ەلدىڭ تۇرمىسىن تۇزەپ, تىرلىگىنە تىڭ سەرپىن بەرگەن ۇدەمەلى يندۋستريالىق-يننوۆاتسيالىق دامۋ باعدارلاماسىنىڭ ءبىرىنشى بەسجىلدىعى اياقتالدى. وسى كەزەڭدە جامبىل وبلىسىندا 41 جوبانىڭ 33-ءى ىسكە قوسىلدى. ولاردىڭ جالپى سوماسى 123,3 ملرد. تەڭگەنى قۇراپ, ءوڭىرىمىزدىڭ 5 مىڭعا جۋىق تۇرعىنىن جاڭا جۇمىس ورىندارىمەن قامتاماسىز ەتتى.
– جالپى, يننوۆاتسيالىق جانە جوعارى ءونىمدى جوبالاردى ەنگىزۋ ارقىلى ءبىز الەۋمەتتىك ماسەلەلەردى شەشۋگە جانە ءوڭىردىڭ ىشكى وڭىرلىك ءونىمىنىڭ ۇلعايۋىنا مول مۇمكىندىك الدىق, – دەيدى جامبىل وبلىستىق كاسىپكەرلىك جانە يندۋستريالىق-يننوۆاتسيالىق دامىتۋ باسقارماسىنىڭ باسشىسى الماس ماديەۆ. – مىسالى, «Super Pharm» جشس شيكىزاتتان دايىن ونىمگە دەيىن ءوندىرىس تسيكلىمەن جۇمىس ىستەۋدە. ال, «قۇرىلىس-پوليمەر» جشس 20-عا جۋىق ءارتۇرلى پوليمەردەن قۇرىلىس ماتەريالدارىن وندىرسە, «مىڭارال تاس كومپاني» جشس فرانتسۋزدىق تەحنولوگيا بويىنشا, ياعني تسەمەنتتى قۇرعاق تاسىلمەن الۋ ءوندىرىسىن يگەردى. سونداي-اق, «Talas Investment Company» جشس قازاقستاننىڭ حيميا ونەركاسىبىندەگى ناتري ءتسيانيدىن وندىرەتىن تۇڭعىش حيميالىق زاۋىتتى ىسكە قوستى.
وسىناۋ يگى ىسكە مەملەكەتتىڭ قولداۋى دا وتە زور. اتاپ ايتساق, يندۋستريالاندىرۋ كارتاسىنا ەنگەن 41 جوبانىڭ 20-سى, ياعني, ءاربىر ەكىنشى جوبا مەملەكەتتەن قارجىلاي كومەك العان. ولارعا بارلىعى 21,8 ملرد. تەڭگە كولەمىندە كومەك كورسەتىلدى. وتكەن جىلى جالپى قۇنى 22,84 ملرد. تەنگەنى قۇرايتىن 6 ينۆەستيتسيالىق جوبا ىسكە اسىرىلىپ, 994 جاڭا جۇمىس ورنى اشىلعان بولاتىن. «بينومسترويدەتال» جشس قۇنى 500,0 ملن. تەڭگەنى قۇرايتىن جوبانى قولعا الىپ, 65 جاڭا جۇمىس ورنىن اشتى. ءدال وسىلايشا «Talas Investment Company» جشس – 491, «Vista International» جشس – 13, «ارايسترويماركەت» جشس – 25, «Central Asia Gold Production» جشس – 150, «مىڭ-ارال كومپانياسى» جشس بالىق وندەۋ زاۋىتىنىڭ قۇرىلىسىن قولعا الىپ, 250 ادامعا جاڭا جۇمىس ورىندارىن تاۋىپ بەردى. ءبىرىنشى بەسجىلدىقتىڭ اياقتالۋىنا وراي يندۋستريالاندىرۋ كارتاسىنان بارلىعى 33 جوبا شىعارىلدى. ەندى ولاردىڭ ورنىن جاڭا جوبالار باسپاق. ياعني, ەكىنشى بەسجىلدىقتا جامبىل وبلىسىندا جالپى قۇنى 578,9 ملرد. تەڭگەنى قۇرايتىن 23 ينۆەستيتسيالىق جوبا جۇزەگە اسىرىلۋدا. وسىنىڭ ارقاسىندا 5,2 مىڭ جاڭا جۇمىس ورنىن اشۋ جوسپارلانىپ وتىر. بيىلدىڭ وزىندە 9 ينۆەستيتسيالىق جوبا قولعا الىنۋدا. – وسى تۇستا جوبالاردىڭ قالا – اۋداندارىندا ىسكە اسۋ ستاتيستيكاسىنا توقتالعىم كەلەدى, – دەيدى الماس وسكەنباي ۇلى. – اتاپ ايتساق, ەكىنشى بەسجىلدىقتىڭ يندۋستريالاندىرۋ كارتاسىنا تاراز قالاسىنان 7 جوبا, قورداي اۋدانىنان 4 جوبا, شۋ اۋدانىنان 3 جوبا, جامبىل, تالاس اۋداندارىنان – 2 جوبادان, بايزاق, جۋالى, ت.رىسقۇلوۆ, سارىسۋ جانە مويىنقۇم اۋداندارىنان 1 جوبادان ەنگەن. ياعني, بۇل باعدارلاما قالانىڭ دا, دالانىڭ دا تىرلىگىن جانداندىرىپ, ءوڭىر ەكونوميكاسىنىڭ دامۋىنا ۇلكەن ۇلەس قوساتىنى ءسوزسىز.
ورالحان ءداۋىت, «ەگەمەن قازاقستان».
جامبىل وبلىسى.
