جيھاز ءوندىرىسى ورگە باستى

«QazIndustry» اق جەڭىل ونەركاسىپ, اعاش وڭدەۋ, جيھاز ونەركاسىبىن جانە قۇرىلىس ماتەريالدارى ءوندىرىسىن دامىتۋ دي­رەكتسياسىنىڭ مالىمەتىنشە, بىل­تىر ەلدە جيھاز ونىمدەرىن ءوندىرۋ كولەمى 56,7%-عا ءوسىپ, 165,1 ملرد تەڭگەگە جەتكەن. سو­نىڭ ناتيجەسىندە سالانىڭ جال­پى ونەركاسىپ وندىرىسىندەگى ۇلەسى – 0,3%-دى, ال وڭدەۋ ونەركا­سىبىندەگى ۇلەسى 0,5%-دى قۇرادى. بۇل كورسەتكىشتەر 2024 جىلى 0,2 جانە 0,4% دەڭگەيىندە بولعان.

ديرەكتسيا ساراپشىلارى ەڭ جوعارى ءوسىم كەڭسەگە ارنالعان اعاش جيھاز وندىرىسىندە تىركەل­گەنىن ايتادى. بۇل سەگمەنتتە ءون­دىرىس كولەمى 37,2% ارتقان. سون­داي-اق اسحانا مەن قوناق بولمەگە ارنالعان اعاش جيھاز ءوندىرىسى – 18,5%, مەتالل قاڭقالى ارنايى وتىرۋعا ارنالعان جيھاز ءوندىرىسى 2,8%-عا وسكەن. ال جاتىن بولمەگە ارنالعان وزگە اعاش جيھازدار, ياعني كەرەۋەت پەن شكافتان وزگە ونىمدەر, سونىمەن قاتار اس ءۇي جيھازى سەگمەنتىندە ءوندىرىس كولەمى ءبىرشاما تومەندەگەن.

ىشكى نارىقتاعى سۇرانىس تا تۇراقتى ءوسىم كورسەتىپ وتىر. بىلتىر جيھاز ونىمدەرىن ىشكى تۇتىنۋ نارىعىنىڭ كولەمى 670 ملن دوللارعا جەتىپ, الدىڭعى جىل­مەن سالىستىرعاندا شامامەن 3%-عا ۇلعايعان. بۇل رەتتە وتاندىق وندىرۋشىلەر ىشكى نارىقتىڭ 37,8%-ىن قامتاماسىز ەتكەن. ءبىر جىل بۇرىن بۇل كور­سەت­كىش 33,7% بولعان ەدى. ياعني وتاندىق كاسىپورىنداردىڭ نارىقتاعى ۇلەسى بىرتىندەپ ارتىپ كەلەدى دەگەن ءسوز. سالاعا سالىنعان ينۆەستيتسيا كولەمى دە نازار اۋدارارلىق.

«بىلتىر نەگىزگى كاپيتالعا باعىتتالعان ينۆەستيتسيالار 6,9 ملرد تەڭگەدەن اسقان. بۇل باعىتتا تۇركىستان وبلىسى كوش باستاپ تۇر. وڭىرگە جالپى كولەمنىڭ شامامەن 70%-ى, ياعني 4,8 ملرد تەڭگە ينۆەستيتسيا تارتىلعان. قاراجاتتىڭ باسىم بولىگى كەڭسە مەن ساۋداعا ارنالعان جيھاز ءوندىرىسىن دامىتۋعا جۇمسالعان», دەيدى ديرەكتسيا ساراپشىلارى.

جيھاز تۇرلەرىنىڭ باسىم بولىگى اعاشتان جاسالادى. ال ەلىمىزدە ورمان قورىنىڭ ۇلەسى از. سول سەبەپتى شيكىزاتتىڭ بارلىعى دەرلىك شەت مەملەكەتتەردەن اكەلىنەدى. بۇرىن دايىن ماتەريال عانا يمپورتتالسا, بۇ­گىندە وتاندىق كاسىپكەرلەر اعاش­تى ءوز بەتىنشە وڭدەۋگە قاۋقارلى.

ەكسپورت كورسەتكىشى دە كوڭىل كونشىتەدى. وتاندىق جيھازدىڭ شەتەلگە ساتىلىمى 4,7 ەسە ءوسىپ, 72,2 ملن دوللارعا جەتكەن. اسىرەسە وزگە مەتالل جي­ھاز ەكسپورتى – 11,3 ەسەگە, مەتالل قاڭقالى وتىرعىش جيھاز­دىڭ وزگە تۇرلەرى 5 ەسە وسكەن. پلاستماسسادان جاسالعان جيھاز ەكسپورتى دا 88,7%-عا ارتقان. نەگىزگى ەكسپورتتىق باعىتتار رەتىندە تمد ەلدەرى اتالادى.

سالاداعى وڭ ديناميكا الدا­عى كەزەڭدە دە جالعاسىن تاپپاق. «QazIndustry» مالىمەتىنشە, بيىل ەلىمىزدىڭ ءار وڭىرىندە جيھاز وندىرىسىنە قاتىستى سەگىز جاڭا جوبانى ىسكە قوسۋ جوسپارلانىپ وتىر.