سوڭعى جىلدارى بۇل ءداستۇر جاڭا مازمۇنمەن تولىعىپ كەلەدى. 2024 جىلى مەملەكەت باسشىسى قاسىم-جومارت توقاەۆتىڭ باستاماسىمەن ەنگىزىلگەن «ناۋرىزناما» ونكۇندىگى مەيرامدى جۇيەلى تۇردە اتاپ وتۋگە جول اشتى. 14-23 ناۋرىز ارالىعىن قامتيتىن بۇل كەزەڭنىڭ ءار كۇنىنە ارنايى مازمۇن جۇكتەلىپ, ۇلتتىق قۇندىلىقتاردى جاڭاشا دارىپتەۋ ءۇردىسى قالىپتاستى. كورىسۋ, قايىرىمدىلىق, مادەنيەت پەن سالت-ءداستۇر, شاڭىراق, ۇلتتىق كيىم, جاڭارۋ, ۇلتتىق سپورت, ىنتىماق, جىل باسى جانە تازارۋ كۇندەرى حالىقتىڭ دۇنيەتانىمى مەن ءومىر سالتىن ايشىقتايدى.
وسى ونكۇندىكتىڭ التىنشى كۇنى – جاڭارۋ كۇنى. بۇل كۇن تەك تابيعاتتىڭ تۇرلەنۋىمەن عانا ەمەس, قوعامنىڭ دا سەرپىلىسىن بىلدىرەدى. ادام بالاسى اينالاسىن تازالاپ, وي-ساناسىن جاڭعىرتىپ, جاڭا باستامالارعا قادام باسادى.
جاڭارۋ كۇنىنە وراي ەلىمىزدە بىرقاتار مادەني جانە قوعامدىق ءىس-شارالار ۇيىمداستىرىلىپ وتىر. قازاقستان رەسپۋبليكاسىنىڭ ۇلتتىق ورتالىق مۋزەيىندە «نۇر سەبەلە, ۇلىستىڭ ۇلى كۇنى» اتتى مادەني-تانىمدىق باعدارلاما وتەدى. مۇندا ءداستۇر مەن رۋحاني قۇندىلىقتاردى ناسيحاتتاۋعا باسىمدىق بەرىلگەن.
سونداي-اق مادەنيەتتەردى جاقىنداستىرۋ ورتالىعىندا «جاڭارۋدى – تازالىقتان باستايىق» اتتى سەنبىلىك وتكىزۋ جوسپارلانعان. بۇل باستاما قورشاعان ورتاعا جاۋاپكەرشىلىكپەن قاراۋ مادەنيەتىن قالىپتاستىرۋعا باعىتتالعان. ۇلتتىق مۋزەيدە «ناۋرىز – جاڭارۋ مەن بىرلىكتىڭ مەيرامى» اتتى ارنايى مادەني باعدارلاما ۇسىنىلادى.
ال رەسپۋبليكالىق اكادەميالىق نەمىس دراما تەاترى كوكتەمگى ساياباق كەڭىستىگىندە جاستار مەن جاڭارۋ تاقىرىبىنا ارنالعان شىعارماشىلىق باعدارلاما ۇسىنباق. بۇل شارالار قوعامنىڭ ءتۇرلى بۋىنىن ورتاق قۇندىلىقتار توڭىرەگىنە توپتاستىرۋعا قىزمەت ەتەدى.
مەرەكەلىك ءىس-شارالار وڭىرلەردە دە كەڭىنەن جالعاسىپ جاتىر. قاراعاندى وبلىسىندا ەكولوگيالىق اكتسيالار مەن جاستار باستامالارى قولعا الىنسا, اقمولا وبلىسىندا ەلدى مەكەندەردى اباتتاندىرۋ جۇمىستارى جۇرگىزىلەدى. اقتوبە وڭىرىندە تاقىرىپتىق باعدارلامالار ۇيىمداستىرىلىپ, قوعامدىق ءىس-شارالار وتەدى. ال ماڭعىستاۋ وبلىسىندا جاستار مەن ەرىكتىلەردىڭ قاتىسۋىمەن ءتۇرلى الەۋمەتتىك جوبالار جۇزەگە اسىپ جاتىر.
جاڭارۋ كۇنى – تەك ءبىر كۇندىك ءىس-شارا ەمەس, ول – قوعامدى تازالىققا, بىرلىككە, جاۋاپكەرشىلىككە ۇندەيتىن ورتاق ۇندەۋ. ۇلتتىق مەرەكەنىڭ جاڭا مازمۇنى ءداستۇر مەن زاماناۋي كوزقاراستىڭ ۇيلەسىمىن تانىتىپ, ەلدىڭ رۋحاني جاڭعىرۋىنا سەرپىن بەرىپ كەلەدى.
