ەڭبەكتەن تاپقان باقىتىن

تىنىمسىز ەڭبەكتىڭ ارقاسىندا ابىرويعا كەنەلگەن جان كوپ. سولاردىڭ ءبىرى – س.سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ پروفەسسورى, ەكونوميكا عىلىمدارىنىڭ دوكتورى قارلىعاش الەنوۆا. قايرات پەن قاجىرلىلىقتى ومىرىنە ارقاۋ ەتكەن قارلىعاش تولەۋبايقىزى بار عۇمىرىن ۇرپاق تاربيەلەۋ ىسىنە ارناپ, ءبىر ۇيىمدا تاپجىلماي قىرىق جىل ابىرويلى قىزمەت ەتىپ كەلەدى. الدىمەن كافەدرا مەڭگەرۋ­شىسى, كەيىن اعا عىلىمي قىزمەت­كەر اتانىپ, ودان سوڭ دوكتورلىق ديسسەرتاتسياسىن قورعاعان ق.الەنو­ۆانىڭ ۇلاعاتتى ۇستاز رەتىندە جازعان عىلىمي ەڭبەكتەرىنىڭ قۇندىلىعى مەن قاجەتتىلىگى ءوز الدىنا. ستۋدەنتتەردىڭ بىرنەشە بۋىنىن تاربيەلەپ ۇشىرعان ول ءالى كۇنگە دەيىن ماگيسترانتتار مەن دوكتورانتتاردى دا ءبىلىم نارىمەن سۋسىنداتىپ كەلەدى. ومىرلىك سەرىگىمەن دە وسى ۋني­ۆەر­سيتەتتە تانىسادى. كوكشە وڭىرىندە دۇنيەگە كەلىپ, وقۋ, ەڭبەك جولىن اقمولا جەرىندە وتكىزگەن جۇبايى قالىمبەك زەينۋللين ۇلكەن ادامگەر­شى­لىك يەسى, كىسىلىگى مەن كىشىلىگى مول, تالاپتى, الدىنا قويعان ماقساتىنا تاباندىلىقپەن جەتە بىلگەن ازامات ەدى. قالىمبەك شەگىر ۇلىنىڭ الاڭداماي عى­لىم­مەن اينالىسۋىنا, فاكۋلتەت دەكانى لاۋازىمىنا دەيىن جوعارىلاپ, ابىرويلى قىزمەت اتقارۋىنا جۇبايىنىڭ قوسقان ۇلەسى قوماقتى ەدى. جۇرەگىندە ىزگىلىك, جۇزىندە مەيى­رىم شۋاعى ۇيالاعان جان­­- دار­­دىڭ وتباسىن عالىمدار وت­­باسى دەپ اتاۋ­عا ابدەن بولادى. جول­دا­سىنان ەرتە ايىرىلسا دا, جاققان وتىن وشىرمەي, شاڭىراعىن شايقالتپاي, بالالارىن ءبىلىمدى ازاماتتار ەتىپ تاربيەلەۋمەن بىرگە, قارلىعاش تولەۋبايقىزى ولاردىڭ دا عى­لىم جولىندا جوعارى جەتىس­تىكتەرگە جەتۋىنە بارىنشا ىق­پال ەتتى. بۇگىندە قىزى ريمما  دونداعى روستوۆ قالاسىندا سۋسلوۆ اتىنداعى مەملەكەتتىك ۋنيۆەرسيتەتتىڭ فيلوسوفيا-ەكونوميكا فاكۋلتەتىن ۇزدىك ءبىتىرىپ, ماسكەۋ قالاسىندا لومونوسوۆ اتىنداعى مەملە­كەت­تىك ۋنيۆەرسيتەتتە اسپيرانتۋرانى ءتامامداپ, كانديدات­تىق, كەيىن دوكتورلىق ديسسەر­تاتسيا­سىن قورعاسا, ونىڭ جۇبايى, ياعني كۇيەۋ بالاسى عاني سا­عيەۆ ماسكەۋدىڭ تاۋ-كەن ينستيتۋتىنىڭ اسپيران­تۋراسىن بىتىرگەن, تەحنيكا عى­لىمدارىنىڭ كانديداتى. ولار­دىڭ قىزى ازيا مەن كۇيەۋ بالاسى مۇرات تا جوعارى ءبىلىمدى ماماندار, عىلىمي دارەجەلەرى بار. ۇلى عالىم انگليادا وقىسا, كىشى قىزى سوفيا – وقۋ وزاتى. ۇلكەن ۇلى رۋسلان – زاڭ ماگيسترى, كەدەن پودپولكوۆنيگى. ونىڭ ۇلكەن قىزى جاننا ل.ن.گۋمي­لەۆ اتىنداعى ەۋرازيا ۇلتتىق ۋنيۆەرسيتەتىنىڭ ساياسات­- تانۋ فاكۋلتەتىن, كەيىن ماگيس­تراتۋرانى بىتىرگەن. قازىر س.سەي­فۋللين اتىنداعى قازاق اگروتەحنيكالىق ۋنيۆەر­سيتە­تىندە فيلوسوفيا كافەدراسىندا اسسيستەنت بولىپ قىز­مەت اتقارادى. اجەسىنىڭ ءارىپ­تەسى, كىشى ۇلى رۇستەم بولسا, اكە جولىن قۋعان ينجەنەر-مەحانيك, ونىڭ قىزى ماليكا قىتايدىڭ پەكين قالاسىندا وقيدى. وسى­لايشا, ارتىندا سانالى ۇرپاق پەن ادەمى ءومىردىڭ ءىزىن قالدىرعان اكە ەسىمىن بۇگىندە ۇرپاقتارى جالعاستىرۋدا. ومىرلىك ولشەمدەردى مەيى­رىمدىلىك پەن تازالىقتان ىزدەي­تىن قارلىعاش تولەۋبايقىزى جان-جاقتىلىعىن جۇرتشىلىق اۋزىنىڭ سۋى قۇرىپ ايتادى. ول ءان سالعاندا تامسانبايتىندار كەمدە-كەم. اسىرەسە, ونىڭ داۋى­سىن جارى ەرەكشە ۇناتاتىن. ءادىل, جاساندىلىقتان ادا مىنە­زىمەن, دۇنيەتانىمىنىڭ كەڭ­دى­گىمەن ق.الەنوۆا بۇل تىرلىكتە ءبىراز بەلەستەردى باعىندىردى. ەڭبەگى دە ەلەۋسىز-ەسكەرۋسىز قال­­مادى. جارىنان ەرتە كوز جازىپ قالسا دا, بالالارىن جەتەك­تەي ءجۇرىپ, عىلىمنان قول ۇزبەدى. ناتيجەسىندە, ءبىلىم جانە عىلىم مينيسترلىگىنىڭ «جوعارى وقۋ ورنىنىڭ ۇزدىك وقىتۋشىسى» اتاعى مەن مەملە­كەتتىك گرانتىنا يە بولىپ, پەكين, شانحاي, لوندون, نيۋ-يورك, حيۋستون قالالارىنا بارىپ, حالىقارالىق «تەم­پۋس» باعدارلاماسى اياسىندا گەرمانيا, گوللانديا, بەلگيا ەلدەرىندە بولىپ, جوعارى وقۋ ورىندارىندا تاجىريبە ال­ماستى. راسىندا دا, ادام ماقساتىنا ءوزىن-ءوزى جەتىلدىرۋ ارقىلى جەتەدى ەكەن. ۇدايى ىزدەنىس پەن ادال ەڭبەكتىڭ ءناتي­جەسىندە ول ءوز ماقساتىنا قول جەتكىزدى. وسىلايشا, تۇتاستاي بولمىس-بىتىمىمەن, قارىم-قابىلەتىمەن ارتىنا ونەگەلى ءىز تاستاپ كەلەدى. ەندەشە, بارعا تاسىماي, جوققا جاسىماي, ارزان اتاق قۋىپ القىنىپ, دۇنيە قۋىپ شالقىماعان قارلىعاش تولەۋبايقىزىنىڭ ءومىرى ءار­دايىم كوپكە ۇلگى. گۇلبارشىن وكەشقىزى, جۋرناليست.