بۇل كىتاپحانانىڭ باتىس قازاقستان يننوۆاتسيالىق-تەحنولوگيالىق ۋنيۆەرسيتەتىنە قاراستى سالالىق تەحنولوگيالار ينستيتۋتىمەن بىرگە جۇزەگە اسىرعان جاڭا جوباسى بولاتىن. وسى ينستيتۋتتىڭ ساۋلەت ماماندىعىندا وقىپ جۇرگەن 5-كۋرس ستۋدەنتتەرى تاتيانا دۋدىكينا مەن دياس تايشۋرين ورال قالاسىنداعى باتىس قازاقستان وبلىستىق تاريحي-ولكەتانۋ مۋزەيى مەن قادىر مىرزا ءالى اتىنداعى وبلىستىق مادەنيەت جانە ونەر ورتالىعى عيماراتىنىڭ شاعىن ماكەتىن جاساعان. ال كىتاپحانا قىزمەتكەرلەرى بولسا وسى تاريحي عيماراتتار جايلى تولىق اقپاراتتى برايل قارپىندە دايارلاپ, اتالعان نىسانداردىڭ بەدەرلى-گرافيكالىق سۋرەتتەرى بار كىتاپشا ازىرلەگەن.
ءىس-شارا وتە قىزىقتى ءوتتى. وعان ۋنيۆەرسيتەت رەكتورى بەكبولات شاكەشەۆ, ينستيتۋت ديرەكتورى, تەحنيكا عىلىمدارىنىڭ كانديداتى باۋىرجان بيلاشەۆ, ساۋلەت جانە قۇرىلىس كافەدراسىنىڭ مەڭگەرۋشىسى نۇرلان بەكقاليەۆ, قازاقستاننىڭ قۇرمەتتى ساۋلەتشىسى, ساۋلەت جانە قۇرىلىس كافەدراسىنىڭ اعا وقىتۋشىسى, ماكەتتەردى دايىنداۋدا جەتەكشىلىك ەتكەن مامان مايرا سارسەنعاليەۆا مەن ماكەت اۆتورلارى ارنايى كەلىپتى. ال عيماراتپەن تانىسۋعا كەلگەن وبلىستىق كورۋ قابىلەتى بۇزىلعان بالالارعا ارنالعان ارناۋلى مەكتەپ-ينتەرناتى تاربيەلەنۋشىلەرىنىڭ, ارناۋلى كىتاپحانا وقىرماندارىنىڭ العان اسەرىندە شەك جوق.
– ماكەتكە قولىم تيگەننەن-اق بۇل عيماراتتىڭ ءبىزدىڭ ولكەتانۋ مۋزەيىمىز ەكەنىن بىردەن ءبىلدىم. ويتكەنى بۇرىن كوردىم عوي, وسىنداي كىشكەنە مۇنارالارى بولعانى ەسىمدە قالىپتى. وقۋشى كەزىمىزدە مۋزەيگە كەلەتىنبىز, بالالىق شاقتىڭ ەستەلىكتەرى جادىمدا جاڭعىرىپ, قۋانىپ قالدىم. ادەمى ماكەتتى جاساعان ستۋدەنتتەرگە مىڭ العىس, ونەرى ۇستەي بەرسىن! بۇعان قوسا ءبىزدىڭ كىتاپحانانىڭ قىزدارى ماعلۇماتى مول كىتاپشا دايىنداپتى. مۇنداعى QR كود ارقىلى بۇكىل اقپاراتتى داۋسىمەن تىڭداۋعا دا بولادى. بىزگە عاجايىپ اسەر سىيلاعان ۇجىمعا راحمەت ايتامىز! – دەيدى كىتاپحانا وقىرمانى, ورال قالالىق №2 ەمحانانىڭ لوگوپەد-دەفەكتولوگى بيبىگۇل مولداشەۆا.
زەينەتكەر تاتيانا گورشكوۆا دا جاسىراق كەزىندە مۋزەي عيماراتىن ەمىس-ەمىس كورگەنىن ايتادى. بىراق ونىڭ ءسان-ساۋلەتىن ءدال وسىلاي انىق, ناقتى سەزىنبەگەن ەكەن.
– قادىر سارايدا ءوزىم بىرنەشە جىل قىزمەت ەتتىم, ساحناسىندا تالاي ءان سالدىم. بىراق ونىڭ عيماراتى وسىنداي جارتى شەڭبەر ەكەنىن بىلمەپپىن, – دەپ تاڭ-تاماشا قالدى قازاقستاننىڭ ەڭبەك سىڭىرگەن قايراتكەرى, بەلگىلى ءانشى حاتيموللا بەردىعاليەۆ اعامىز.
ءىس-شارا سوڭىندا كىتاپحانا ديرەكتورى مارفۋعا ايتقاليەۆا «تاكتيلدى ورال» جوباسىن اتقارۋعا كومەكتەسكەن ۋنيۆەرسيتەت ۇجىمىنا, ماكەتتەردى دايىنداۋعا قول ۇشىن بەرگەن جەتەكشى مامان مەن ستۋدەنتتەرگە وقىرماندار اتىنان ريزاشىلىق ءبىلدىرىپ, العىس حات تابىستادى.
باتىس قازاقستان وبلىسى
