اقش: 13 جاسار ءجاسوسپىرىم 6-داعى ءىنىسىن اتىپ تاستادى

استانا. 26 ناۋرىز. امەريكانىڭ فلوريدا شتاتىنداعى حادسون قالاسىندا 13 جاسار بالا ءوزىنىڭ 6-داعى ءىنىسىن اتىپ ءولتىرىپ, ۇلكەنىن جاراقاتتاعان. سودان كەيىن ءوزىن ولتىرگەن. بۇل تۋرالى Euronews حابارلادى. قاندى وقيعا ورىن العان كەزدە ۇيدە وتباسىنىڭ ءۇش بالاسى عانا بولعان. ۇلكەندەر ۇيدە بولماعان. 13 جاسار ءجاسوسپىرىم 6-داعى ءىنىسىن تاپانشامەن اتىپ ءولتىرىپ, 16-داعى اعاسىن جاراقاتتاپ تاستاعان. سوسىن شۇرىپپەنى وزىنە باعىتتاعان. پوليتسيانى جاراقاتتانىپ قالعان بالا شاقىرعان. وكرۋگتىڭ شەريفى كريس نوككونىڭ ايتۋىنشا, اعايىندى ءۇش بالا اس كەزىندە ءبىر-بىرىمەن تاماققا بولا كەلىسە الماي قالعان. «بالالاردىڭ جاسىن ەستىگەن كەزدە, بولعان وقيعانىڭ قانشالىقتى سۇمدىق ەكەنىن بىلە تۇسەسىڭ, - دەدى شەريف. -  انە, التى جاستاعى بالا ءوزىنىڭ بولمەسىندە ويناپ وتىرعان. سوسىن تالاس تۋا سالىپ, ول ءولىپ كەتەدى. وسى سۇمدىق كورىنىستى كورگەن پوليتسەيدىڭ وزىنە پسيحولوگيالىق كومەك كەرەك بولدى». «وتباسى حادسونداعى جىلجىمالى ۇيلەر ساياباعىنداعى ترەيلەرلەردىڭ بىرىندە تۇرعان. وكرۋگ شەريفى پاسكو كريس نوككو ءجاسوسپىرىمنىڭ كەشكى جەتى جارىمعا تاياۋ ۋاقىتتا وق اتقانىن ايتادى. بىراق اتقان ءجاسوسپىرىم مەن ونىڭ قۇربانى بولعان ءىنىسىنىڭ اتى ايتىلمايدى. ال جاراقات الىپ قالعان ۇلكەنى اۋرۋحاناعا جەتكىزىلگەن. ونىڭ ومىرىنە ءتونىپ تۇرعان قاۋىپ جوق. بالالار سول كەزدە ۇيدە وزدەرى قالعان. ولاردىڭ اناسى جۇمىستا بولعان. بالالاردىڭ 18-دەگى اعاسى دا سىرتقا شىعىپ كەتكەن. قالعان ءۇش بالا تاماق ءىشىپ وتىرىپ, ءبىر نارسەگە كەلىسە الماعان. سول كەزدە ولاردىڭ ورتانشىسى تاپانشا الىپ كەلىپ, قالعان ەكەۋىن اتقان. سوڭىنان ءبىر وقتى وزىنە جۇمساعان. ازىرگە بۇل ۇيگە قارۋدىڭ قايدان كەلگەنى, ونىڭ كىمدىكى ەكەنى بەلگىسىز», - دەپ حابارلادى Amerika.Ru.com. اقش-تا بالالارعا وتتى قارۋدى ۇستاي ءبىلۋ كوپ جاعدايدا ەرتە باستان ۇيرەتىلەدى. وتكەن جىلعى تامىزدا اريزونا شتاتىندا 9 جاسار قىز ۋزي تاپانشا-پۋلپەمەتىن قولىندا ۇستاپ تۇرا الماي, وزىنە اتۋدى ۇيرەتىپ تۇرعان نۇسقاۋشىنى ءولىمشى ەتىپ جاراقاتتادى. امەريكادا وتتى قارۋدىڭ تاراۋ دەڭگەيى ءتىپتى ءاۆتوموبيلدىڭ تانىمالدىلىعىنان دا جوعارى. قازىر اقش-تاعى 315 ملن. ادامنىڭ قولىندا 270 ميلليونعا جۋىق وتتى قارۋ بار. بىلايشا ايتقاندا, بۇل – ءاربىر 100 امەريكالىق ازاماتتىڭ 89-ى قارۋلانىپ العان دەگەن ءسوز. مۇرات ايتقوجا. مانبە, سۋرەت: Euronews.