فوتو: تۇركىستان وبلىسى اكىمدىگى
ءىس-شارا جەتىساي اۋدانىنىڭ ج.ەراليەۆ اۋىلدىق وكرۋگىنە قاراستى ۇتىرتوبە ەلدى مەكەنىندە ءوتتى. ەسكەرتكىش تاقتانى ورناتۋ باستاماسىن اۋىل اقساقالدارى كوتەرگەن ەكەن. سالتاناتتى راسىمگە اۋدان اكىمىنىڭ ورىنباسارى نۇركەن المەش, اۋداندىق ءماسليحات دەپۋتاتى ولجاس قانىبەكوۆ, تۇركىستان وبلىستىق جەدەل جاردەم ستانتسياسىنىڭ باسشىسى باقىت مىرزاگەلديەۆ, «اسىقاتا» اۋرۋحاناسى باسشىسىنىڭ ورىنباسارى ەرعالي سوپبەكوۆ قاتىستى.
سونداي-اق مارقۇمنىڭ اناسى ءساليما يشانقۇلقىزى, تۋىستارى, ۇستازدارى مەن اۋىل تۇرعىندارى جينالىپ, اق حالاتتى ابزال جاننىڭ جارقىن بەينەسىن ەسكە الدى.
ۇلدانا قالدارحانقىزى 2017-2021 جىلدارى استانا قالاسىنداعى «دانالىق» كوللەدجىندە «ەمدەۋ ءىسى» ماماندىعى بويىنشا ءبىلىم الىپ, فەلدشەر بىلىكتىلىگىن يەلەنگەن. وقۋ ورنىن ۇزدىك ديپلوممەن تامامداعان جاس مامان كەيىن بايقوڭىر اۋدانى جەدەل جاردەم پودستانتسياسىندا بريگادا اعا-فەلدشەرى بولىپ ەڭبەك ەتتى.
ارىپتەستەرىنىڭ ايتۋىنشا, ول كاسىبي ادالدىعىمەن, شۇعىل جاعدايلاردا باتىل شەشىم قابىلداي بىلەتىن تاباندىلىعىمەن ەرەكشەلەنگەن. قاۋىپتىڭ الدىڭعى شەبىندە ءجۇرىپ, ادام ءومىرىن ساقتاپ قالۋدى باستى مۇرات ەتكەن جاس مامان قىزمەتتىك مىندەتىن اتقارۋ بارىسىندا ەرلىكپەن قازا تاپتى.
استانادا فەلدشەر ۇلدانا مىرزۋاندى اقتىق ساپارعا شىعارىپ سالدى
مەملەكەتتىك ماراپات جانە ەل قۇرمەتى
جيىن بارىسىندا ۇلدانانىڭ ادامگەرشىلىك بولمىسى, ەل ەسىندە قالعان ەڭبەگى تۋرالى جىلى ەستەلىكتەر ايتىلدى.
مەملەكەت باسشىسى قاسىم-جومارت توقاەۆتىڭ جارلىعىمەن ۇلدانا مىرزۋان «ەرلىگى ءۇشىن» مەدالىمەن ماراپاتتالعانى اتاپ ءوتىلدى. مارقۇمعا قۇران باعىشتالىپ, دۇعا جاسالدى.
اۋىلداستارىنىڭ باستاماسىمەن امبۋلاتورياعا ورناتىلعان ەسكەرتكىش تاقتا مەن دەمالىس جانە سپورت ايماعىنا ونىڭ ەسىمىن بەرۋ – ەرلىككە كورسەتىلگەن قۇرمەتتىڭ ايقىن كورىنىسى.
استانادا مەديتسينالىق كوللەدجدەگى دارىسحاناعا ۇلدانا مىرزۋاننىڭ ەسىمى بەرىلەدى
قىسقا عۇمىرىندا كاسىبىنە ادالدىقتىڭ, ادام ءومىرى ءۇشىن كۇرەستەگى جانقيارلىقتىڭ ۇلگىسىن تانىتقان ۇلدانا مىرزۋاننىڭ ەسىمى ەل جادىندا ساقتالادى. بۇل – وتكەنگە تاعزىم عانا ەمەس, كەيىنگى ۇرپاققا امانات.
استانادا فەلدشەر ۇلدانا مىرزۋانعا ارنالعان ەسكەرتكىش تاقتا ورناتىلدى
