1 ناۋرىزدا اتاپ وتىلەتىن بۇل كۇن ەلدىڭ وتكەنى مەن بۇگىنىنە ءۇڭىلىپ, بىرلىك پەن باۋىرمالدىقتىڭ قادىرىن سەزىنۋگە شاقىرادى.
العىس ايتۋ كۇنى – تاعدىر تالكەگىنە تۇسكەن ءتۇرلى ەتنوس وكىلدەرىن قازاق جەرى باۋىرىنا باسىپ, امان الىپ قالعان كەزەڭ مەن بۇگىنگى بەيبىت كۇن ءۇشىن شۇكىرلىكتى ەسەلەيتىن مەزەت. حح عاسىردىڭ اۋىر جىلدارى – ستاليندىك رەجيم كەزىندە قازاقستانعا ءتۇرلى ەتنوستار – 800 مىڭعا جۋىق نەمىس, 102 مىڭ پولياك, 550 مىڭ سولتۇستىك كاۆكاز حالىقتارىنىڭ وكىلى, 18,5 مىڭ قيىر شىعىستاعى كورەي وتباسى قونىس اۋداردى.
قازاقستانعا كۇشتەپ قونىس اۋدارىلعان ميلليونداعان ادامدى قازاق حالقى جاتسىنباي قابىلداي ءبىلدى. ال ءوز كەزەگىندە ەلىمىزدەگى ءتۇرلى ەتنوس وكىلدەرى بۇل قايىرلى ارەكەتتى ارقاشان باعالاپ, بىرلىك تۋىن بيىك ۇستاۋعا بىرلەسە كۇش سالىپ ءجۇر.
سول سەبەپتى بۇل مەرەكەنى مەيىرىم مەرەكەسىنە بالاۋعا بولادى. سونداي-اق ءمانى تەرەڭ, ماڭىزى جوعارى مەيرام تاريحي جادى مەن ۇلتتىق جاۋاپكەرشىلىكتى قاتار دارىپتەيتىنىن اتاپ وتكەنىمىز ءجون.
ەلىمىزدە العىس ايتۋ كۇنى 2016 جىلدان بەرى رەسمي تۇردە اتاپ وتىلەدى. بۇل كۇننىڭ 1 ناۋرىزعا بەلگىلەنۋى دە بەكەر ەمەس. سەبەبى 1995 جىلدىڭ ءدال وسى كۇنى قازاقستان حالقى اسسامبلەياسى قۇرىلعان ەدى.
جاھاندا گەوساياسي احۋال ۋشىققان قازىرگى كەزەڭدە مەرەكەنىڭ ماڭىزى ارتا تۇسكەندەي... بۇل تۋرالى پرەزيدەنت قاسىم-جومارت توقاەۆ ءوز قۇتتىقتاۋىندا ايرىقشا توقتالدى.
ء«وزارا قۇرمەت كورسەتۋ, وزگەگە جاناشىرلىقپەن قاراپ, شىنايى تىلەۋلەس بولۋ – ۇلتىمىزدىڭ بويىنا سىڭگەن قاسيەتتەر. العىس ايتۋ ءداستۇرى ءتول رۋحانياتىمىزدىڭ تەمىرقازىعى رەتىندە ەل ىشىندەگى سەنىم مەن بىرلىكتى نىعايتۋعا زور ىقپال ەتىپ كەلەدى. جاقىندارىمىزعا العىس ايتۋ – ولارعا رۋحاني قولداۋ كورسەتۋ, قيىن كەزدە قول ۇشىن سوزۋ دەگەن ءسوز. قازىرگى قۇبىلمالى زاماندا بۇل قاسيەتتىڭ ءمان-ماڭىزى ەرەكشە», دەپ اتاپ ءوتتى مەملەكەت باسشىسى.
مەملەكەت باسشىسى العىس ايتۋ كۇنىن وتكەنگە تاعزىم جاساپ قانا قويماي, بولاشاققا جاۋاپكەرشىلىكپەن قاراۋعا ۇندەيتىن مەرەكە رەتىندە سيپاتتايدى. پرەزيدەنت پىكىرىنشە, تاريحتاعى قيىن كەزەڭدەردى ۇمىتپاۋ – ەلدىڭ تۇتاستىعىن ساقتاۋدىڭ باستى كەپىلى.
الەم ەلدەرىندەگى – ريزاشىلىق كۇنى
جۇرەكتى جاقسىلىققا تولتىراتىن العىس ايتۋ قاسيەتى تەك قازاقستانعا ءتان قۇندىلىق ەمەس. الەمنىڭ كوپتەگەن ەلىندە دە ريزاشىلىق پەن شۇكىرشىلىككە نەگىزدەلگەن مەرەكەلەر بار. ماسەلەن, قاراشانىڭ ءتورتىنشى بەيسەنبىسى اقش-تا Thanksgiving Day (العىس ايتۋ, ريزاشىلىق ءبىلدىرۋ) كۇنى تويلانادى. بۇل كۇنى اقش حالقى جاراتقانعا, تابيعاتقا, ومىرگە جانە بىرلىككە شۇكىرلىك ەتىپ, العىس جاۋدىرادى. امەريكالىقتار ءۇشىن Thanksgiving Day وتباسىلىق مەرەكە سانالادى. سوندىقتان اتاۋلى داتادا ولار داستارقان باسىنا جينالدى. كانادادا قازان ايىنىڭ ەكىنشى دۇيسەنبىسى – Thanksgiving (العىس ءبىلدىرۋ) كۇنى مەرەكەلەنەدى. بۇل ەلدە العىس ءبىلدىرۋ كۇنى ەگىن جيناۋ ماۋسىمىمەن تىعىز بايلانىستى. مەرەكە ءمانى جاقسىلىققا ريزاشىلىق ءبىلدىرۋ, تابيعاتتىڭ سىيىن باعالاۋمەن استاسىپ جاتىر.
مەملەكەت باسشىسى ەل ازاماتتارىن العىس ايتۋ كۇنىمەن قۇتتىقتادى
جاپونيا جۇرتى 23 قاراشا كۇنى ەڭبەككە العىس ايتۋ كۇنىن اتاپ وتەدى. اتالعان مەيرامدا ولار ەڭبەك ادامىن, ءوندىرىس پەن قوعامنىڭ دامۋىنا قۇرمەت كورسەتىپ, قوعامداعى ءاربىر ەڭبەكتىڭ ماڭىزىن سەزىنۋگە, قادىرىن قاشىرماۋعا ۇندەيدى. ال 21 قىركۇيەك كۇنى تورتكۇل دۇنيە حالىقارالىق ريزاشىلىق ءبىلدىرۋ كۇنىن اتاپ وتەدى.
