فوتو: ميراس كۋاندىكوۆ/Kazinform
ولار ارميان-يران شەكاراسىنداعى «اگاراك» باقىلاۋ-وتكىزۋ پۋنكتى ارقىلى اۆتوبۋسپەن ءوتىپ, ەرەۆانعا جەتكىزىلگەن.
«قازاقپاراتتىڭ» حابارلاۋىنشا, ەۆاكۋاتسيالانعان ازاماتتار 5 ناۋرىز كۇنى ماسكەۋ ارقىلى ترانزيتپەن الماتى قالاسىنا ۇشىپ كەلەدى.
«زاركۋح» كاسىپورنى IT-ءبولىمىنىڭ باسشىسى اندرەي سۋحارەۆءتىڭ ايتۋىنشا, يرانداعى جاعداي ۋشىعا باستاعاننان كەيىن كومپانيا باسشىلىعى ەۆاكۋاتسيا تۋرالى شەشىمدى بىردەن قابىلداعان.
«يراندا اسكەري قيمىلدار باستالعاننان كەيىن ءبىزدىڭ باسشىلىق قازاقستان ازاماتتارىن ەلگە قايتارۋ تۋرالى جەدەل شەشىم قابىلدادى. ءتيىستى تىزىمدەر دايىندالىپ, ارمەنياداعى قازاقستان ەلشىلىگىنە جىبەرىلدى. ەلشىلىك جەرگىلىكتى بيلىك ورگاندارىنىڭ كومەگىمەن يران-ارمەنيا شەكاراسىندا «جاسىل ءدالىز» ۇيىمداستىردى. جاعداي تۇراقتالىپ, جۇمىسىمىزعا قايتا ورالامىز دەپ ۇمىتتەنەمىز. سونىمەن قاتار ەلشىلىك قىزمەتكەرلەرىنە جەدەل كورسەتكەن كومەگى ءۇشىن ەرەكشە العىسىمىزدى بىلدىرەمىز», دەدى اندرەي سۋحارەۆ.
ەسكە سالا كەتەيىك, يزرايل 28 اقپان, سەنبى كۇنى تاڭەرتەڭ يرانعا سوققى جاسادى. دۋباي, ابۋ-دابي جانە راس-ەل-حايمادا جۇرگەن قازاقستان ازاماتتارى رەيستەردىڭ توقتاتىلۋىنا بايلانىستى ەلگە قايتا الماي وتىر. ال «قازپوشتا» تاياۋ شىعىستاعى جاعدايدىڭ شيەلەنىسۋىنە بايلانىستى حالىقارالىق پوشتا جونەلتىلىمدەرىنە ۋاقىتشا شەكتەۋلەر قويىلعانىن مالىمدەدى.
بۇعان دەيىن تاياۋ شىعىستاعى قاقتىعىس سالدارىنان 13 رەيس توقتاتىلعانىن جازعان بولاتىنبىز. سونداي-اق تاياۋ شىعىستاعى احۋالدىڭ ۋشىعۋىنا بايلانىستى قازاقستاننىڭ شەت ەلدەردەگى مەكەمەلەرىنىڭ جەدەل بايلانىس جانە «جەدەل جەلى» نومىرلەرىنىڭ ىسكە قوسىلعانى حابارلانعان ەدى.
كەشە دۋبايدان ومان ارقىلى 467 وتانداسىمىز ەلگە جەتكىزىلدى. سونىمەن قاتار Flydubai اۋە كومپانياسى دۋباي قالاسىنان استانا جانە الماتى قالالارىنا ەكى ەۆاكۋاتسيالىق رەيستى ورىندادى. بۇگىنگە دەيىن ەلىمىزگە تاياۋ شىعىس ەلدەرىنەن 946 جولاۋشى قايتارىلعان.
