مەملەكەت باسشىسى نۇرسۇلتان نازارباەۆ ەلورداداعى «سارىارقا» ۆەلوترەگىندە ناۋرىز مەيرامىنا وراي وتكەن مەرەكەلىك شاراعا قاتىستى.
مەرەكەلىك تەاترلاندىرىلعان قويىلىم «جاڭعىرعان تابيعات, باق قونعان ەل», «قازاقستان – نۇرلى جول!», «استانا – ماڭگىلىك ەلدىڭ ورتاسى», «ناۋرىز – نۇرلى جول» اتتى ءتورت بولىمنەن قۇرالدى. شارادا بەلگىلى قازاقستاندىق ونەرپازدار ءان شىرقاپ, بي بيلەدى.
ەلوردا تۇرعىندارى مەن قوناقتارى الدىندا ءسوز سويلەگەن نۇرسۇلتان نازارباەۆ بارشا قازاقستان حالقىن ناۋرىز مەيرامىمەن قۇتتىقتادى.
– قۇرمەتتى قاۋىم, قازاقستاندىقتار, وتانداستار, بارشاڭىزدى ءاز ناۋرىز مەيرامىمەن شىن ءجۇرەكتەن قۇتتىقتايمىن. ءبىزدىڭ بۇل مەرەكەمىز – اتا-بابامىزدان كەلە جاتقان ۇلكەن مەرەكە. كوپ مەملەكەتتەر بۇل كۇندى جاڭا جىل دەپ سانايدى. ءبىزدىڭ تاريحىمىزدا بىرنەشە ءجۇز جىلدان بۇرىن اتاپ, كوكتەمنىڭ العاشقى كۇنىندە اعايىندار ءبىر-بىرىمەن قاۋىشىپ, تۋىسقاندار ءبىرىن ءبىرى قىستان شىعىپ كورىپ, بارلىق ورىن العان جامانشىلىقتاردى كەشىرىپ, ءبىر-بىرىنە كومەكتەسىپ, ناۋرىز كوجە ۇلەستىرىپ جاتاتىن. ءبىز ەلىمىزدىڭ اق تىلەكپەن, بىرلىكپەن تاۋەلسىزدىگىن ورناتتىق. قازاقستاندى ءدۇنيەجۇزىنە بەلگىلى مەملەكەت ەتتىك. قانداي قيىن-قىستاۋ زامان بولسا دا بىرگە بولىپ, بىرلىگىمىزدەن اجىراماي, العا باسىپ كەلە جاتىرمىز. ەلىمىز كوركەيدى, ەل ورداسى – حالىقتىڭ, مەملەكەتتىڭ جۇرەگى بۇكىل دۇنيەجۇزىنە بەلگىلى بولدى, – دەدى ەلباسى.
مەملەكەت باسشىسى ەلىمىزدىڭ بولاشاقتاعى باعدارىنىڭ دا بەلگىلى ەكەندىگىن اتاپ ءوتتى. «قيىندىقتارعا قاراماستان, ءبىزدىڭ حالقىمىز ءاردايىم تۇتاستىعىن ساقتادى جانە العا قاراي سەنىممەن ءجۇرىپ وتىردى. الەمدە داعدارىس كورىنىستەرى بايقالىپ وتىرعان قازىرگى كەزدە دە قازاقستاننىڭ ولاردى ەڭسەرۋگە قاجەتتى رەسۋرستارى جەتكىلىكتى. ءبىزدىڭ ەلىمىز ءوزىنىڭ بۇدان ءارى دامۋىنىڭ جوسپارلارىن, سونىڭ ىشىندە «قازاقستان-2050» ستراتەگياسىن, «نۇرلى جول» باعدارلاماسىن, جاڭا الەۋمەتتىك جانە ينفراقۇرىلىمدىق نىسانداردىڭ جوبالارىن ازىرلەپ, جۇزەگە اسىرۋدا. وسىنىڭ بارىنە حالىقتىڭ بىرلىگى, ءبىر-بىرىنە دەگەن قۇرمەتى مەن سەنىمى, ەلدىڭ تۇراقتىلىعى قاجەت. ەگەر ءبىز تاڭداعان جولىمىزدان اۋىتقىماي جۇرەتىن بولساق, قازاقستاننىڭ بولاشاعى بۇدان دا جارقىن بولادى. تابىستى بولايىق, امان بولايىق. ناۋرىز قۋانىش, باقىت, بەرەكە الىپ كەلسىن!» – دەدى نۇرسۇلتان نازارباەۆ.
مەرەكەلىك كونتسەرتتەن كەيىن مەملەكەت باسشىسى «استانا-ارەنا» ستاديونىنىڭ جانىنان ناۋرىز مەيرامىنا ارنايى قۇرىلعان ەتنواۋىلدى ارالاپ, قالا تۇرعىندارىمەن جۇزدەستى. ەلىمىزدەگى ءتۇرلى ەتنوستىڭ ونەرىن تاماشالادى.
«بۇگىن – تاماشا مەرەكە. كوكتەمنىڭ جارقىراپ تۇرعان كۇنى. قىس ءبىتىپ, جىلۋ كەلىپ, تابيعاتتىڭ بارلىعى ءتىرىلىپ, بارلىعى قۋاناتىن كەز. وسى كەزبەن ءبىزدىڭ ناۋرىز دەگەن ءداستۇرلى, ۇلى مەرەكەمىز, ۇلىستىڭ ۇلى كۇنى تۋرا كەلەدى. اتا-بابامىزدان قالعان ءداستۇر بويىنشا بۇل كۇنى اعايىندار ءبىر-ءبىرىن كەشىرىپ, ءبىر-بىرىمەن قاۋىشىپ, جاقسىلىق, بەرەكە, باقىت تىلەيدى. كەلەسى جىلعا دەيىن ەل امان, جۇرت تىنىش بولسىن دەيدى. سوندىقتان, ءبىز دە بۇگىن قازاقستاننىڭ بارلىق تۇكپىرىندە ناۋرىز مەرەكەسىن تويلاپ جاتىرمىز. بارشا قازاقستان حالقىنا سالەمىمدى جولداپ, اماندىق پەن جاقسىلىق تىلەيمىن! بارشامىز بولىپ ەلىمىز امان, جۇرتىمىز تىنىش بولسىن دەپ تىلەيتىن بولساق, الدىمىزعا قويعان ماقساتتار مەن حالىقتىڭ بولاشاعىنا جۇمسالاتىن كۇش-قۋات جۇزەگە اسىپ, ەلىمىز بەرەكەلى بولادى. ناۋرىز قۇتتى بولسىن!» – دەدى ەلباسى ەتنواۋىلدا سويلەگەن سوزىندە.
الاڭدا تىگىلگەن وتاۋلاردا ءار ەتنوس وكىلدەرى ۇلتتىق كيىمدەرىن كيىپ, ءان شىرقاپ, جۇرتشىلىققا ناۋرىز كوجە تاراتتى. سونىمەن قاتار, ەتنواۋىلعا كەلگەن قالا تۇرعىندارى مەن قوناقتارى ۇلتتىق سپورت سايىستارى مەن ويىندارىنا قاتىسىپ, مەيرامعا وراي ۇيىمداستىرىلعان شارالاردى تاماشالادى. مەملەكەت باسشىسى وسى ەتنواۋىلدا ناۋرىز كوجەدەن ءدام تاتتى.
دينارا بىتىكوۆا,
«ەگەمەن قازاقستان».
سۋرەتتەردى تۇسىرگەندەر
س.بوندارەنكو, ب.وتارباەۆ.
