ۇگىتكە تيەسىلى 30 كۇن

كەشە ورتالىق سايلاۋ كوميسسياسىندا بولعان كەزەكتى بريفينگتە ورتالىق سايلاۋ كوميسسياسىنىڭ قاۋلىسىمەن بەلگىلەنگەن پرەزيدەنتتىك سايلاۋدى ازىرلەۋ مەن وتكىزۋ ءجونىن­دەگى نەگىزگى ءىس-شارالاردىڭ كۇنتىزبەلىك جوسپارى ءمالىم ەتىلدى. ورتالىق سايلاۋ كوميسسياسى­نىڭ حاتشىسى باقىت مەلدەشوۆ: «سايلاۋ زاڭناماسىنىڭ ەڭ ماڭىزدى تالابى – سايلاۋ ۇدەرىسىنە قاتىسۋشىلار ءۇشىن تەڭ قۇقىقتار مەن جاعدايلاردى قامتاماسىز ەتۋ. سايلاۋ تۋرالى كونستيتۋتسيالىق زاڭدا سايلاۋ الدىنداعى ۇگىت 4 باپتان تۇرادى, جانە وعان 5 تاراۋ ارنالعان. زاڭنامالىق تۇرعىدان العاندا, سايلاۋ الدىنداعى ۇگىت – سايلاۋشىلاردىڭ بەلگىلى ءبىر كانديداتتى, ساياسي پارتيانى جاقتاپ نەمەسە قارسى داۋىس بەرۋگە قاتىسۋعا تۇرتكى بولۋ ماقساتىنداعى قىزمەت», دەي كەلىپ, كۇنتىزبەلىك جوسپارعا ساي سايلاۋالدى ۇگىت جۇرگىزۋگە 30 كۇن بەكىتىلگەنىن, ول 26 ناۋرىزدان باستالىپ, 24 ءساۋىر كۇنى ساعات 00.00-دە اياقتالاتىنىن جەتكىزدى. سايلاۋ قارساڭىنداعى كۇندە جانە سايلاۋ كۇنىندە كەز كەلگەن ۇگىتكە تىيىم سالىناتىنىن ايتقان ول بىرقاتار مەملەكەتتىك ورگان قىزمەتكەرلەرىنە سايلاۋالدى ۇگىت-ناسيحات جۇمىستارىن جۇرگىزۋگە زاڭ اياسىندا تىيىم بارلىعىن دا قاپەرگە سالدى. «ەلىمىزدىڭ سايلاۋ تۋرالى زاڭناماسىنا سايكەس مەملەكەتتىك ورگاندارعا ۇگىت جۇمىسىن جۇرگىزۋگە تىيىم سالىنادى. لاۋازىمدى قىزمەتتە وتىرعان ازاماتتار دا ءوز قىزمەتىن پايدالانىپ, ۇگىت جۇرگىزبەۋى ءتيىس. سونىمەن قاتار, اسكەري قىزمەتشىلەرگە, ۇقك, سوت, پروكۋراتۋرا, ىشكى ىستەر مينيسترلىگىنىڭ قىزمەتكەرلەرىنە, وسك مۇشەلەرىنە ۇگىت جۇمىستارىن جۇرگىزۋگە بولمايدى», دەگەن باقىت مەلدەشوۆ كانديداتتاردىڭ سەنىم بىلدىرىلگەن ادامى رەتىندە دە  وزدەرىنىڭ قىزمەتتەرىن پايدالانىپ, قاراماعىندا جۇمىس ىستەيتىن ازاماتتاردى ۇگىت جۇمىسىنا تارتۋعا بولمايتىنىن جانە ۇگىت جۇمىسىندا, سايلاۋشىلارمەن كەزدەسۋ بارىسىندا تەگىن تاۋارلار تاراتىپ, لوتەرەيالار ويناتۋعا زاڭ جۇزىندە ەشقانداي رۇقسات جوقتىعىن قاداپ ايتتى. سونىمەن قاتار, وسك حاتشىسى, ۇگىت جۇمىسىن جۇرگىزگەن كەزدە كانديداتتار ءوزىنىڭ ۇگىت پلاكاتتارىندا ەلىمىزگە ەسىمى بەلگىلى ازاماتتاردىڭ سۋرەتىن ول تۇلعانىڭ كەلىسىمىن العان كۇندە جاريالاۋ قۇقىعى بارلىعىن, ال كەلىسىمى بولماعان جاعدايدا مۇنداي پلاكاتتاردىڭ ىلىنۋىنە تىيىم سالىناتىنىن جەتكىزدى. بۇعان قوسا, پلاكاتتى جاساعان كەزدە ونىڭ تومەن جاعىندا قانداي قاراجاتقا باستىرىلىپ, قانداي باسپادان شىعارىلعانى كورسەتىلۋى قاجەت, دەگەن ول سايلاۋ كۇنىندە سايلاۋ ۋچاسكەسىنىڭ ىشىندە الەۋمەتتىك ساۋالداما جۇرگىزۋگە بولمايتىنىنا دا ءمان بەردى. بارلىق سايلاۋالدى ۇگىت جۇمىستارىنىڭ تەك زاڭ اياسىندا جۇرگىزىلۋى تيىستىگىن ايتتى. وسى رەتتە جۋرناليستەرگە قاراپ: «شەت مەملەكەتتىڭ ازاماتتارىنا دا ۇگىت جۇمىستارىنا ارالاسۋعا تىيىم سالىنعان. جالپى, ۇگىت-ناسيحات جۇمىستارى بۇقارالىق اقپارات قۇرالدارى, كانديداتتىڭ سەنىم بىلدىرىلگەن ادامىنىڭ حالىقپەن كەزدەسۋى ارقىلى جۇرگىزىلەدى. بۇل رەتتە, بۇقارالىق اقپارات قۇرالدارىنا دا ۇگىت جۇمىستارىن جۇرگىزۋگە تىيىم سالىنادى. ەگەر باق وكىلى ۇگىت جۇمىسىن جۇرگىزگىسى كەلسە, وندا جۇمىسىنان ۋاقىتشا كەتۋى قاجەت. ياعني, ءبىر ايعا ەڭبەك دەمالىسىنا شىعىپ, كانديداتتىڭ سەنىم بىلدىرىلگەن ادامى رەتىندە ۇگىت جۇرگىزە الادى», دەدى. كەزەكتەن تىس پرەزيدەنتتىك سايلاۋعا پارتيا اتىنان ۇسىنىلعان كانديداتقا قاراعاندا ءوزىن ءوزى ۇسىنعان كانديداتتىڭ سايلاۋ قورى ءبىرشاما تومەن بولاتىنىن ايتقان ول ەگەر كانديداتتى ساياسي پارتيا ۇسىنسا, وندا ۇيىمنىڭ 149 ملن. 548 مىڭ تەڭگە قارجى بولەتىنىن, ال كەز كەلگەن ازاماتتىڭ ءوزى قالاعان كانديداتقا قارجى بەرۋىنە قۇقى بارلىعىن, بىراق ونىڭ سوماسى 320 ملن. 460 مىڭ تەڭگەدەن اسپاۋى كەرەكتىگىن اتاپ كورسەتتى. «كانديداتتار سايلاۋ قورىن وزدەرى قۇرىپ, وعان جەكە قاراجاتىن پايدالانا الادى. پايدالاناتىن جەكە قاراجاتتىڭ سوماسى دا زاڭدا بەلگىلەنگەن. ول 106 ملن. 820 مىڭ تەڭگەنى قۇرايدى. جالپى ايتقاندا, وسى سايلاۋداعى ءار كانديداتتىڭ سايلاۋ قورى 576 ملن. 828 مىڭ تەڭگە مولشەرىندە بولۋى كەرەك. ودان اسپاۋى ءتيىس. ال ءوزىن ءوزى ۇسىنعان ازاماتتاردىڭ ۇگىتكە شىعىستارى تومەندەۋ بولادى. ويتكەنى, ول كانديداتتا پارتيا قارجىسى بولمايتىندىعى تۇسىنىكتى جايت. سوندىقتان ونىڭ سوماسى 427 ملن. 280 مىڭ تەڭگەنى قۇرايدى», دەدى وسك حاتشىسى. انار تولەۋحانقىزى, «ەگەمەن قازاقستان».