اسىلىندە «اعىن» دەگەن اتاۋدىڭ ءوزى كوپ نارسەنى اڭعارتادى. ونەر دە – توقتامايتىن, ءبىر ورىندا تۇرمايتىن قوزعالىس. انۆارا سادىقوۆا ءۇشىن بي تەك اسەمدىك ەمەس, ول – مازمۇن مەن دراماتۋرگيا. حورەوگرافتىڭ ءوزى: «مەن ءۇشىن بي – تەك قيمىل ەمەس, ول ىشكى تىنىس. ەگەر ورىنداۋشى الدىمەن سول تىنىستى سەزىنبەسە, قيمىل بوس قاڭقا كۇيىندە قالادى», دەيدى.
كونتسەرت شىمىلدىعىن بەيبىت ورال ۇلىنىڭ مۋزىكاسىنا قويىلعان باس بالەتمەيستەردىڭ ءتول تۋىندىسى «دالا اۋەنى» حورەوگرافيالىق كومپوزيتسياسى اشتى. ەلىمىزگە تانىمال كۇيشى, كومپوزيتور, قازاقستاننىڭ حالىق ءارتىسى سەكەن تۇرىسبەكوۆتىڭ ورىنداۋىنداعى «كوڭىل تولقىنى» كۇيىنە قويىلعان ءبيى دە كورەرمەننىڭ ىستىق ىقىلاسىنا بولەندى. ال قىرعىز رەسپۋبليكاسىنىڭ ەڭبەك سىڭىرگەن ءارتىسى گۇلزادا رىسقۇلوۆانىڭ مۋزىكاسى مەن سوزىنە جازىلعان «Tolgonuu» ءانى اۆتوردىڭ ورىنداۋىندا شىرقالىپ, حورەوگرافياسىنا «Gulder» ءانسامبلىنىڭ ارتىستەرى بيلەدى. الەمنىڭ تۇكپىر-تۇكپىرىندەگى بايقاۋلار مەن فەستيۆالداردا قويىلىپ جۇرگەن نۇرعيسا تىلەنديەۆتىڭ كۇيىنە قويىلعان «اققۋ» ءبيى دە كورەرمەن كوڭىلىنەن ەرەكشە ورىن الدى. ساحنادا اققۋدىڭ اسەم بولمىسى مەن سۇلۋلىعى نازىك قيمىل, يىرىمگە تولى پلاستيكا ارقىلى اسەرلى بەينەلەندى.
بۇل سينتەز – مۋزىكا مەن قيمىلدىڭ, تاريح پەن بۇگىننىڭ ءۇنسىز ديالوگىنە اينالدى. مۋزىكا مەن ءبيدىڭ جاراسىمدى ۇندەستىگى كونتسەرتتىڭ كوركەمدىك دەڭگەيىن ارتتىرىپ, ۇلتتىق ونەردىڭ ومىرشەڭدىگىن تاعى ءبىر مارتە دالەلدەدى. كورەرمەن قاۋىم ءاربىر قويىلىمدى ەرەكشە ىقىلاسپەن قابىلداپ, كونتسەرت سوڭىندا ۇزاق ۋاقىت قول سوعىپ, جىلى لەبىزدەرىن ءبىلدىردى.
سونداي-اق كونتسەرت باعدارلاماسىندا انۆارا سادىقوۆانىڭ قازاقستاننىڭ جەتەكشى حورەوگرافيالىق, تەاترلىق ۇجىمدارىنىڭ رەپەرتۋارىنا ەنگەن تاڭداۋلى قويىلىمدارى ۇسىنىلدى. اتاپ ايتقاندا, «جان بىتكەن پەتروگليف», «تولعاۋ», «ەر تۇران», «دايراباي», «اق داريعا», «حافيز», «سەرىلەر سالتاناتى» سىندى بيلەر ورىندالدى.
كەشتە «Gulder» انسامبلىمەن قاتار, قازاقستاننىڭ ەڭبەك سىڭىرگەن قايراتكەرى ەربولات احمەدياروۆ, «استانا وپەرا» مەملەكەتتىك وپەرا جانە بالەت تەاترىنىڭ ءسوليسى, حالىقارالىق بايقاۋلاردىڭ لاۋرەاتى سۇلتانبەك عۇمار, اباي اتىنداعى قازاق ۇلتتىق وپەرا جانە بالەت تەاترىنىڭ ءسوليسى دينارا قۇداباەۆا, رەسپۋبليكالىق جانە حالىقارالىق بايقاۋلاردىڭ لاۋرەاتى كوركەم شولوشوۆا, نۇراي شەرۋ, اققانات سماعۇلوۆا, «Turan» ەتنو-فولكلورلىق ءانسامبلى, قازاق مەملەكەتتىك سيمفونيالىق وركەسترى مەن قازاق ۇلتتىق حورەوگرافيا اكادەمياسىنىڭ ستۋدەنتتەرى ونەر كورسەتتى.
شىنىندا دا, كونتسەرت شىمىلدىعىن اشقان بەيبىت ورال ۇلىنىڭ «دالا اۋەنى» كومپوزيتسياسىنان باستاپ, سەكەن تۇرىسبەكوۆتىڭ «كوڭىل تولقىنىنا» دەيىن ءار تۋىندى ۇلتتىق رۋحتىڭ پلاستيكالىق پورترەتىن بەينەلەدى. مۇندا ءداستۇر قاتىپ قالعان فورما ەمەس, ۇزدىكسىز دامىپ جاتقان ءتىرى اعزا سەكىلدى كورىنىس تاپتى. مازمۇندى ءىس-شارادا كورەرمەن تۇتاس ءبىر ەستەتيكالىق الەمگە ەندى.
ال كەشتىڭ باستى وقيعاسى – فرانتسۋز كومپوزيتورى موريس راۆەلدىڭ مۋزىكاسىنا قويىلعان «زامانا جاڭعىرىعى» ەتنو-بالەتىنىڭ تۇساۋكەسەرى. بۇل قويىلىم – تاريحي-فيلوسوفيالىق كونتسەپتسياعا قۇرىلعان كەسەك دۇنيە. ساحنادا تۇمار حانشايىمنىڭ ايبىندى تۇلعاسى, ساق ءداۋىرىنىڭ شەجىرەسى مەن كوك تۇرىكتەردىڭ ەركىن رۋحى توعىستى. حورەوگراف ەۋروپالىق كلاسسيكالىق مۋزىكا مەن قازاقتىڭ ەتنو-پلاستيكاسىن شەبەر ۇيلەستىرە وتىرىپ, قازاق ءبيىن ەتنوگرافيالىق شەڭبەردەن شىعارىپ, سيمفونيالىق كەڭىستىككە كوتەردى. بۇل – زاماناۋي ۇلتتىق حورەوگرافيانىڭ جاڭا بەلەسى.
ءيا, بي تىلىندە ۇلتتىڭ بولمىسىن سويلەتۋ – سيرەك شەبەرلىك. ال ونى بۇگىنگى كورەرمەننىڭ جۇرەگىنە جەتكىزە ءبىلۋ – ودان دا بيىك مۇرات. سەبەبى قازاق ءبيى – تەك قيمىلدار جۇيەسى ەمەس. ول – كوشپەلى دۇنيەتانىمنىڭ, تابيعاتپەن ەتەنە تىرشىلىكتىڭ, ەركىن رۋحتىڭ كورىنىسى. بىلەكتىڭ سەرپىنى, يىقتىڭ قوزعالىسى, ساۋساقتىڭ مايدا ءيىرىمى – ءبارى دە زور مانگە يە. انۆارا سادىقوۆا ونى بۇگىنگى ساحنالىق كەڭىستىككە باتىل الىپ شىقتى. ءبىر ساتتە ساحنادا نازىك ليريزم ۇستەمدىك قۇرىپ, دالانىڭ سامالى سەزىلسە, كەلەسى ساتتە مىنەز, قۋات, جىگەر جارق ەتەدى. بۇل كونتراست – قازاق بولمىسىنىڭ ءوز تابيعاتى. سول تابيعاتتى بي ارقىلى سويلەتۋ – حورەوگرافتىڭ ىشكى مادەنيەتى مەن تەرەڭ تانىمىنىڭ كورسەتكىشى.
انۆارانىڭ ونەرى – ءداستۇر مەن زاماناۋيلىقتىڭ ۇيلەسىمى. «Gulder» انسامبلىمەن بىرگە اتقارعان ەڭبەگى ارقىلى ول حالىقتىق ءبيدى تەك ساحنالىق نۇسقا رەتىندە عانا ەمەس, ءتىرى اعزاداي داميتىن, وزگەرەتىن, تولىساتىن قۇبىلىس رەتىندە تانىتتى. حورەوگراف پلاستيكاسىندا قازاق ءبيىنىڭ نازىكتىگى دە, قايسارلىعى دا قاتار ورىلەدى. ءبىر ساتتە – بۇلاقتاي ءمولدىر, ءبىر ساتتە – داۋىلداي ەكپىندى. ال ونىڭ شىعارماشىلىق لابوراتورياسى – ىزدەنىس الاڭى. قازاقتىڭ كونە قيمىل ورنەكتەرىن سيمفونيالىق كەڭىستىككە شىعارۋ, انسامبلدىك ءبيدى دراماتۋرگيالىق تۇتاستىققا اينالدىرۋ, مۋزىكالىق قۇرىلىم مەن پلاستيكالىق شەشىمدى ءبىر ارناعا توعىستىرۋ – مۇنىڭ ءبارى ۇزاق جىلدىق تاجىريبەنىڭ جەمىسى.
انۆارا سادىقوۆا – تەك 70-تەن استام ءبيدىڭ اۆتورى عانا ەمەس, ول ۇلتتىق ونەردى عىلىمي تۇرعىدان زەرتتەپ, ناسيحاتتاپ جۇرگەن ىزدەنىمپاز تۇلعا. اتاپ ايتساق, ول ۇلتتىق حورەوگرافيا تاريحى تۋرالى ءۇش دەرەكتى فيلمگە ستسەناري جازىپ, رەجيسسەرلىك ەتتى. ۇلتتىق بالەت ماسەلەلەرىنە ارنالعان 25-تەن استام عىلىمي زەرتتەۋ ماقالا مەن ءتورت كىتاپتىڭ اۆتورى. حالىقارالىق كاسىبي قىزمەتكە دە بەلسەنە ارالاسىپ, لاتۆيا, رەسەي, بەلارۋس, قازاقستانداعى حالىقارالىق حورەوگرافيالىق بايقاۋلاردىڭ قازىلار القاسىنىڭ مۇشەسى بولىپ ءجۇر. ونىڭ شىعارماشىلىق لابوراتورياسىندا حالىقتىق بي مۋزەيلىك جادىگەر ەمەس, بۇگىنگى كۇنمەن قاتار تىنىستايتىن ءتىرى قۇبىلىس.
«ۇلتتىق ونەردى الەمگە شىعارۋ ءۇشىن الدىمەن, ءوزىڭ ونى تەرەڭ ءتۇسىنۋىڭ كەرەك. ءبىز ءوز بولمىسىمىزدى مويىنداساق قانا, وزگەگە قىزىق بولامىز», دەدى كەش سوڭىندا انۆارا ارىپقىزى.
ساحنا شامدارى ءسونىپ, كورەرمەن تارقاعانىمەن, «اعىننىڭ» اسەرى جۇرەكتە قالدى. ويتكەنى شىنايى ونەر – ۋاقىتشا قۇبىلىس ەمەس, رۋحاني تاجىريبە. انۆارا سادىقوۆانىڭ شيرەك عاسىرلىق ەڭبەگى قازاق ءبيىنىڭ ارناسى كەڭەيىپ, تەرەڭدەپ, جاڭا بەلەستەرگە بەت العانىن ايعاقتادى. ونەردىڭ اعىسى توقتامايدى, ول – ماڭگىلىك قوزعالىس.
