فوتو: اقوردا
قاسىم-جومارت توقاەۆ كونستيتۋتسيالىق رەفورما جونىندەگى كوميسسيانىڭ ناتيجەلى ەڭبەگىنە ايرىقشا توقتالدى.
پرەزيدەنتتىڭ ايتۋىنشا, كوميسسيا مۇشەلەرى وتە اۋقىمدى, ءتيىمدى جۇمىس اتقارىپ, مەملەكەت پەن قوعامنىڭ ءوزارا سەنىمى جانە سەرىكتەستىگى اسا ماڭىزدى ەكەنىن ايقىن كورسەتتى.
جالپىۇلتتىق كواليتسيا مۇشەلەرى دە قاجىرلى قىزمەت ەتتى. ولار جاڭا كونستيتۋتسيانىڭ ءمان-مازمۇنىن جۇرتشىلىققا كەڭىنەن ءتۇسىندىرىپ, قاجەتتى ۇگىت-ناسيحات جۇمىسىن ويداعىداي اتقاردى.
«بۇگىن وسى تاريحي ساتكە وراي, مەن كوميسسيا قۇرامىندا بولعان بارشا ازاماتقا جانە كواليتسيا مۇشەلەرىنە ەرەكشە ريزاشىلىعىمدى بىلدىرەمىن.
ەلىمىزدىڭ ءار ايماعى, اۋدانى مەن قالاسىندا قوعامدىق بەلسەندىلەر, ولاردىڭ ىشىندە ەرىكتىلەر, ياعني ۆولونتەرلەر جوعارى ازاماتتىق جاۋاپكەرشىلىك تانىتىپ, حالىق كونستيتۋتسياسىنىڭ قابىلدانۋىنا زور ۇلەس قوستى. بارشاڭىزعا راقمەتىمدى ايتامىن», دەدى پرەزيدەنت.
پرەزيدەنت كونستيتۋتسيانى قابىلداۋعا ارنالعان سالتاناتتى جيىنعا قاتىستى
مەملەكەت باسشىسى اتاپ وتكەندەي, حالىق كونستيتۋتسياسى كەلەشەك ۇرپاق الدىنداعى جاۋاپكەرشىلىكتى تەرەڭ سەزىنە وتىرىپ قابىلداندى.
«اتا زاڭ – قۋاتتى, كۇشتى, باسەكەگە قابىلەتتى قازاقستاننىڭ جاڭا جارعىسى.
جاڭا كونستيتۋتسيا – كونە زاماننان بەرى بابالارىمىزعا باعدار بولعان دالا زاڭدارىنىڭ بۇگىنگى جالعاسى, ۇرپاقتار اراسىنداعى ساباقتاستىق كورىنىسى», دەدى قاسىم-جومارت توقاەۆ.
پرەزيدەنتتىڭ سوزىنشە, زامان تالابىنا ساي جاڭعىرعان باس قۇجات مەملەكەتتىگىمىزدىڭ سان عاسىرلىق تاريحىنان حابار بەرەدى.
«قازىرگى كونستيتۋتسيا ناعىز ۇلت زاڭى دەگەن اتقا لايىق. ونىڭ ونە بويىندا بابالارىمىز امانات ەتكەن ەلدىك پەن ەرلىك رۋحى, سالت-ءداستۇر, جاسامپازدىق جانە جاڭاشىلدىق ۇعىمدارى توعىسقان.
اتا زاڭ – مەملەكەت مۇددەسىنىڭ بولاتتاي بەرىك قالقانى. كونستيتۋتسيامىزدىڭ ەڭ باستى ماقساتتارى – جەرىمىزدىڭ تۇتاستىعىن, ەلىمىزدىڭ تاۋەلسىزدىگى مەن ەگەمەندىگىن قورعاۋعا, ازاماتتارىمىزدىڭ قۇقىقتارى مەن بوستاندىقتارىن ساقتاۋعا, قوعامدىق ادىلەت پەن زاڭ ۇستەمدىگىن نىعايتۋعا كەپىلدىك بەرۋ, سونداي-اق ءبىلىم, عىلىم, يننوۆاتسيا مەن مادەنيەتتى دامىتۋ, تازالىقتى دارىپتەپ, تابيعاتتى قورعاۋدى قامتاماسىز ەتۋ.
مەملەكەتىمىزدىڭ باس قۇجاتى – حالىق بولمىسىنىڭ مىزعىماس نىشانى, بەرەكەلى اۋىزبىرشىلىگىمىزدىڭ سيمۆولى», دەدى مەملەكەت باسشىسى.
پرەزيدەنت: جاڭا حالىق كونستيتۋتسياسى – كەلەر ۇرپاقپەن بىرگە جاساي بەرەتىن قاسيەتتى قۇجات
