سەرىك كارىباي ۇلىنىڭ ەسىمىنە ۇلىتاۋلىقتار ەرتەدەن تانىس. ءداستۇرلى قازاق اندەرىن شەبەر ورىنداۋشى سەرىك وسپانوۆ 1992 جىلى جەزقازعان قالاسىندا تايجان قالماعامبەتوۆ اتىنداعى وبلىستىق مەملەكەتتىك فيلارمونياعا ديرەكتور بولىپ تاعايىندالادى. توعىز جىل ديرەكتور بولعاندا ونەردى عانا ناسيحاتتاپ قويماي, وتباسىلى التى ارتىسكە جاڭا پاتەر, ءۇش ارتىسكە «قازاقستاننىڭ ەڭبەك سىڭىرگەن ءارتىسى» اتاعىن الىپ بەرەدى.
2002 جىلى استانا قالاسىنداعى پرەزيدەنتتىك مادەنيەت ورتالىعىندا جۇمىسىن جالعاستىرادى. حالىق ءارتيسى, كومپوزيتور ە.راحماديەۆ, اقىن ك.سالىقوۆ, عالىم ا.سەيدىمبەكپەن شىعارماشىلىق بايلانىستا بولادى.
2003 جىلى كونكۋرسپەن استانا قالاسى اكىمدىگىنىڭ مادەنيەت باسقارماسىنا قاراستى «تاريحي-مادەني ەسكەرتكىشتەردى قورعاۋ ينسپەكتسياسىنىڭ» باسشىسى قىزمەتىن اتقارعان. وسىدان كەيىن «حالىق شىعارماشىلىعى ورتالىعى», «تاۋەلسىزدىك سارايى» , «ساكەن سەيفۋللين مۋزەيى», «حالىق شىعارماشىلىعى ورتالىعى» جشس, مادەنيەت كوميتەتىنە قاراستى «قازاقستان حالقى رۋحاني جاڭعىرۋ ورتالىعىنىڭ» ۇيىمداستىرۋ جانە مونيتورينگ باسقارماسى سياقتى مەكەمەلەردە باسشىلىق ەتەدى.
2015 جىلى استانا قالاسى مادەنيەت باسقارماسىنا قاراستى «تاريحي-مادەني ەسكەرتكىشتەر مەن رۋحاني قۇندىلىقتاردى ساقتاپ, قالپىنا كەلتىرۋ ديرەكتسياسى» مكقك عىلىمي-زەرتتەۋ ءبولىمىنىڭ مەڭگەرۋشىسى, 2018 جىلى «اتامەكەن» قازاقستان كارتاسى ەتنو-مەموريالدىق مۋزەي-كەشەنى» مۋزەي پەداگوگيكاسى ءبولىمىنىڭ, اقپاراتتىق ءبولىمىنىڭ, ۇيىمداستىرۋ بولىمدەرىنىڭ مەڭگەرۋشىسى بولىپ, زەينەتكە شىعادى.
سەرىك وسپانوۆ – ونەر زەرتتەۋشى. باسشىلىق جۇمىستىڭ شىرماۋىندا قالىپ قويماي ۇنەمى ىزدەنىستە ءجۇردى. ساكەننىڭ 125 جىلدىعىنا وراي «ساكەن سەيفۋللين – ۇلت رۋحانياتىنىڭ كوشباسشىسى», «ساكەن تۇلعاسى تاريح تورىندە» اتتى كىتاپتارى, «ساكەن سەيفۋلليننىڭ مۋزىكالىق مۇراسى» اتتى عىلىمي-زەرتتەۋ ەڭبەگى جارىق كورەدى. ءبىر سوزبەن ايتقاندا − ساكەنتانۋشى.
2018 جىلى بالۋان شولاق زەرتتەۋشى, مەتسەنات مارات نابيەۆتىڭ قولداۋىمەن «بالۋان شولاقتىڭ ءومىرى مەن مۋزىكالىق مۇراسى» ەڭبەگى CD ديسك اندەرىمەن, بەرتىندە «سەگىز سەرىنىڭ ءومىرى مەن مۋزىكالىق مۇراسى» ەڭبەگى وقىرماننىڭ قولىنا ءتيدى.
زەينەتكە شىقسا دا, قول قۋسىرىپ قاراپ وتىرمادى. ۇلىتاۋ وبلىسى اشىلعاندا كۇنى كەشە ءوزى قىزمەت ەتكەن وڭىرگە ورالدى. بۇل كۇنى ۇلىتاۋ وبلىسىنىڭ مادەنيەت, تىلدەردى دامىتۋ جانە ارحيۆ ءىسى باسقارماسىنىڭ «وبلىستىق مادەني-ساۋىق جانە شىعارماشىلىق عىلىمي-ادىستەمەلىك ورتالىعىندا» حالىق شىعارماشىلىعى بولىمىنە جەتەكشىلىك ەتەدى.
«مادەنيەت سالاسىنىڭ ۇزدىگى» سەرىك وسپانوۆتىڭ ەڭبەك جولىنا ارنالعان كەشتە كورسەتىلگەن بەينەباياننان كورەرمەندەر ونەر يەسىنىڭ ءومىر جولى مەن شىعارماشىلىعىمەن تانىستى. ونەر جاناشىرىنىڭ مادەنيەت سالاسىندا جاۋاپتى باسشىلىق قىزمەت اتقارىپ قويماي, ەلىمىزدە جانە شەتەل ساحنالارىندا ونەر كورسەتكەن ءانشى, تەرمەشى رەتىندە تانىلعانىنىڭ كۋاسى بولدى.
مەملەكەت جانە قوعام قايراتكەرى, مەتسەنات ايتاش اليەۆ, قازاقستاننىڭ ەڭبەك سىڭىرگەن قايراتكەرى, ءانشى-سازگەر قوراباي ەسەنوۆ, قازاقستاننىڭ ەڭبەك سىڭىرگەن قايراتكەرى, كۇيشى-كومپوزيتور جاعىپار ءالىمحانوۆ, مادەنيەت سالاسىنىڭ ۇزدىگى گۇلسارا جيەناليەۆا كەشتىڭ قادىرلى قوناعى بولدى. سونىمەن قاتار ۇلىتاۋ وڭىرىندەگى وبلىستىق, قالالىق, اۋداندىق ارداگەرلەر ۇيىمدارىنىڭ توراعالارى مەن «اق اجەلەر» ءانسامبلى قاتىستى.
ونەر زەرتتەۋشى سەرىك كارىباي ۇلىنىڭ « ۇلىتاۋ ءوڭىرى سال-سەرىلەرى مەن ءانشى, كۇيشى, اقىندارى» اتتى مونوگرافياسىنىڭ تۇساۋكەسەر ءراسىمى ءوتتى. جاڭا كىتاپتىڭ تۇساۋىن ۇلىتاۋ وبلىسى ارداگەرلەر كەڭەسىنىڭ توراعاسى ساعىندىق ۇسەن ۇلى, ساكەن سەيفۋلليننىڭ ۇرپاعى ايتاش سىزدىق ۇلى جانە شىنبولات دىلدەباەۆتىڭ جارى, مادەنيەت جاناشىرى گۇلسارا قوڭىربايقىزى كەستى.
قوعام قايراتكەرى ايتاش سىزدىق ۇلى قۇتتىقتاۋ ءسوز سويلەپ, ونەر يەسىنە دومبىرا تارتۋ ەتتى.
قازاقستاننىڭ ەڭبەك سىڭىرگەن قايراتكەرى جاعىپار ءالىمحانوۆ «كوكەيكەستى» كۇيىن ورىندادى. سەرىك وسپانوۆتىڭ شاكىرتى گۇلداۋرەن جيدەباەۆا «اقداريعا» ءانىن شىرقادى. «ۇلار» ادەبي كلۋبىنىڭ مۇشەلەرى ونەر يەسىنە ارناعان ولەڭدەرىن وقىدى.
كەش سوڭىندا قوناقتارعا العىس حات پەن مەرەكەلىك سىي-سياپاتتار تابىستالدى.
ۇلىتاۋ وبلىسى
