قاراعاندى قالالىق كاسىپكەرلىكتى قولداۋ جانە ۇدەمەلى يندۋستريالىق-يننوۆاتسيالىق دامۋدى قولداۋ جونىندەگى ءۇيلەستىرۋ كەڭەسىندە بيزنەس وكىلدەرىنىڭ بىرنەشە جوباسى تالقىعا ءتۇستى. مىسالى, «سارىارقا نان قاراعاندى» جشس-ءنىڭ باس ديرەكتورى دانيار مانامباەۆ كاسىپورىننىڭ عيماراتتان تارشىلىق كورىپ وتىرعانىن ايتتى. ياعني, قاراعاندىعا جاڭا نان زاۋىتىن سالۋ كەرەك.
قاراعاندى نان زاۋىتىنىڭ جۇمىس ىستەپ تۇرعانىنا 30 جىلدىڭ مۇعدارى بولىپتى. وسى ۋاقىت ارالىعىندا ول قاراعاندى وبلىسىنداعى الدىڭعى قاتارلى كاسىپورىننىڭ بىرىنە اينالعان. زاۋىت قابىرعاسىنان تاۋلىگىنە 50 مىڭ تونناعا دەيىن ءونىم – كادىمگى بيداي نانىنان باستاپ, مايقوسپا توقاشتىڭ 12 ءتۇرى شىعادى. ال ەندى جاڭا زاۋىت سالىنار بولسا, تۇتىنۋشىلاردىڭ كۇننەن-كۇنگە ءوسىپ كەلە جاتقان سۇرانىسىن قاناعاتتاندىرۋ ءوز الدىنا, جاڭا جۇمىس ورىندارىن اشىپ, 230 ادامدى جۇمىسپەن قامتۋعا مۇمكىندىك تۋادى ەكەن. بۇگىنگى كۇنگە دەيىن وبلىس ورتالىعىن نانمەن قامتاماسىز ەتىپ كەلگەن كاسىپكەر ەندى جاقىن ماڭداعى قالالار مەن اۋداندارعا دا ءوز ءونىمىن شىعارماقشى. كاسىپكەر دانيار مانامباەۆتىڭ ايتۋىنشا, بۇل جوبانىڭ قۇنى 1 ملرد. 499 ملن. تەڭگەنى قۇرايدى ەكەن. ونىڭ 20 پايىزىن ءوز قالتاسىنان سالسا, قالعان 80% قارجىنى نەسيەگە الۋعا دايىن. كاسىپكەر مەملەكەتتەن «گرين تەحنولودجي» جىلىجاي اۋدانىنان جەر تەلىمى مەن «بيزنەستىڭ جول كارتاسى-2020» مەملەكەتتىك باعدارلاماسى بويىنشا ينفراقۇرىلىم تارتىپ بەرۋدى سۇراپ وتىر. سونىمەن قاتار, كاسىپورىن باسشىسى «دامۋ-ءوندىرىس» باعدارلاماسى اياسىندا 10 جىلعا 6 پايىز جىلدىق ۇستەمەمەن نەسيە الۋدان دا ءۇمىتتى ەكەنىن جەتكىزدى. دانيار مانامباەۆ جاڭا نان زاۋىتىنىڭ يتاليا, فرانتسيا, شۆەتسيا جانە دانيادان اكەلىنەتىن ەنەرگياۇنەمدەگىش قۇرال-جابدىقتارمەن جاراقتاندىرىلاتىنىن ايتتى. ءساتىن سالسا, جاڭا زاۋىت قۇرىلىسىن كەلەسى جىلى اياقتاماق. قاراعاندى قالاسىنىڭ اكىمى نۇرلان اۋباكىروۆ باستاعان ءۇيلەستىرۋ كەڭەسىنىڭ مۇشەلەرى جوبانىڭ ماڭىزدىلىعىن اتاپ ءوتىپ, ونى يندۋستريالاندىرۋ كارتاسىنا ەنگىزۋدى ءجون دەپ تاپتى. ءوز جوباسىن تانىستىرعان كەلەسى كاسىپكەر رافاەل الەەۆ بولدى. ول قالاداعى «تاير» دەپ اتالاتىن ءىرى ساۋدا ءۇيىنىڭ يەسى. كاسىپكەر تومەنگى پايىزدىق ۇستەمەمەن نەسيە الىپ, «تاير-5» دەپ اتالاتىن ساۋدا-ويىن-ساۋىق ورتالىعىنىڭ قۇرىلىسىن باستاماقشى ەكەن. ونىڭ ايتۋىنشا, بۇل جەردە زاماناۋي كينوتەاتر ورنالاسادى. سونداي-اق, كاسىپكەر كەڭەستە قارىزدى قايتا قارجىلاندىرۋ ماسەلەسىنە قاتىستى سۇراقتى دا كوتەردى. ۇيلەستىرۋ كەڭەسىنىڭ مۇشەسى ساران سىزدىقوۆا «تاير» ساۋدا ۇيىندەگى دۇڭگىرشەكتەردىڭ ارەندالىق باعاسىنىڭ جىلدان-جىلعا كوتەرىلىپ كەلە جاتقانىن تىلگە تيەك ەتتى. وسىنىڭ سالدارىنان ۇزاق جىلدار ساۋدا جاساپ كەلە جاتقان ۇساق كاسىپكەرلەر جالعا الۋ اقىسىنىڭ قىمباتتىعىنا شىداي الماي, ورىندارىن تاستاپ كەتىپ جاتىر ەكەن. الايدا, كاسىپكەر رافاەل الەەۆ مۇنداي فاكتىلەردى مويىن- داماي, كەرىسىنشە, ساۋدا ءۇيىنىڭ ارەندا قۇنىنا ۇنەمى جەڭىلدىكتەر جاساپ, ۇزاق ۋاقىتتان بەرى جالعا بەرۋدىڭ باعاسىن كوتەرمەي كەلە جاتقانىن العا تارتتى. قالا اكىمى نۇرلان ءاۋباكىروۆ جوبانىڭ دامۋىنا ءوز ۇسىنىسىن ەنگىزدى. ول «تاير» ساۋدا ءۇيى مەن جولدىڭ ەكىنشى قاباعىندا ورنالاسقان «التىن اربا» بازارىنىڭ اراسىن جەراستى جولىمەن جالعاۋدىڭ ماڭىزدىلىعىنا توقتادى. سولاي بولعان جاعدايدا قالاداعى ورتالىق كوشە بۇقار جىراۋ داڭعىلى بويىنداعى كولىك كەپتەلىسى جويىلىپ, جول-كولىك قوزعالىسى ءتارتىبىن بۇزۋ وقيعالارىنىڭ ازاياتىنىن اتاپ ءوتتى. كەڭەستە تالقىلانعان ءۇشىنشى جوبا قاۋىپتى جۇكتەردى تاسىمالداۋعا ارنالعان ەدى. «ەۋروتەحنوگاز» جشس ديرەكتورى ەلەنا پاۆلوۆا مەملەكەتتەن ءوزىنىڭ كومپانياسىنا ەكى جۇك كولىگىن ساتىپ الۋىنا كومەكتەسۋىن سۇرادى. ەسەسىنە كاسىپكەر حانىم جاڭا جۇمىس ورىندارىن اشۋعا ۋادە بەردى. ۇيلەستىرۋ كەڭەسىندە قارالعان ءۇش جوبا دا ماقۇلدانىپ, ۇدەمەلى يندۋستريالىق-يننوۆاتسيالىق دامۋ جونىندەگى وڭىرلىك ۇيلەستىرۋ كەڭەسىنە جىبەرىلدى.
قايرات ءابىلدينوۆ, «ەگەمەن قازاقستان».
قاراعاندى.
