«جاڭا كونستيتۋتسيا جوباسىندا مەملەكەتىمىزدىڭ زايىرلى سيپاتىن بۇرىنعىدان دا ايقىنداي تۇسەتىن نورما ەنگىزىلدى. قولدانىستاعى كونستيتۋتسيانىڭ ءبىرىنشى بابىندا قازاقستان ءوزىن دەموكراتيالىق, زايىرلى, قۇقىقتىق جانە الەۋمەتتىك مەملەكەت رەتىندە ورنىقتىراتىنى كورسەتىلگەن بولسا, ەندى بۇل قاعيدات دەربەس ءارى اۋقىمدى تۇردە ناقتى بەكىتىلىپ وتىر», دەپ جازدى مينيستر.
ونىڭ ايتۋىنشا, بۇل وزگەرىس ەڭ الدىمەن ازاماتتاردىڭ ءدىني سەنىمىنە, ءداستۇرى مەن جەكە تاڭداۋىنا قۇرمەتتى كۇشەيتۋگە باعىتتالعان.
«اسىرەسە, ايلاردىڭ سۇلتانى – رامازان ايىندا, كوپتەگەن ادام ار-وجدان, ادامگەرشىلىك, ىشكى ءتارتىپ پەن ءوزارا قۇرمەت ماسەلەلەرىنە ايرىقشا ءمان بەرەدى. سوندىقتان مۇنداي نورمالار تۋرالى جان-جاقتى سالماقتاپ, بايىپپەن پايىمداۋ ماڭىزدى», دەيدى ايدا بالاەۆا.
مينيستر جاڭا جوباداعى 7-باپتىڭ 1-تارماعىندا ء«دىن مەملەكەتتەن بولەك» دەگەن قاعيدانىڭ ناقتى جازىلۋىن ماڭىزدى ينستيتۋتسيونالدىق قادام رەتىندە باعالادى.
«زايىرلى مەملەكەت – ءدىندى جوققا شىعارادى دەگەن ءسوز ەمەس. بۇل – جاۋاپكەرشىلىك اياسىن ايقىنداۋ. مەملەكەتتىك ساياسات ءدىني نورمالارعا ەمەس, زاڭعا نەگىزدەلەدى. ەشبىر ءدىن مەملەكەتتىك نەمەسە مىندەتتى دەپ ەسەپتەلمەيدى. ازاماتتاردىڭ بارلىعى ءوز ءدىنى مەن سەنىمىنە قاراماستان تەڭ قۇقىلى», دەپ اتاپ ءوتتى ا. بالاەۆا.
ءمينيستردىڭ سوزىنشە, الداعى ۋاقىتتا ءدىني بىرلەستىكتەردىڭ قىزمەتى, قۇقىعى مەن جاۋاپكەرشىلىگىن رەتتەيتىن جەكە زاڭ قابىلداناتىنى ايتىلعان. كونستيتۋتسيا قۇندىلىقتىق نەگىزدى بەلگىلەسە, سالالىق زاڭدار سول نورمالاردى جۇزەگە اسىرۋ ءتارتىبىن ناقتىلايدى.
سونداي-اق جاڭا باپتا ءدىني ۇيىمداردىڭ قىزمەتى زاڭ اياسىندا جۇزەگە اساتىنى, ال كونستيتۋتسيالىق قۇرىلىس, ادام قۇقىقتارى مەن بوستاندىقتارىن, ۇلتتىق قاۋىپسىزدىك پەن قوعامدىق ءتارتىپتى قورعاۋ ماقساتىندا بەلگىلى ءبىر شەكتەۋلەر قويىلۋى مۇمكىن ەكەنى كورسەتىلگەن. بۇل – ار-وجدان جانە ءدىني سەنىم بوستاندىعى مەن قوعام الدىنداعى ورتاق جاۋاپكەرشىلىك اراسىنداعى تەپە-تەڭدىكتى ساقتاۋ دەگەن ءسوز.
ايدا بالاەۆا بۇل وزگەرىستەر جوباداعى 25-باپپەن تىكەلەي ۇندەس ەكەنىن دە اتاپ ءوتتى. وندا ءار ادامنىڭ ار-وجدان بوستاندىعىنا قۇقىعى بار ەكەنى بەكىتىلە وتىرىپ, وسى قۇقىقتى پايدالانۋ جالپىادامزاتتىق قۇندىلىقتار مەن مەملەكەت الدىنداعى مىندەتتەرگە نۇقسان كەلتىرمەۋى ءتيىس ەكەنى ناقتى جازىلعان.
ديحان قامزابەك ۇلى: قازاقستاننىڭ ءبىلىم بەرۋ ساياساتىنداعى زايىرلى قاعيداتتاردى بەكىتۋ قاجەت
وسىلايشا, جاڭا كونستيتۋتسيا جوباسىنداعى تۇزەتۋلەر قولدانىستاعى نورمالاردى كۇشەيتە وتىرىپ, كونفەسسياارالىق كەلىسىمدى, قۇقىقتىق ءتارتىپ پەن قوعامدىق تۇراقتىلىقتى نىعايتۋعا باعىتتالعان. ەڭ باستىسى – ءار ادامنىڭ سەنىمىنە قۇرمەت ساقتاي وتىرىپ, زاڭ الدىنداعى ورتاق جاۋاپكەرشىلىكتى بەكەمدەۋ.
