سۋىت حابار جەتىسىمەن جەدەل شتاب قۇرىلىپ, وبلىستىق توتەنشە جاعدايلار دەپارتامەنتى مەن دەنساۋلىق ساقتاۋ باسقارماسى تاراپىنان مەديتسينالىق بريگادالار جەدەل جاساقتالىپ, زارداپ شەككەندەرگە كومەك كورسەتىلدى. قولدا بار بارلىق مۇمكىندىكتەر جۇمىلدىرىلدى. بىلىكتى ماماندار جەدەل جەتىپ, سانيتارلىق اۆياتسيا وقيعا ورنىنا باعىتتالدى.
ششۋچينسك قالاسىنداعى جاعدايدى وبلىس اكىمى مارات احمەتجانوۆ جەدەل شتاب مۇشەلەرىمەن تالقىلادى. وقىس وقيعانىڭ سالدارىن جويۋ شارالارى, سونداي-اق زارداپ شەككەندەردىڭ جاعدايى تۋرالى اۋدان اكىمى اراي سادىقوۆ, توتەنشە جاعدايلار دەپارتامەنتى باسشىسىنىڭ ورىنباسارى مۇرات قانعوجينوۆ, دەنساۋلىق ساقتاۋ باسقارماسىنىڭ باسشىسى ناريمان ەرمەك, جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى شولپان راحماتۋللينا باياندادى.
«ازاماتتاردىڭ قاۋىپسىزدىگى باسىمدىق بولىپ قالۋعا ءتيىس. وسى باعىتتا قوسىمشا شارالار قابىلداپ, زارداپ شەككەن وتباسىلارعا جان-جاقتى قولداۋ كورسەتەمىز», دەپ اتاپ ءوتتى م.احمەتجانوۆ.
وبلىس اكىمى زارداپ شەككەندەر مەن قازا بولعانداردىڭ وتباسىلارىنا جان-جاقتى كومەك كورسەتۋدى, مەديتسينالىق كومەكتىڭ ۋاقتىلى جاسالۋىن, جەدەل جاردەم بريگادالارىنىڭ تاۋلىك بويى كەزەكشىلىگىن ۇيىمداستىرۋدى, سونداي-اق وقيعا سەبەپتەرىن وبەكتيۆتى تەرگەۋدى, كىنالىلەردى جاۋاپكەرشىلىككە تارتۋدى, قاۋىپسىزدىك تالاپتارى ساقتالۋىنىڭ باقىلاۋىن كۇشەيتۋدى تاپسىردى.
قازا بولعانداردىڭ جاقىندارىنا 2 ملن تەڭگە كولەمىندە بىرجولعى تولەمدەر بەرىلدى. بۇعان قوسا ءدامحانا يەسى قوسىمشا ءار وتباسىنا 2 ملن تەڭگەدەن تولەدى. ومىرلىك قيىن جاعدايعا تاپ بولعان 5 وتباسىنىڭ نەسيەلەرى دەمەۋشىلىك قاراجات ەسەبىنەن وتەلەدى. سونداي-اق زاڭناماعا سايكەس الەۋمەتتىك تولەمدەر تاعايىندالادى.
مۇنداي جاعداي وڭىردە ءبىرىنشى رەت بولىپ وتىر. «تاس تۇسكەن جەرىنە اۋىر» دەمەكشى, جەتى ادامنىڭ ءومىرىن قيعان, ونداعان ادام كۇيىككە شالىنىپ, بەينەت شەككەن وقيعانىڭ سالدارى وڭاي بولماسى انىق. توتەنشە جاعدايلار دەپارتامەنتى جىل بويى جىلىتۋ قۇرىلعىلارىن پايدالانۋ كەزىندە اباي بولۋ كەرەگىن ەسكەرتىپ-اق كەلەدى. سالعىرتتىقتىڭ سوڭى وسىنداي ورنى تولماس وقيعاعا جول اشقانى وكىنىشتى.
اقمولا وبلىسى,
بۋراباي اۋدانى
