«ارگلابينىمىز» بار ءبىز دايىنبىز

دۇنيەجۇزىلىك ساۋدا ۇيىمىنا مۇشە بولۋىمىز ءبىزدىڭ ۇجىمدى دا ۇلكەن قۋانىشقا بولەدى. شىن­دىعىن ايتقاندا, كوپتەن بەرگى تىلەۋىمىز دە وسى ەدى. ويتكەنى, الەم­نىڭ بىرنەشە ەلىندە پاتەنتتەلگەن, سونىڭ ىشىندە زور سۇرانىسقا يە «ارگلابين» ءدارىسىنىڭ كەڭ اۋقىمدا تانىلۋىندا كەدەرگىلەر كەزدەس­پەي قالماي جۇرەتىن. نارىقتىق باسەكەدە تانىمال شەتەلدىك فيتو­پرەپاراتتاردىڭ ءبىرازىنان شيپا­لىق قاسيەتى جاعىنان كەم سوق­پايتىن ءدارى-دارمەكتەرىمىزدى تال­عامپاز تۇتىنۋشىلاردىڭ تاڭداپ الا الۋىنا جول اشىلۋى وتاندىق فارماتسەۆتيكا ءوندىرىسىن جاڭا كوك­جيەكتەرگە باستايتىندىعىمەن كوڭىل وسىرەدى. وسىناۋ ۇيىم بەرە­تىن ارتىقشىلىقتاردى پايدالانا بىلۋگە قۇشتار ەدىك, ەندى ءساتى ءتۇسىپ وتىرۋى ءىس-ىزدەنىستەردى ودان سايىن ەسەلەۋگە ۇمتىلدىرادى. قازىر بىزدە جاھاندىق نارىق تالاپتارىنا ساي بولۋعا تولىق جاعداي بار دەۋگە بولادى. اۋرۋ­لاردىڭ بىرنەشە تۇرلەرىن ەمدەۋ­گە قولدانىلاتىن دارىلەردى كەڭ كولەمدە جاسايتىن وندىرىستىك بۋىن قالىپتاستى. جۇمىسىمىزدى جاقسى بىلەتىن ەلباسىنىڭ تىكەلەي قامقورلىعى ارقاسىندا ءۇش ءىرى تسەح ىسكە قوسىلدى. زاماناۋي مە­ديتسينالىق قۇرال-جابدىقتار ونىمدەردىڭ ساپالى ءارى كوزگە ءتۇسىمدى وندىرىلۋىنە مۇمكىندىك بەرىپ وتىر. ىرىكتەلىپ الىنعان مامانداردىڭ كاسىبي شەبەرلىگى جوعارى دەڭگەيدە. جەر­گىلىكتى تابيعي وسىمدىكتەردەن دا­يىن­دالاتىن دارىلىك زاتتارعا شيكى­زات جەتكىلىكتى. ولار دا وزىمىزدە جاسالادى. ياعني, ناعىز فارما­تسەۆ­تي­كالىق بىرەگەي ورتالىق رەتىندە الىس­قا تانىلا الامىز. ماقسا­تى­­مىز دا وسى. ونىمدەرى ءوتىمدى وزىق ­كا­­سىپورىنداردىڭ قاتارى­نان لا­يىق­­­­­­­تى ورىن الاتىنىمىزعا سەنەمىز. قازاقستانىمىزدىڭ ورتاق جە­تىستىگىنە تىلەۋلەس بولعاندىقتان باسقا سالالاردىڭ دا باسەكەگە دايىن بولۋىن ويلايمىز. الايدا, وعان ءبارى بىردەي ساقاداي-ساي ەمەستىگى وكىنتەدى. قيىندىقتارعا تاپ بولۋشىلار از بولمايتىن ءتارىزدى. ءومىر كوندىرمەيتىن, ۇيرەتپەيتىن جاعداي جوق دەسەك, بۇل سىناقتان دا وتە ءبىلۋىمىز كەرەك. ەلىمىزدىڭ ءوسىپ-وركەندەۋىنە جول اشار جاڭا قادامعا ۇلەس قوسۋعا قاجىماس ۇمتىلىس قاجەت. بوراش تىلەۋوۆ, قاراعاندى قالاسىنداعى حالىقارالىق عىلىمي-وندىرىستىك «فيتوحيميا» حولدينگىنىڭ زەرتحانا مەڭگەرۋشىسى, حيميا عىلىمدارىنىڭ دوكتورى. قاراعاندى.