© REUTERS / Evelyn Hockstein
ء«بىز ءتورت-بەس اپتاعا جوسپارلاپ وتىرمىز. بۇل ءبىز ءۇشىن قيىندىق تۋعىزبايدى», دەدى دونالد ترامپ اقش پەن ءيزرايلدىڭ يرانعا قارسى ارەكەتتەرى قانشا ۋاقىتقا جالعاسۋى مۇمكىن دەگەن سۇراققا جاۋاپ بەرە وتىرىپ.
سونىمەن قاتار ول Daily Mail گازەتىنە بەرگەن سۇحباتىندا يرانعا قارسى وپەراتسيا ء«تورت اپتاعا جەتپەي اياقتالۋى دا مۇمكىن» ەكەنىن ايتقان. باسىلىمنىڭ جازۋىنشا, اق ءۇي باسشىسى كەلىسسوزدەرگە جول ءالى دە اشىق ەكەنىن جوققا شىعارماعانىمەن, «سويلەسۋ كەرەك ۋاقىت وتكەن اپتادا بولعانىن» اتاپ وتكەن. دەگەنمەن ترامپ تەگەران اقش-تىڭ تالاپتارىن «قاناعاتتاندىرسا», سوققىلاردى ۋاقىتشا توقتاتۋعا مۇمكىندىك بار ەكەنىن دە مەڭزەگەن.
اقش پرەزيدەنتى بۇدان بولەك بەينەۇندەۋ جاريالاپ, امەريكالىق شابۋىلداردان كەيىن قارۋىن تاستاماعان يراندىق كۇشتىك قۇرىلىمدار مەن اسكەري بولىمدەردى ءولىم كۇتىپ تۇرعانىن ەسكەرتتى.
«مەن تاعى دا يسلام رەۆوليۋتسياسى ساقشىلار كورپۋسىن, يران ارمياسى مەن پوليتسياسىن قارۋلارىن تاپسىرۋعا شاقىرامىن. سوندا تولىق يممۋنيتەتكە يە بولادى, بولماسا ءسوزسىز ولىمگە ۇشىرايدى. ءولىم ناقتى بولادى, ءارى ول جاعىمدى بولمايدى», دەدى دونالد ترامپ.
سونداي-اق ول يران حالقىنا ۇندەۋ جاساپ, قازىرگى ءساتتى پايدالانۋ قاجەت ەكەنىن ايتتى. اقش پرەزيدەنتى بۇل ارقىلى ەل ازاماتتارىنا بەرگەن ۋادەسىن ورىنداعانىن العا تارتتى.
«قالعانى وزدەرىڭىزگە بايلانىستى. ءبىز كومەكتەسۋ ءۇشىن سىزدەرمەن بىرگە بولامىز», دەدى ترامپ.
ايتا كەتەيىك, 28 اقپان, سەنبى كۇنى اقش پەن يزرايل يرانعا قارسى اۋقىمدى اسكەري وپەراتسيا باستاعان. تەل-اۆيۆ بيلىگى سوققىلاردىڭ نەگىزگى ماقساتى – تەگەراننىڭ يادرولىق قارۋعا قول جەتكىزۋىنە جول بەرمەۋ ەكەنىن مالىمدەدى. ال دونالد ترامپ يراننىڭ اسكەري فلوتى مەن قورعانىس ونەركاسىبىن جويۋ نيەتىن جاريالاپ, ەل ازاماتتارىن بيلىكتى قۇلاتۋعا ۇندەدى.
جەكسەنبىگە قاراعان ءتۇنى يران بيلىگى ەلدىڭ رۋحاني كوسەمى ءالي حامەنەيدىڭ قازا تاپقانىن حابارلادى. اقپاراتقا سايكەس, اقش پەن ءيزرايلدىڭ سوققىلارى سالدارىنان اياتوللانىڭ قىزى, كۇيەۋ بالاسى, نەمەرەسى مەن كەلىنى دە مەرت بولعان.
بۇقارالىق اقپارات قۇرالدارىنىڭ مالىمەتىنشە, زىمىران سوققىلارى تەك اسكەري نىسانداردى عانا ەمەس, يران اۋماعىنداعى جانە ءوڭىردىڭ وزگە ەلدەرىندەگى ازاماتتىق ينفراقۇرىلىمدى دا قامتىعان. بۇعان جاۋاپ رەتىندە تەگەران يزرايل اۋماعىنا, سونداي-اق تاياۋ شىعىستا ورنالاسقان امەريكالىق اسكەري بازالارعا شابۋىل جاساپ جاتىر.
