىنىكەەۆ, ينۆەستيتسيالار جانە دامۋ ءمينيسترىنىڭ ءبىرىنشى ورىنباسارى جەڭىس قاسىمبەك جانە تاعى باسقالار ءسوز سويلەدى. جيىندا بەلگىلى بولعانداي, ينۆەستيتسيالار جانە دامۋ مي­نيسترلىگى اقىلى جولداردا جەڭىل كولىكتەردى تەگىن جۇرگىزۋ ءىسىن قولعا الۋدا. بۇل جونىندە ۆيتسە-مينيستر جەڭىس قاسىمبەك: – اقىلى جولدار بويىنشا بۇگىن ماسەلە كوتەرمەدىك, دەگەنمەن, مەن ۇلكەن حابار ايتقىم كەلىپ وتىر. «استانا – بۋراباي» تاجىريبەسىنەن كورىپ وتىرمىز, 80-85 پايىز پايدانى جۇك كولىكتەرى مەن اۆتوبۋستار تۇسىرەدى. ءبىز بولاشاقتا اقىلى جولدارمەن جەڭىل كولىكتەردى تەگىن جۇرگىزۋىمىز مۇمكىن. تەك جۇك كولىكتەرىنەن اقى الاتىن بولامىز. مەنىڭشە, بۇل قيسىندى بولار ەدى. ەگەر دەپۋتاتتار كەلەسى سەسسيادا قولداسا, زاڭناماعا ءتيىستى وزگەرىستەر ەنگىزۋگە دايىنبىز, – دەدى. باسقوسۋ سوڭىندا «يندۋ­س­تريالىق, ەنەرگەتيكالىق ينفرا­قۇرىلىمداردىڭ دامۋى, شاعىن جانە ورتا بيزنەستى قولداۋ» جانە «كولىك-لوگيستيكالىق ينفرا­قۇرىلىم» باعىتتارى بويىنشا بيۋدجەتتىك قارجىلاردىڭ جۇم­سالۋىنا قاتىستى ارالىق قورى­تىندى شىعارىلدى. جولدىباي بازار, «ەگەمەن قازاقستان».