فوتو: Polisia.kz
اتا-انالاردىڭ ايتۋىنشا, پوليتسيا قىزمەتكەرلەرى ورتالىقتاعى بەينەجازبالاردى زاتتاي دالەل رەتىندە العان. ولار مەكەمە جۇمىسىن جالعاستىرۋى مۇمكىن دەپ قاۋىپتەنەدى. سونىمەن قاتار كىنالى تۇلعالاردىڭ جاۋاپكەرشىلىكتەن جالتارۋ قاۋپى دە ايتىلىپ وتىر.
اتا-انالار چاتتار ارقىلى ۇندەۋ جاريالاپ, بالالارعا بىرنەشە رەت زورلىق جاسالعانىن جەتكىزدى. قۇزىرلى ورگانداردان كىنالىلەردى جاۋاپقا تارتۋ سۇرالعان. اتا-انالار ەرەكشە دياگنوزى بار بالالاردىڭ ەڭ ءالسىز توپقا جاتاتىنىن ايتىپ, كومەككە شاقىرعان.
اتا-انالاردىڭ تاعى ءبىر شاعىمى بويىنشا, ورتالىق قىزمەتكەرلەرىنىڭ ءبىرى تىكەلەي ەفير كەزىندە بالالاردىڭ بەت-الپەتىن كورسەتىپ, ولاردى «مۋميا» دەپ اتاعان.
سونىمەن قاتار ترەنەرلەردىڭ كاسىبي بىلىكتىلىگىنە قاتىستى كۇمان ايتىلعان. اتا-انالار كەيبىر مامانداردىڭ بەيىندىك جوعارى ءبىلىمى جوق, ال سەرتيفيكاتتار قىسقا مەرزىمدى كۋرستاردان كەيىن بەرىلگەنىن العا تارتادى.
بالالار قۇقىعىن قورعاۋ جونىندەگى ۋاكىل دينارا زاكيەۆا قازىرگى ۋاقىتتا قۇزىرلى ورگاندار تەكسەرۋ جۇرگىزىپ جاتقانىن مالىمدەدى. ونىڭ ايتۋىنشا, ورتالىق – جەكە ۇيىم. قازىر سوتقا دەيىنگى تەرگەۋ باستالىپ, بەينە ماتەريالدار تاركىلەندى.
وقيعاعا بايلانىستى الماتى قالاسىندا قىلمىستىق ءىس قوزعالدى. قالالىق پوليتسيا دەپارتامەنتى جان-جاقتى تەرگەۋ امالدارى جۇرگىزىلىپ جاتقانىن حابارلادى.
«تەرگەۋ بارىسىندا وقيعانىڭ بارلىق ءمان-جايى وبەكتيۆتى تۇردە انىقتالادى. قۇقىق قورعاۋ ورگاندارى ىقتيمال قۇقىق بۇزۋشىلىققا ىقپال ەتكەن سەبەپتەر مەن جاعدايلاردى زەرتتەپ جاتىر. بولاشاقتا مۇنداي فاكتىلەردىڭ الدىن الۋ شارالارى قابىلدانادى», دەلىنگەن پوليتسيا حابارلاماسىندا.
قازىرگى كەزدە بەينەباقىلاۋ كامەرالارىنىڭ جازبالارى الىنىپ, ساراپتاما جۇرگىزىلىپ جاتىر. وقيعاعا قاتىسى بار كۋاگەرلەر مەن تاراپتاردان جاۋاپ الىنىپ, قاجەتتى پروتسەسسۋالدىق ارەكەتتەر بەلگىلەندى. تەرگەۋ بارىسى قالالىق پوليتسيا دەپارتامەنتى باسشىلىعىنىڭ باقىلاۋىندا تۇر. قورىتىندىسىندا بارلىق قاتىسۋشى تۇلعالاردىڭ ارەكەتىنە قۇقىقتىق باعا بەرىلىپ, زاڭناماعا سايكەس شەشىم قابىلدانادى.
